U Bufaransa: Claude Muhayimana yahakanye ibyaha aregwa

Claude Muhayimana, Umunyarwanda uba mu Bufaransa yasomewe ibyaha aregwa  arabihakana, mu gihe aregwa ubufatanyacyaha muri Jenoside yakorewe Abatutsi muri 1994 mu cyahoze ari Perefegitura ya Kibuye, ari naho yavukiye.

Amakuru atangazwa n’abakurikiye urwo rubanza yemeza ko Claude Muhayimana yemeye ko habayeho umugambi wo gutegura Jenoside yakorewe Abatutsi, ariko kuba yari umushoferi atari kubimenya, ko icyo azi ari uko habaye Jenoside yakorewe Abatutsi 1994.

Uru rubanza rwatangiye kuri uyu wa mbere tariki  ya 22 Ugushyingo 2021, mu rukiko rwa rubanda rw’i Paris, rusanzwe ruburanisha ibyaha by’intambara n’ibyaha byibasiye inyokomuntu.

Uru rubanza ruzasozwa tariki 17 Ukuboza 2021, aho urukiko ruzumva abatangabuhamya mirongo itanu, barimo 15 bazava mu Rwanda.

Claude Muhayimana yahoze ari umushoferi wa Guest House Kibuye, akaba aregwa kuba  imodoka yatwaraga yarayikoresheje ajyana Interahamwe mu bitero byahitanye Abatutsi benshi bo mu Mujyi wa Kibuye no mu nkengero zawo.

Muhayimana Claude, yabanje kuba impunzi mu Bufaransa, aza kuhabona ubwenegihugu muri 2010. Muri 2013, umuryango “Collectif des parties civiles pour le Rwanda, (CPCR) ryamutanzeho ikirego. Yatawe muri yombi mu 2014 mu mujyi wa Rouen, aho yari umukozi w’Akarere.

Leave a Reply

Your email address will not be published. Required fields are marked *

Scroll Up