Perezida wa FINA yemeye kugira uruhare mu iterambere rya siporo yo koga mu Rwanda

Girimbabazi Pamela Perezida w’Ishyirahamwe ry’umukino wo koga mu Rwanda na Dr. Husain Al-Musallam Perezida wa FINA

Perezida w’Ishyirahamwe ry’umukino wo koga ku Isi (FINA) ari we Dr. Husain Al-Musallam yagiriye uruzinduko rw’iminsi ibiri mu Rwanda, umuhango wo kumwakira ubera muri Kigali Convention Center kuri uyu wa Gatatu tariki ya 16 Werurwe 2022, mu ijambo rye yemeye ubufatanye kugira ngo umukino wo koga umenyekane mu gihugu hose.

Mu baje kumwakira harimo, Ministre wa Siporo Madamu Munyangaju Mimosa Aurore, Perezida wa Komite Olempike Uwayo Théogène, Felicité Rwemarika umunyamuryango wa Komite Mpuzamahanga Olempike (CIO), Robert Bayigamba wigeze kuba Ministre wa Siporo na Perezida wa Komite Olempike, bamwe mu bakinnyi bamenyekanye mu mukino wo koga mu Rwanda n’abandi.

Dr. Husain Al-Musallam yaganiriye na Ministre wa Siporo Munyangaju Mimosa Aurore

Dr. Husain Al-Musallam mu ijambo yagejeje ku bari aho yavuze ko mu biganiro bagiranye n’ubuyobozi bw’Ishyirahamwe ry’umukino wo koga mu Rwanda ari uko iyi siporo yarushaho gutezwa imbere ikaba imwe mu zikunzwe mu gihugu hose.

Yakomeje avuga ko siporo ari ingenzi mu buzima by’umwihariko iyo koga ari yo mpamvu yijeje abari aho ko hagiye kuba ubufatanye mu kuyiteza imbere mu Rwanda.

Girimbabazi Rugabira Pamela Umuyobozi w’Ishyirahamwe ry’umukino wo koga mu Rwanda (RSF), yabwiye abanyamakuru ko urugendo rwa Perezida wa FINA ari igisubizo ku mukino wo koga mu Rwanda, yagize ati “ni igisubizo ku cyerekezo twari dufite kuko navuga ko kugira ngo dutoranywe mu bihugu yasuye ari uko nagize amahirwe yo guhura nawe mu bwira ko mu Rwanda dukeneye ko siporo yo koga ishyirwamo imbaraga”.

Pamela yavuze ko mu minsi iri imbere mu Rwanda hazagaragara ibikorwa bifatika bya siporo yo koga nyuma y’uru rugendo rwa Dr. Husain Al-Musallam.

Dr. Husain Al-Musallam yakiriwe n’abantu batandukanye bazwi muri siporo aha yari ageze muri Kigali Convention Center

Ishyirahamwe ry’umukino wo koga mu Rwanda na none ryerekanye filimi mbara nkuru (documentary film) yerekana uko uyu mukino uhagaze mu Rwanda, herekanwa aho abakinnyi boga muri “piscine” n’aboga mu biyaga.

Dr Hussain Al Musallam yazanye n’abandi barimo Visi Perezida wa FINA akaba na Perezida wa CANA, Dr Sam Ramsamy, Umuyobozi Nshingwabikorwa wa FINA, Brent Nowicki, Umuyobozi wa CANA-Zone 3, Dr Donald Rukare n’abakinnyi babiri batwaye Shampiyona y’Isi yo koga ari bo: Ranomi Kromowidjojo na Ferry Weertman.

Kuri uyu wa Kane, Dr Al Musallam arasura Urwibutso rwa Jenoside rwa Kigali ruri ku Gisozi n’ishuri rya Green Hills Academy mbere y’uko akomereza urugendo rwe muri Uganda.

Uwayo Theogene Perezida wa Komite Olempike ni umwe mu baje kwakira Dr. Husain Al-Musallam Perezida wa FINA

Leave a Reply

Your email address will not be published. Required fields are marked *