Bumbogo: Umukecuru aremeza ko abonye umwana we afite Agakingirizo yamufata nk’intwari

Mukamuganga Paulina umukecuru w’imyaka 75 utuye mu Murenge wa Bumbogo

Mukamuganga Paulina umukecuru w’imyaka 75 utuye mu Murenge wa Bumbogo, Akagali ka Nyagasozi, Umudugudu wa Kigabiro mu Karere ka Gasabo aravuga ko abonye umwana we afite agakingirizo yamufata nk’intwari kuko ari bwo buryo bwamufasha kwirinda inda zidateganyijwe.

Mu kiganiro n’ikinyamakuru IMPAMBA.COM yagize ati “umwana wanjye mubonanye agakingirizo namufata nk’intwari”.

Uyu mukecuru avuga ko afite abuzukuru babiri babyariye mu rugo rwe nyuma y’aho nyina wababyaye yitabye Imana akamusigira abo bana b’impanga nyuma batewe zidateguwe kuko batakoresheje Agakingirizo.

Mukamuganga aremeza ko nta muntu ukwiriye kugira ipfunwe ryo kugura agakingirizo cyangwa kwereka abantu ko agafite kuko iyo abazukuru be bibuka kugakoresha ntibari guterwa inda zidateganyijwe.

Mukamuganga yakomeje agira ati “umwana w’umukobwa ufite agakingirizo kandi ntabihishe akwiriye kwitwa intwari kuko usibye kudaterwa inda zidateganyijwe, bimufasha no kwirinda indwara zandurira mu mibonano mpuzabitsina nka Virus itera SIDA”.

Kagaba John Umunyamabanga Nshingwabikorwa w’Akagari ka Nyagasozi ho mu Murenge wa Bumbogo, aratangaza ko mu Nteko z’Abaturage bajya basobanurira abaturage kwirinda Virus itera SIDA, ariko ikibazo gikunze kubaho ari uko hari bamwe mu baturage banga gufata Agakingirizo mu ruhame.

Muramira Bernard,umuyobozi w’Ihuriro ry’Imiryango igamije gukumira icyorezo cya SIDA no kurengera ubuzima (Rwanda NGOs Forum on HIV/AIDS and Health Promotion (RNGOF on HIV/AIDS & HP), yavuze ko nta muntu ukwiriye kugira isoni zo kugura agakingirizo kuko ari bumwe mu buryo bwizewe bwo kwirinda Virus itera SIDA, avuga ko na none ko gafasha abantu kwirinda inda zidateganyijwe.

Muramira akaba asanga umuntu agomba gutinya urupfu kuruta gutinya gufata agakingirizo mu ruhame, kuko SIDA irica, yagize ati “aho kugira isoni zo gutwara agakingirizo nagira isoni zo gupfa”.

Abaturage ba Bumbogo basobanuriwe uko agakingirizo gakoreshwa ndetse bapimwa na Virus itera SIDA

Ihuriro ry’Imiryango igamije gukumira icyorezo cya SIDA no kurengera ubuzima (Rwanda NGOs Forum on HIV/AIDS and Health Promotion (RNGOF on HIV/AIDS & HP) rikunze gukora ubukangurambaga bwo kwirinda Virus itera SIDA no kwirinda inda zidateganyijwe aho abaturage bahabwa udukingirizo no kwigishwa uko dukoreshwa.

Leave a Reply

Your email address will not be published. Required fields are marked *

Scroll Up