Rucagu ati “Intore zirinde inda nini n’ubusambo

Rucagu Boniface Umunyapolitike ubifitemo uburambe

Rucagu Boniface wigeze kuba Umuyobozi w’Itorero ry’Igihugu, ubu akaba ari umukozi w’Urwego Ngishwanama rw’Inararibonye z’u Rwanda, yagize icyo avuga ku bantu batatira ibyo bigiye mu Itorero ndetse agira n’ubutumwa abagenera harimo kwirinda inda nini.

Mu kiganiro Rucagu yagiranye n’ikinyamakuru impamba.com yavuze ku bantu batandukira igihango bakuye mu Itorero, ariko ashimangira ko ari ibisanzwe kuko no kuva kera byabagaho ko umuntu atandukira, ariko akegerwa akagirwa inama, agasaba imbabazi agakurwaho ubusembwa.

Rucagu yakomeje avuga ko umurongo w’igihugu atari ugutererana abo bantu bake batandukira amahame y’ubutore.

Ubwo yabazwaga impamvu bamwe batandukira, yasubije ko biterwa no kutareba kure, akavuga ko bifite ingaruka kuri uwo muntu nko gutakaza akazi, nyuma bikarangira habayeho kwicuza.

Rucagu yasabye abantu banyuze mu Itorero ry’Igihugu kurangwa n’umuco wa kimuntu, kubaka ububwe bw’Abanyarwanda no kurandura ingengabitekerezo ya Jenoside n’imizi yayo yose.

Rucagu na none hari ibyo yasabye Intore kwirinda, yagize ati “zigomba kwirinda umururumba, ubusambo, inda nini bakagira umuco wo kunyurwa n’ibyo bafite ibyo babitunganyije nakubwiza ukuri u Rwanda rwaba Paradizo.”

Leave a Reply

Your email address will not be published. Required fields are marked *

Scroll Up