Athletisme: Baranenga abariye amafaranga yabo ya “Bourse Olympique”, bagasaba ko bihagarara

Ntawurikura, Mvuyekure na Joseph Nsengiyumva bose amafaranga yabo ya Bourse Olympique atabagezeho

Abakinnyi b’imikino ngororamubiri (Athletisme) bemerewe inkunga yo kwitegura imikino Olempike (Bourse Olympique) baranenga uburyo itabagezeho n’abayibonye ikaza ituzuye kuko yakunze kujya mu maboko y’abayobozi ba siporo.

Ayo mafaranga (Bourse Olympique) atangwa na “Solidarité Olympique” agenerwa abakinnyi bafite ibihe byiza kurusha abandi, aturuka mu Muryango Mpuzamahanga wa Olempike (CIO) akenshi aba ahwanye n’amadolari 1,200 buri kwezi, atangwa mu gihe cy’amezi cumi n’umunani kugira ngo afashe umukinnyi kwitegura imikino Olempike iba igomba kuba mu mwaka ukurikiyeho, uwo mukinnyi na none aba yemerewe kwitabira byibura amarushanwa mpuzamahanga abifashijwemo na Komite Olempike y’Igihugu cye, ndetse byaba ngombwa ko akoresha amafaranga ye, akayasubizwa ariko atavuye muri ya 1,200$ ya buri kwezi amufasha kwitegura Imikino Olempike.

Bamwe mu bakinnyi bemeje ko iyo nkunga batayibonye cyangwa  se bagahabwa make cyane barimo: Nsengiyumva Joseph bita Joseph Kibungo, Mvuyekure Jean Pierre, Ntawurikura Mathias n’abandi.

Nsengiyumva Joseph yatangarije ikinyamakuru IMPAMBA.COM ko muri 1998-1999 yagiye kwitoreza muri Kenya mu rwego rwo kwitegura imikino Olempike yabereye i Sydney muri 2000, aho buri kwezi yari yemerewe amadorali 1,200, ariko ayamugeraga mu ntoki ni amadolari 60 gusa.

Ntawurikura Mathias waserukiye u Rwanda mu mikino Olempike inshuro eshanu, avuga ko muri 2004 yasezeye ibyo kongera kwitabira amarushanwa mpuzamahanga nabi kuko ibyo mbere yakorewe byamubabaje.

Ntawurikura avuga ko mbere ya 2004 yari agenewe 1,500$ ya buri kwezi yo kwitegura imikino Olempike, ariko nta faranga na rimwe yigeze abona kuko mbere nta nubwo yari azi ko ayo mafaranga abaho, yagize ati “niba bagenzi banjye barayahawe ntabyo nzi, ariko njye ntayo nahawe”.

Ntawurikura na none yatangarije ikinyamakuru IMPAMBA.COM ko hari amadolari 1,200 buri mukinnyi witabiriye imikino Olempike aba yemerewe, ariko nyuma ya Jenoside yakorewe Abatutsi 1994, Perezida wa Komite Olempike wayatanze ari umwe gusa ari we Rudahunga Gidéon, waje gusimburwa na Ignace Beraho nyuma ya 2000, kuva ubwo kugeza uyu munsi akaba atarongera kumva umukinnyi wayahawe.

Mvuyekure Jean Pierre nawe yatangarije ikinyamakuru IMPAMBA.COM ko yari afite ibihe (Minima) bimwerera kwitabira imikino Olempike ya 2016 yabereye i Rio Dejaneiro muri Brazil, akagira na tike imwemerera kujya muri Shampiyona y’Isi yagombaga kubera mu Bushinwa muri 2015, ariko ntiyemererwa kujyayo.

Ibihe (minima) Mvuyekure yari afite yabikuye mu marushanwa Mpuzamahanga yabereye muri Korea ari byo byatumye ashyirwa kuri lisiti y’Abanyarwanda bagomba guhabwa inkunga ya Olempike (Bourse Olympique) nubwo itamugeze mu ntoki.

Mvuyekure avuga ko yari yemerewe buri kwezi (Bourse Olympic) ihwanye n’amadolari 1,200, ariko nta n’igiceri yahawe kuko Ishyirahamwe ry’Imikino Ngororamubiri mu Rwanda (RAF) ryamubwiye ko azajya ahabwa amadolari ijana (100$) gusa, arabyanga rihita ritangira kumuhimbira ibyaha no kumushinja ko nta kinyabupfura agira (Indiscipine).

Mvuyekure Jean Pierre, avuga ko Ndacyayisenga Jean Pierre Umuyobozi Ushinzwe Tekiniki mu Ishyirahamwe ry’Imikino Ngororamubiri mu Rwanda, icyo gihe yari mu bari bashyigikiye ko azajya ahabwa 100$ gusa, kuko yagiye no kumurega muri Minisiteri ya siporo ko yananiranye nyuma yo kumenya ko Mvuyekure yari yandikiye Minisiteri ya Siporo na Komite Olempike ayimenyesha akarengane yakorewe ko kudahabwa amafaranga ye kandi yaritozaga ku giti cye muri Kenya.

Mvuyekure avuga ko Ishyirahamwe ry’Imikino Ngororamubiri (RAF) ritamuhemukiye mu kumwima amafaranga ye ya “Bourse Oympique” gusa, ahubwo ryahise rimuhanisha kumara imyaka ibiri adakina, bituma atitabira Shampiyona y’Isi y’Imikino Ngororamubiri asimbuzwa Muhitira Felicien uzwi ku izina rya Magare, ntiyitabira n’imikino Olempike yabereye muri Brazil muri 2016 kandi mu kubona ibihe ari we wari wirwarije kuri buri kintu kuko yakoresheje ibihumbi umunani by’amadolari mu gukora imyitozo muri Kenya.

Mvuyekure Jean Pierre yatangarije ikinyamakuru IMPAMBA.COM ko nyuma yo kubona ko yafatiwe ibihano bishobora gutuma agira amasaziro mabi yahisemo kujya mu Butaliyani, ahava yerekeza mu Bufaransa ubu akaba afite akazi keza akaba yibeshejeho neza we n’umuryango we.

Uyu mukinnyi avuga ko Ndacyayisenga Peter adakwiriye kuba Umuyobozi Ushinzwe Tekinike mu Ishyirahamwe ry’Imikino Ngororamubiri mu Rwanda (RAF) kuko ari we ugambanira abakinnyi bakomeye muri iki gihe ndetse n’abakinnye mu myaka ya kera, yagize ati “ni gute Peter wananiwe kuyobora Akagari akaza guhungira muri Federasiyo, yashobora kuba “Directeur Technique wa Federation ya Athletisme”, mu byatumaga andwanya cyane ni uko yari azi ko murusha kumva Athletisme”.

Urutonde rw’abakinnyi b’Abanyarwanda bahawe intica ntikize ya “Bourse Olympic”, bikagira ingaruka ku musaruro mubi u Rwanda rukura mu mikino Olempike ni rurerure, ikinyamakuru IMPAMBA.COM kizarugarukaho mu bihe bitandukanye.

Ntawurikura Mathias waserukiye u Rwanda mu mikino Olempike inshuro eshanu
Nsengiyumva Joseph Kibungo mu masiganwa yaranzwe no kuza mu myanya ya mbere
Mvuyekure Jean Pierre Bourse Olympique ye ya 2016 ntayo yahawe

Leave a Reply

Your email address will not be published. Required fields are marked *

Scroll Up