U Rwanda rwakiriye urumuri mu kwizihiza imyaka 20 Global Fund imaze ivutse

Mu kwishimira ibikorwa bya Global Fund mu Rwanda bacanye urumuri rw’icyizere

Imiryango itari iya Leta irengera ubuzima irishimira ibyo yagejeje ku baturage ibikesha umuryango Global Fund umaze imyaka 20.

Mu rwego rwo kwizihiza iyo myaka 20 Global Fund imaze itanga ubufasha mu ngeri zitandukanye, Urumuri (caravan) ruri kuzengurutswa mu bihugu bitandukanye aho kuri uyu wa Kabiri tariki ya 7 Nzeli 2021, u Rwanda rwakiriye urwo rumuri rwahageze ruturutse i Burundi, uyu muhango ubera ku cyicaro cy’’Ihuriro ry’Imiryango igamije gukumira icyorezo cya SIDA no kurengera ubuzima (Rwanda NGOs Forum on HIV/AIDS and Health Promotion (RNGOF on HIV/AIDS & HP).

Felicité Rwemarika, umuyobozi wa “Rwanda NGOs Forum on HIV/AIDS and Health Promotion (RNGOF on HIV/AIDS & HP” yabwiye itangazamakuru ko u Rwanda kwakira urwo rumuri rw’imyaka 20 Global Fund imaze ivutse bivuze ikintu gikomeye ko iyo Global Fund itabaho hari gupfa abantu benshi kuko yafashije abantu gutuma imyaka yabo yo kubaho yiyongera.

Yagize ati “iyi myaka 20 turashimira ibikorwa bya Global Fund, hari abantu bavukanye ubwandu bwa SIDA, ariko barakuze bameze neza, uru rumuri ruvuze ko abantu badashobora gutakaza icyizere cyo kubaho mu gihe barwaye”.

Isabelle Nizeyimana uhagarariye umuryango w’abagore ku isi urwanya icyorezo cya SIDA witwa ICWEA ishami ry’uRwanda

Isabelle Nizeyimana uhagarariye umuryango w’abagore ku isi urwanya icyorezo cya SIDA witwa ICWEA ishami ry’uRwanda yatagaje ko Urumuri u Rwanda rwakiriye rufite igisobanuro ati “uru ni urumuri rwo kubaho, ni urumuri rw’icyizere kuko Global Fund yaradufashije kuva twatangira urugendo rwo kurwanya icyorezo cya SIDA mu Gihugu cyacu cy’u Rwanda, Global Fund yadufashije muri byinshi, yatumye abana bacu baturuka ku banduye biga bararangiza abenshi bageze kure, Global Fund ntacyo itakoreye “communauté” cyane cyane ababana na Virus itera SIDA, nyuma ya Virus itera SIDA hari ibyuririzi bya Malariya n’Igituntu byose Global Fund yarabyishingiye ibavuza ku buntu, nta kintu itakoze”.

Isabelle avuga ko kwizihiza imyaka 20 bivuga ikintu gikomeye kuko abarwaye n’abarwaje SIDA nibo bazi icyo Global Fund yabakoreye ati “ni yo mpamvu rero twishimiye ko uru rumuri mu minsi irindwi tuzarumarana ruzatwibutsa ibintu byinshi, tuzakora ibintu byinshi kandi tuzakomeza tubikore urugamba ruracyahari kuko hari abantu barwaye badashaka kubigaragaza, bamenye ko Global Fund ihari ibafasha, imiti irahari ni ubuntu, abihishe bave mu bwihisho”.

Andrew Gasozi Ntwali, ushinzwe ishami ry’ubufasha n’ubujyanama muri UNAIDS we yavuze ko urwo rumuri u Rwanda rwakiriye ruvuze ikintu gikomeye Global Fund yakoze mu kurengera imbaga y’Abanyarwanda kuko hari benshi bagombaga kuba baritabye Imana, ariko iminsi yiyongereye kuko imiti igabanya ubukana yabonetse.

Global Fund yafashije abagera kuri miliyoni 38 banduye SIDA, Igituntu na Malariya kuva muri 2002 barimo abagera muri miliyoni esheshatu muri 2019.

Uru rumuri (caravan) nyuma y’iminsi irindwi ruzava mu Rwanda rwerekezwa muri Repubulika Iharanira Demokarasi ya Congo, rukazavayo rujyanwa muri Centre Africa.

Global Fund mu myaka 20 yakoze ibikorwa by’ingirakamaro

Leave a Reply

Your email address will not be published. Required fields are marked *

Scroll Up