Gasore Serge: Kwiruka byabaye inzira yo kurokoka Jenoside kugeza ageze ku iterambere

Gasore Serge yatanze ubuhamya 

Gasore Serge yakorokeye Jenoside yakorewe Abatutsi 1994 mu Murenge wa Ntarama mu Karere ka Bugesera, mu gitabo yanditse yiga muri Amerika yise “My Day to Die: Running for My Life”, avuga ubuzima bushaririye yanyuzemo ndetse n’uburyo nyuma ya 1994, mu gushaka kwiyubaka yabaye umukinnyi w’imikino ngororamubiri (Athletisme) kuko yari amaze kumenya amateka y’abatejwe imbere n’iyo siporo.

Gasore mu buryo bwo kwiyubaka, yubaka n’abandi yashinze ikigo yise “Gasore Serge Foundation” kiri mu Murenge wa Ntarama, gikora ibikorwa by’ubugiraneza, akaba yarashinze iki kigo akiri muri Amerika ubwo yatangizaga umuryango utari uwa Leta yise “Rwanda Children”.

Mu kiganiro yatanze kuri Radio Rwanda kuri uyu wa Kabiri tariki ya 12 Mata 2022 yagarutse ku bikubiye mu gitabo cye (My Day to Die: Running for My Life), harimo uburyo nyirakuru bari bahungiye hamwe muri Kiliziya ya Ntarama yishwe atewe grenade, ariko nubwo hanze hari abapolisi barasaga umuntu wese usohotse muri Kiliziya yahisemo gusohoka yiruka anyuze mu muryango Padiri yinjiriragamo aje gusoma misa.

Gasore yavuze ko yasohotse muri Kiliziya yiyemeje gupfira hanze yayo, ariko nubwo yanyereye akagwa, ariko Imana yaramurinze kugeza ageze mu rufunzo ari na ho yaje kurokokera.

Gasore yagize ati “ntangiye kwandika Igitabo natekereje kuri uwo munsi uburyo nasohotse muri Kiliziya niruka ntazi aho njya kubera ko no muri uko kwirukanka numvaga mu by’ukuri numvaga ko ndokotse iyo grenade cyangwa se izo nterahamwe zirimo zica indani muri Kiliziya ariko numvaga ko ngiye kugwa ahantu hafi ahongaho ku gasozi”.

Gasore yakomeje agira ati “Jenoside nk’uko nanayisobanura mu gitabo, Jenoside yakorewe Abatutsi ni nk’uko watera umuti wica inyenzi, kuko iyo uteye umuti wica inyenzi urabanza ugakura ibintu byose mu nzira bishobora gutuma inyenzi irokoka ni urugero kugira ngo nutera umuti uzagere ahantu hose, icyo gihe rero ubugome n’interahamwe zari ku misozi yose numvaga ko ngiye gusohoka muri iyo Kiliziya nkagenda nkajya kugwa ahandi hafi aho ni yo mpamvu Igitabo nacyise “My Day to Die: Running for My Life” mu Kinyarwanda ngenekereje ni ukuvuga ngo “Umunsi wanjye w’urupfu nirukanka kugira ngo ndokore ubuzima bwanjye”.

Yinjiye muri siporo ya “Athletisme” ashaka iterambere, arigeraho arigeza no ku bandi

Muri iki kiganiro Gasore yavuze uburyo yatangiye siporo yo gusiganwa ku maguru(Athletisme) intego ye ari ukugira ngo yiteze imbere, yagize ati “Jenoside irarangiye nk’umuntu wari urubyiruko ntabwo ibintu byose byahise bijya ku murongo uko umuntu abyifuza hariho za nzitane z’abo wabuze, bya bikomere ugifite, hariho bya bintu bikitugoye mu buzima bwa buri munsi, umuntu yumvaga arimo arishakisha kugira ngo ubuzima bwongere bugaruke, rero hari harimo no gushakisha ibintu mu buzima wakora bigatuma ubuzima bugaruka, habaga harimo kwiga, kwiga byabaga birimo inzitane, harimo uburwayi bw’abawe yari inzitane, twahoraga twiruka, wahoraga ukubita hirya no hino ukishakisha kugira ngo ubeho, ndabyibuka ntangira na siporo yo kwiruka, narinzi ko ari siporo ni impano mfite ariko nshaka ko iyo mpano izamfasha kubona iterambere kuko narimaze kubona ingero z’abantu birutse babona iterambere”.

Gasore yumvaga nyuma yo kwiga ari ukuba umukinnyi, akiteza imbere, agateza imbere n’abandi, yagize ati “bihura n’ibyo nkora mu buzima bwa buri munsi nko gufasha abana, ababyeyi, noneho nkagerageza kubihuza, hari igihe nirukankaga nzi ko uwo munsi ndibupfe hari uko gukomeza kwiruka hirya no hino nyuma ya Jenoside umuntu ashaka kwiteza imbere, kwiga, kwita ku bawe na byo bitoroshye ugeze aho noneho urirukanse ubikoze nk’umwuga bikubeshejeho, bibeshejeho n’Igihugu, bibeshejeho n’abantu bagukikije”.

Gasore nyuma yo kujya kwiga muri Amerika, ntiyibagiwe icyo siporo yo gusiganwa ku maguru yamumariye mu buzima kuko yahise atangiza ikipe ya Ntarama y’Imikino Ngororamubiri, nyuma anatangiza isiganwa rya “20KM de Bugesera” rifatwa nk’irya kabiri mu marushanwa y’imikino ngororamubiri abera mu Rwanda.

Leave a Reply

Your email address will not be published. Required fields are marked *

Scroll Up