Itegeko ryemerera umuntu gukuramo inda ntirirumvikana neza-Busabizwa

Busabizwa Parfait Umunyamabanga Nshingwabikorwa w’Intara y’Amajyepfo

Busabizwa Parfait, Umunyamabanga Nshingwabikorwa w’Intara y’Amajyepfo, asanga bamwe mu Banyarwanda batarasobanukirwa neza ibikubiye mu itegeko ryemerera umuntu gukuramo inda.

Ibi, yabitangaje tariki ya 28 Nzeli 2021, ku munsi mpuzamahanga wo kuvanamo inda, mu Rwanda wizihirijwe mu Karere ka Ruhango.

Mu ijambo yajeje ku baturage bari aho, yavuze ko hari itegego ryemerera umuntu gukuramo inda mu buryo bunoze kandi ku mpamvu zumvikana.

Parfait yakomeje avuga ko amakuru ajyanye no gukuramo inda akwiriye kumenyekana neza, yagize ati “ku bijyanye no gukuramo inda ku buryo bunoze biracyakenewe kuzamuka kandi abantu benshi bakeneye kumenya amakuru yuzuye n’amategeko abigenga niyo mpamvu nsaba ko ubukangurambaga bwakomeza gushyirwamo imbaraga kandi ibigo nderabuzima bikabigiramo uruhare rufatika”.

Busabizwa Parfait, Umunyamabanga Nshingwabikorwa w’Intara y’Amajyepfo yavuze ko kugira ngo itegeko ryo gukuramo inda rirusheho kumvikana hakenewe ubufatanye no guhuza imbaraga, aboneraho gusaba imiryango itari iya Leta kwihuza kugira ngo igere ku ntego imwe, ari na yo mpamvu ubuyobozi bw’Intara y’Amajyepfo bwiteguye gufatanya na buri wese wifuza kuzamura imyumvire y’Abanyawanda ku itegeko ryo gukuramo inda.

Rwanda NGOs Forum on HIV/AIDS and Health Promotion, ifatanyije n’indi miryango itari iya Leta ari yo: HDI, IMRO na GLIHD bakomeje kumenyekanisha iri tegeko maze abaturage barimenye kugira ngo abakobwa n’abagore batavanamo inda mu buryo butanoze bikaba byabaviramo ingaruka mbi harimo no kuhasiga ubuzima.

Iteka rya Minisitiri Nomero 002/MoH/2019 ryo ku wa 08/04/2019 rigena ibigomna kubahirizwa kugira ngo muganga akuriremo umuntu inda.

Uyu munsi mukuru wo gukuramo inda wizihijwe tariki ya 28 Nzeli 2021, ariko nyuma y’aho, ku mbuga nkoranyambaga bamwe bagaragaza ko gukuramo inda ari ukwambura umuntu ubuzima.

Mu kiganiro cyihariye UMUSEKE wagiranye n’ Impuguke mu by’Ubuzima mu Kigo giteza imbere Ubuzima n’Uburenganzira bwa Muntu (HDI), Mporanyi Theobald,yavuze ko abanyamadini bakwiye guhindura imyumvire n’imitekerereze bafite ku itegeko ryemerera abantu gukuramo inda byemewe n’amategeko ahubwo bagafasha abayoboke babo.

Yagize ati “Icya mbere ntibagafatire itegeko hejuru.Abantu bumva ko itegeko cyangwa iteka ryagiyeho bakarifatira hejuru.Itegeko ryagiyeho kuko hari ikibazo ryaje gukemura .”

Yavuze ko hirya no hino hakigaragara abantu badafite indangagaciro z’umuco nyarwanda , bahohotera abakiri bato bityo Abanyamadini bakaba bakwiye kugira uruhare rwo kubigisha.

Iyi mpuguke yavuze ko abanyamadini bakwiye kugira uruhare rwo kwigisha sosiyete kugira ngo icyaha cyo guhohotera abakiri bato cyirwanywe.

Yavuze ko itegeko ryemerera abantu gukuramo inda mu buryo bwemewe n’amategeko rijya gushyirwaho, ari uko leta yashakaga kurengera abahohoterwa bakagerekaho no kuba bashobora gutakaza ubuzima bwabo.

Mporanyi yavuze ko kugeza ubu hakigaragara imibare y’abiyahura ahanini bitewe no kuba batiyakiriye nyuma yo gutwara inda, nyamara yagafashijwe gukurirwamo inda mu buryo bwemewe n’amategeko bikabafasha kurokora ubuzima bwabo.

Ingingo ya 125 y’itegeko N0 68/2018 ryo ku wa 30/08/2018 rivuga ko nta buryozwacyaha bubaho iyo gukuramo inda byakozwe kubera impamvu zikurikira: Abatewe inda bakiri abana, abafashwe ku ngufu, abashyingiwe ku ngufu, uwatewe inda na mwenewabo wa hafi bafitanye isano rya kabiri, n’inda ibangamiye ubuzima bw’umubyeyi cyangwa umwana.

Iri tegeko kandi ntirireba abana batewe inda gusa kuko buri mugore n’umukobwa bafite uburenganzira bwo gukuramo inda hatitawe ku kigero cy’imyaka ariko akaba yujuje ibisabwa.

Itegeko rivuga ko umuntu wemerewe gukuramo inda ari umuganga wemewe n’amategeko.

Iri tegeko risobanura ko umwana utujuje imyaka 18 y’ubukure adashaka ko inda ye ikurwamo hubahirizwa icyemezo cy’umwana.

Ukorerwa serivisi yo gukuramo inda yuzuza urupapuro rusobanura ibyo agiye gukorerwa, agasobanurirwa ingaruka zabyo yarangiza akabisinyira, iyo ari umwana utarageza ku myaka y’ubukure asinyirwa n’umubyeyi, umurera cyangwa uhagarariye ibitaro byaho igikorwa kigiye kubera.

Iri tegeko risobanura ko inda irengeje ibyumweru 22 idakurwamo , ushaka iyi serivisi yegera muganga ubishinzwe mbere y’ibi byumweru.

Leave a Reply

Your email address will not be published. Required fields are marked *

Scroll Up