Ngoma: Abasangira inkono imwe bazahuza icyiciro cy’ubudehe

Gatsinzi Justin ni Umuyobozi ushinzwe Gahunda yo gufasha abatishoboye muri LODA (iburyo) n’Umuyobozi w’Umurenge wa Rurenge

Mu kiganiro cya Pax Press ku budehe bamwe mu baturage bo mu Karere ka Ngoma mu Murenge wa Rurenge, bavuga ko bishimiye uko gushyira abaturage mu byiciro bishya by’ubudehe byateguwe aho ingaragu cyangwa abakobwa babyariye iwabo bemerewe kujya mu ikiciro cy’ababyeyi mu gihe bagisangirira ku nkono imwe.

Ubwo igikorwa cyo gushyira abaturage mu byiciro by’ubudehe cyakorwaga ababyeyi bamwe bagaragaje ibyifuzo by’uko abana babo bujuje imyaka y’ubukure cyangwa abakobwa babyariye iwabo bahabwa ibyiciro byabo ndetse na bamwe mu bana nabo bakabyifuza ariko ibi biza kubamo imbogamizi kuko amabwiriza y’ibyiciro by’ubudehe avuga ko mu gihe ingaragu cyangwa abakobwa babyariye iwabo bagisangirira n’ababyeyi babo ku nkono imwe bagomba kubarizwa mu cyiciro kimwe n’ababyeyi babo.

Uyu ni Uwimana wo mu Murenge wa Rurenge mu Kagari ka Rugese ni umukobwa wabyariye iwabo we ashima amabwiriza yashyizweho yo gushyira abaturage mu byiciro by’ubudehe harimo ko mu gihe abakobwa babyariye iwabo cyangwa ingaragu bagisangirira ku nkono imwe n’ababyeyi babo bemerewe kuba mu cyiciro kimwe cy’ubudehe ari byiza kuri we.

Yagize ati.” Batangaza ko ibyiciro by’ubudehe bigeye kuvugururwa hari ababyeyi benshi bari bafite gahunda yo kuzikuzaho abana babo bujuje imyaka y’ubukure cyangwa abakobwa babyariye iwabo kugira ngo bazajye mu kiciro cyo kubafasha. Urugero nihereyeho kuko nabyariye iwacu mama yari yarambwiye ko azankuzaho ngafata ikiciro cyanjye urumva ko iyo hatabamo ko mu gihe ababyeyi bagisangirira n’abana babo ku nkono imwe bashyirwa mu kiciro kimwe cy’ubudehe yari kunkuzaho kandi ntabushobozi mfite bwo kwitunga urumva ko nari guhura n’ibibazo.”

Nkurunziza Pacifique wo mu Murenge wa Rurenge mu Kagari ka Rwikubo afite imyaka 21 aracyari ingaragu, iba iwabo avuga ko kuba gisangirira ku nkono imwe n’ababyeyi be bitababera ikibazo ngo bifuze ko ahava kugira ngo agire ikiciro cye.

Yagie ati.” Ababyeyi banjye bamaze ku menya ko Umusore wujuje imyka y’ubukure ariko akaba agisangirira ku nkono imwe n’ababyeyi be bashatse ko najya kwibana kugira ngo nzafate ikiciro cyanjye. Byari kumbera ihurizo rikomeye iyo amabwiriza aza avuga ko ingaragu yujuje imyaka y’ubukure agomba kujya mu kiciro cye kuko ntarabona akazi,ababyeyi bagifite iyo myumvire batwihanganire kuko natwe nitubona akazi tuzabasha nk’uko natwe badufashije tugakura.”

Ibiro by’Umurenge wa Rurenge

Gatsinzi Justin umuyobozi ushinzwe gahunda yo gufasha abatishoboye mu Kigo cy’Igihugu gishinzwe ibikorwa by’iterambere mu nzego zibanze LODA avuga ko ku muntu w’ingaragu, cyangwa abakobwa babyariye iwabo hari amabwiriza agaragaza ikiciro babarizwamo.

Yagize ati.” Nk’uko byasobanuwe,ku muntu w’ingaragu utakiri mu rugo ntabwo aba akiri mu cyiciro cy’ababyeyi, ahubwo abarirwa aho ari.kereka abantu bahuriye ku nkono imwe cyangwa abanyeshuli bicumbikiye bakiri kwiga nko muri za Kaminuza abo babarurwa mu kiciro cy’ababyeyi babo.”

Abakobwa babyariye iwabo nabo batekerejweho

Gatsinzi akomeza avuga ko n’ikibazo cy’abakobwa babyariye iwabo nacyo cyabonewe igisubizo aho nabo bemerewe kubarurwa ku kiciro cy’ababyeyi mu gihe bagisangirira ku nkono imwe.

Yunzemo agira ati.”Iki kibazo twakiganiye hocyane turareba ngo ese yaba kumukura kubabyeyi cyangwa ku mugumishamo icyaba kiza ni ikihe cyangwa ikibi ni ikihe.twasanze abana babyariye iwabo hari aho usanga imiryango yarabakuyeho amaboko,bakumva ko hari inenge bagize barahohotewe, twanze rero gutiza ababyeyi umurindi aho twabonaga bari gukuraho amaboko bariya bana kuko ubuzima bwabo budashingiye ku kubona mituweli gusa dushyiraho ko mu gihe bagisangirira ku nkono imwe n’ababyeyi babo babarizwa mu kiciro kimwe cy’ubudehe.”

Mbere y’uko ibyiciro bivugururwa byari 4 ariko bibarwa mu mibare naho ibishya bikaba bizaba 5 kandi bikabarwa mu nyuguti uhereye kuri A, B, C, D, E.

Leave a Reply

Your email address will not be published. Required fields are marked *

Scroll Up