Koga: Abakinnyi batatu bagiye guserukira u Rwanda muri Shampiyona y’Isi

Abakinnyi batatu bagomba guserukira u Rwanda mu marushanwa yo koga

Eloi Maniraguha witoreza mu Burusiya, Niyibizi Cedrick na Ishimwe Claudette nibo kuri uyu wa Mbere tariki ya 13 Ukuboza 2021 bagomba guserukira u Rwanda muri Shampiyona y’Isi yo koga yiswe “15th FINA World Swimming Championship” izabera Abu Dhabi.

Iyi shampiyona y’Isi  izatangira tariki ya 16 isozwe tariki ya 21 Ukuboza 2021 naho abakinnyi bazaserukira u Rwanda umutoza uzabaherekeza ni Jimmy Ndori.

Bazatsinda James, Umunyamabanga Mukuru w’Ishyirahamwe ry’umukino wo koga, Rwanda Swimming Federation (RSF) yatangarije ikinyamakuru IMPAMBA.COM ko hari icyizere ko aba bakinnyi bazitwara neza kuko bateguwe bihagije mu gihe cy’iminsi irindwi bamaze mu mwiherero (local) i Nyamata mu Bugesera.

Umunyamabanga Mukuru wa “Rwanda Swimming Federation” yagize ati “Bitewe n’uburyo bitwaye muri shampiona Nyafurika y’umukino wo koga yabereye muri Ghana guhera taliki  ya 11-16/10/2021 aho abakinnyi b’Abanyarwanda bari ku mwanya wa 19 mu bahungu ndetse no ku wa 35 mu bakobwa, biduha icyizere 100% ko bitewe n’imyitozo bakomeje gukorera muri clubs zabo bafashwa n’umutoza bazitwara neza” .

Aba bakinnyi bakoze umwiherero w’iminsi 7 i Nyamata bakaba bazongeraho indi minsi itatu y’imyitozo kuko umukinnyi wa mbere azakina tariki ya 16 Ukuboza 2021 naho abandi babiri bazakina tariki ya 18,19, na 20 Ukuboza 2021.

Andi makuru avugwa mu Ishyirahamwe ry’umukino wo koga

 Andi makuru avugwa mu Ishyirahamwe ry’umukino wo koga ni uko taliki ya 18 Ukuboza 2021 muri Abu Dhabi hazabera Inama y’Inteko Rusange idasanzwe y’Ishyiramwe Mpuzamahanga ry’Umukino wo Koga (FINA), u Rwanda rukaba rugomba guhagararirwa na Visi Perezida wa mbere ari we Dr. Jean Sauveur UWITONZE.

Dr. Jean Sauveur UWITONZE akaba ari we muyobozi uzaba ari kumwe n’abakinnyi mu gihe cy’amarushanwa ya “15th FINA World Swimming Championship” ahuza abakinnyi baturuka mu banyamuryango bose b’Ishyirahamwe ry’Umukino wo Koga ku Isi (FINA).

Abakinnyi n’umutoza wabo

Leave a Reply

Your email address will not be published. Required fields are marked *

Scroll Up