Menya ijambo Muhayimana yabwiye abacamanza mbere yo gufatirwa umwanzuro

Muhayimana Claude mu rukiko (Ifoto/Internet)

Muhayimana Claude uregwa ibyaha bya Jenoside yakorewe Abatutsi, yabwiye abacamanza bo mu Bufaransa ko mu gufata umwanzuro, bakwishyira mu mwanya we muri 1994.

Iri jambo yarivuze kuri uyu wa Kane tariki ya 16 Ukuboza 2021, mbere y’uko abacamaza bamufatira umwanzuro.

Ibi ni nabyo umwunganira mu mategeko  Me Françoise Mathe ejo yasorejeho imyanzuro ye ya nyuma kuri uru rubanza, rwabereye i Paris mu Bufaransa nk’uko ikinyamakuru impamba.com kibikesha abanyamakuru bo mu Rwanda bagiye kumva uru rubanza.

Ubushinjacyaha kuri uyu wa Gatatu tariki ya 15 Ukuboza 2021 bwasabiye Claude Muhayimana igifungo cy’imyaka 15.

Claude Muhayimana w’imyaka 60 yavukiye mu Karere ka Karongi ubwo Jenoside yakorwaga,yari umushoferi wa Guest House ya Kibuye (Ubu ni mu mu Karere ka Karongi) arashinjwa ubufatanyacyaha muri Jenoside yakorewe Abatutsi muri 1994 n’ibyaha byibasiye inyokomuntu kubera ko yafashije interahamwe akazitwara mu modoka zijya kwica Abatutsi mu ishuli ryisumbuye rya Nyamishaba no mu misozi ya Karongi, Gitwa na Bisesero hahoze ari muri Perefegitura ya Kibuye.

Kuri uyu wa Kane nibwo abacamanza biherereye ngo bafate umwanzuro kuri uru rubanza rwa Claude Muhayimana.

Abanyamakuru bagiye kumva uru rubanza bavuga ko Perezida n’abacamanza baba bateguye ibibazo bagenda basubiza mu buryo bw’amatora uhereye ku cya mbere.

Muri uru rubanza perezida akaba yavuze ko bafite ibibazo 100. Ibi bibazo bitegurwa na perezida afatanyije n’abandi bacamanza bamwunganira muri uru rubanza.

Leave a Reply

Your email address will not be published. Required fields are marked *

Scroll Up