Bugesera: Abahungu baributswa guha agaciro abakobwa kuko ari bo bazavamo abafasha babo mu minsi iri imbere

Urubyiruko rwatanze ubutumwa binyuze mu gukina amakinamico

Mu bukangurambaga bw’iminsi cumi n’itandatu yo kurwanya ihohoterwa rishingiye ku gitsina, bwateguwe n’umuryango w’urubyiruko uharanira uburenganzira n’iterambere (AJEPRODHO JIJUKIRWA), Akarere ka Bugesera na OXFARM ku nkunga y’umuryango w’Ubumwe bw’u Burayi, izi nzego zirasaba urubyiruko kudahishira ihohoterwa aho riva rikagera.

Ubu bukangurambaga busanzwe buba kuva tariki 25 z’ukwezi kwa cumi na kumwe bukageza tariki 10 z’ukwezi kwa cumi n’abiri, aho nk’uko umukozi wa AJEPRODHO JIJUKIRWA Sibomana Cyriaque abivuga ngo bugamije kugira ngo urubyiruko rugire uruhare mu kurwanya ihohoterwa, kuko nta terambere ryashoboka hariho ihohoterwa rishingiye ku gitsina.

Umukozi wa AJEPRODHO JIJUKIRWA Sibomana Cyriaque

Cyriaque agira ati “turashaka ko urubyiruko rusobanukirwa uruhare rwarwo mu kurwanya ihohoterwa rishingiye ku gitsina, kuko iterambere ryose bageraho rigomba kuba rishingiye ku mahoro rishingiye ku burenganzira bwubahirijwe haba kuri bo nk’urubyiruko n’ahandi”.

Cyriaque akomeza avuga ko muri ubu bukangurambaga hitawe cyane ku mugore n’umwana w’umukobwa kuko ari bo nkinkgi y’umuryango; ariko agasaba n’igitsinagabo kugira uruhare mu kurwanya ihohoterwa rishingiye ku gitsina. Agira ati “tubona ihohoterwa ryiganza ahanini rishingiye ku gufata umugore nk’uciriritse bikaba byagera no mu bana aho abana b’abakobwa usanga badafatwa neza, turashaka kubaka imibanire myiza kuko hatabayeho umugore ntabwo twagira umuryango ntawavuka atabyawe n’umugore, abahungu rero nabo turabasaba uruhare rwabo mu kurwanya ihohoterwa”

Urubyiruko rukurikirana ubu bukangurambaga ruvuga ko rwasobanukiwe ibijyanye n’ihohoterwa no kurirwanya, bahereye aho batuye.

Nikobizaba Athanase wo mu murenge wa Nyamata agira ati “ngiye kugenda nshishikariza urubyiruko rugenzi rwanjye kumenya uburenganzira bwabo, no kwirinda kugendera mu bigare byatuma bakora ihohoterwa”.

Butera Florence wo mu murenge wa Ntarama na we witabiriye ubu bukangurambaga agira ati “tugiye kugenda aho dutuye tuganirize urubyiruko bagenzi bacu ku kubahana, no guhana agaciro bityo tube umusemburo wo gukumira no kurwanya ihohoterwa, kuko hari byinshi twasobanukiwe”.

Madame Mutuyimana Florentine, umukozi w’urwego rw’ubufasha mu by’amategeko MAJ; ushinzwe kurwanya ihohoterwa rishingiye ku gitsina unashinzwe abunzi muri MAJ ya Bugesera, asaba uru kwimakaza gahunda yo kurandura umuco wo kudahana, barandura ihohoterwa ariko kandi n’uwahohotewe ntagahishire uwamuhohoteye uwo ari we wese, kabone n’iyo baba bafitanye isano ya hafi.

Madame Florentine agira ati “umuntu agomba kumenya uburenganzira bwe niba hari ugukubise ukamenya aho ujya kubariza, nta mpamvu yo gupfukiranwa kabone n’iyo waba wahohotewe n’umubyeyi wawe cyangwa musaza wawe, hari aho usanga umukobwa akubitwa kuko yatinze gutaha mu rugo avuye ku ishuli, mwikomeza guhohoterwa ngo mubihishire kandi hari inzego zigomba kubarengera”.

Madame Mutuyimana Florentine, umukozi w’urwego rw’ubufasha mu by’amategeko MAJ; ushinzwe kurwanya ihohoterwa rishingiye ku gitsina unashinzwe abunzi muri MAJ ya Bugesera

Ubu bukangurambaga bw’iminsi cumi n’itandatu yahariwe kurwanya ihohoterwa rishingiye ku gitsina, busanzwe bubaho buri mwaka kuva tarikii 25 z’ukwezi kwa 11 bukarangira tariki 10 z’ukwezi kwa 12. Nibutsa ko inkundura yo kurwanya ihohoterwa rishingiye ku gitsina mu Rwanda yatangijwe mu mwaka wa 1991.

Leave a Reply

Your email address will not be published. Required fields are marked *

Scroll Up