Bahati Innocent yatorewe kuba Visi Perezida wa “Table Tennis”

Bahati Innocent nyuma yo gutorerwa kuba Visi Perezida w’Ishyirahamwe rya Table Tennis

Inteko Rusange y’Ishyirahamwe rya Tennis ikinirwa ku meza “Rwanda Table Tennis Federation” (RTTF) yateranye kuri uyu wa Gatandatu tariki ya 5 Werurwe 2022 yatoye Innocent Bahati uzwi cyane ku izina rya “Enock” ku mwanya wa Visi Perezida aho yasimbuye Frere Burasa Maurice wari usanzwe kuri uyu mwanya wagiye mu butumwa bw’akazi muri Libani.

Bahati yagize amajwi 8/8 y’amakipe yose yitabiriye Inteko Rusange.

Muri iyi Nteko Rusange n’abakinnyi ba Table Tennis bafite ubumuga bari bahagarariwe na Dynah

Bahati nyuma yo gutorwa yabwiye abanyamakuru ko icyo azibandaho ari iterambere rya Table Tennis mu Rwanda hategurwa amarushanwa menshi.

Ubwo yabazwaga aho akura icyizere cy’uko azabigeraho yasubije ati “icyizere nshingiyeho ni icy’abanyamuryango ubungubu bahuje, tutirengagije ingaruka za Corona n’amikoro y’amakipe, icyizere ndakivana mu myanzuro yafashwe y’uko tugomba kwegeranya imbaraga “Club” iri inyuma tukayizamura, ariko hakabaho n’amarushanwa menshi ashoboka hatabayeho kuvuga ngo iyi “Club” nta mikoro ifite”.

Ikindi yavuze bazibandaho ni ugushaka abaterankunga kugira ngo umukino urusheho gutera imbere.

Innocent Bahati muri manda iheruka yari Umunyamabanga Mukuru (SG) w’Ishyirahamwe rya Table Tennis mu Rwanda ariko nyuma aza kubihagarika ku mpamvu ze bwite nubwo n’ubundi yakomeje gutanga umusanzu we kuri uyu mukino, na byo yagize icyo abivugaho ati “ubushize natowe nka ‘SG” nyuma y’aho ku mpamvu zanjye bwite ndegura, ariko na none bitavuze ko kwegura nanze Federasiyo, icyatumye negura icyo gihe nta bwo cyabashije gucamo bituma rero ngaruka ariko ndi umukorerabushake nkomeza gufasha aho intege nke zigaragara, ariko ubungubu kuko uwari Visi Perezida agiye ubwo narindi hafi nkuriye “Club” yanjye bahita bansaba ko naba umukandida ntanze “candidature” bahita banyemerera ko naba Visi President”.

Iyi Nteko Rusange yari iyobowe na Birungi Jean Bosco Perezida w’Ishyirahamwe rya Table Tennis mu Rwanda, nyuma wabwiye abanyamakuru ko bagiye gutangiza amarushanwa ku rwego rw’Igihugu (National League) muri rusange hakazaba amarushanwa menshi muri uyu mwaka.

Ikindi cyaganiriweho muri iyo Nteko Rusange ni ukwerekana gahunda y’ibikorwa by’umwaka wa 2022 n’ingengo y’imari izakoreshwa, aho izaba igera muri miliyoni 40.

Birungi Jean Bosco Perezida w’Ishyirahamwe rya Table Tennis mu Rwanda

Muri iyi Nteko Rusange yateraniye muri “Centre Christus” i Remera habayeho no kwakira abanyamuryango bashya batanu harimo: Bugarama Table Tennis Club, Rodrigue Table Tennis Academy ifite abana basaga 50 bakina Tennis ikinirwa ku meza, Stella Initiative Academy ifite abana barenga 30, Kirehe Youth Center Table Tennis Club ifite abana 18 naho iya gatanu ikaba New Vision Table Tennis Club.

Mu muhango wo gutangiza shampiyona y’Igihugu ya Table Tennis, haje Umujyanama wa Komite Olempike ari we Girimbabazi Pamela.

 

Bahati (uhagaze) yabwiye abanyamuryango b’Ishyirahamwe rya Table Tennis imigabo n’imigambi ye

Leave a Reply

Your email address will not be published. Required fields are marked *

Scroll Up