Leta nidohorere abahanzi Nyarwanda bongere kwemererwa gususurutsa abantu mu birori kuko babuze akazi

Umuhanzi Emmy Nkwakuzi umwe mu bahanga mu gucuranga inanga

Abahanzi Nyarwanda bavuga amazina y’inka, bayobora ibirori ndetse bacuranga no mu bukwe barasaba Leta kudohora abakora ubukwe bakemererwa kwiyakira hubahirizwa amabwiriza yo kwirinda icyorezo cya Cororavirus (COVID-19) kuko byabagizeho ingaruka nyinshi ku mibereho yabo.

Ikinyamakuru impamba.com cyasuye abahanzi Nyarwanda batandukanye bavuga ko ubu imibereho yabo n’imiryango yabo ari mibi ku bwo kuba ibirori bitandukanye bitemewe kubera kwirinda COVID-19.

Umwe mu bahanzi wavuganye n’umunyamakuru wanze ko amazina ye atangazwa aratakamba kugira ngo abahanzi bongere kubona akazi kuko ari bo bagira uruhare mu gusigasira umuco n’indangagaciro Nyarwanda.

Ikinyamakuru impamba.com cyegereye umuhanzi Ntugurirwa Emmanuel avuga ko COVID-19 yamugizeho ingaruka zikomeye nyuma y’uko ibirori  bitemewe, kuko yakuye umwana we mu ishuri ryishyuraga ibihumbi magana abiri ku gihembwe amujyana mu ryishyura ibihumbi icumi, mu gihe mbere yumvaga ashaka ko umwana we yiga mu ishuri ryiza mu rwego rwo gutegura ejo hazaza he.

Nkwakuzi yagize ati “icyorezo cya Corona cyateye Isi n’u Rwanda kitarusize natwe cyatugezeho noneho twe kitugezeho kitwigirizaho nkana kubera ko cyatumye dusubiza imirishyo hasi”.

Uyu muhanzi avuga ko mbere ya COVID-19 yashoboraga kwinjiza amafaranga byibura atari munsi y’ibihumbi ijana mu Cyumweru, ariko byose ubu byahagaze kuko yagerageje no gushaka undi murimo yakora ashinga Kantine mu Biryango, Umujyi wa Kigali ushyizwe muri Guma mu Rugo ya kabiri abura abakiliya arahomba.

Ubwo yabazwaga niba amafaranga yigeze gutangwa yo gufasha abahanzi bagizweho ingaruka na COVID-19 niba yaramugezeho yasubije ko ntayo yabonye kimwe n’abandi bahanzi bakizamuka.

Leave a Reply

Your email address will not be published. Required fields are marked *

Scroll Up