Bugesera:Ab’amikoro make barasaba gufashwa kubona Gaz

Richard Mutabazi Meya wa Bugesera

Ubu busabe abaturiye ishyamba rya Gisirikare rya Gako, riherereye mu Karere ka Bugesera impande y’umupaka w’uburundi babutanze nyuma y’uko ubuyobozi bw’intara y’uburasirazuba n’ubw’ingabo, bubujije abaturage kongera gusubira muri iri shyamba, aho ngo uzafatwa azahanwa by’intangarugero.

Mu mpera z’icyumweru gishize, ni bwo ubuyobozi bw’intara y’Iburasirazuba n’ubw’ingabo bwasuye abaturage baturiye ishyamba rya gisirikare rya Gako ndetse n’abaturiye umupaka w’u Burundi, abaturiye ishyamba rya Gako babasaba kutongera na rimwe gusubira muri iri shyamba, kuko ari ishyamba ubusanzwe rya Gisirikare, kandi bigaragara ko hari bamwe mu baturage bakoraga ibikorwa bitari byiza nko gutwika amakara ku buryo byatuma iri shyamba rigabanuka, hakabamo abahiga zimwe mu nyamaswa zibarizwa muri iri shyamba.

By’umwihariko, Umuyobozi w’Ingabo mu Ntara y’Iburasirazuba, avuga ko iki cyemezo kinagamije kurushaho kunoza umutekano, kuko iri shyamba rifatanye n’iryinjira mu gihugu cy’u Burundi; agira ati “murabona bariya baturanyi b’i Burundi nabo bashobora kwinjira bitwaje ko baje gutashya nk’uko namwe muba mubikora, bagahungabanya umutekano tugashiduka bageze kure; byagorana rero gutandukanya umunyarwanda n’umurundi, ibyo rero ntitubishaka muturekere iri shyamba”.

Akomeza avuga ko umuturage uzafatirwa muri iri shyamba rya Gisirikare rya Gako, atazihanganirwa kuko azahanwa ku buryo bwihanukiriye.

Icyemezo cyo guca abaturage mu ishyamba rya Gisirikare rya Gako, ku ruhande rw’abaturage barituriye iki cyemezo bavuga ko bacyakiriye neza, ariko bakagaragaza imbogamizi zo kuba ahanini bajyaga mu ishyamba bagiye gutashya inkwi zo gutekesha, none kuri ubu bakaba basaba ko bafashwa kubona Gaz zo gutekaho, bakishyura igiciro kitabahenze cyangwa bakishyura mu byiciro.

Umuturage w’i Kagasa mu Murenge wa Gashora, agira ati “icyifuzo ni uko mwadufasha tukabona Gaz tukazishyura mu byiciro, kuko mu ishyamba niho twakuraga inkwi zo gutekesha”.

Mugenzi we nawe yungamo ko iki cyemezo ntacyo kibatwaye; “iki cyemezo ntacyo kidutwaye ariko nkatwe tudafite ubushobozi bwo kwishyura Gaz, ubuyobozi nibudufashe butuvuganire ku bacuruza Gaz tubone Gaz zidahenze”

Kuri iki cyifuzo, Umuyobozi w’Akarere ka Bugesera, Richard Mutabazi avuga ko ubuyobozi bw’Akarere bugiye kuvugana n’ama “company” acuruza Gaz, uburyo yakorohereza abaturage batagira imirimo ibaha imishahara y’ukwezi kugira ngo babone Gaz nabo.

Icyemezo cyo kubuza abaturage kujya mu ishyamba rya Gisirikare rya Gako, kije nyuma y’uko hari abaturage bajyaga muri iri shyamba gukoreramo ibikorwa bitandukanye biryangiza, nko gutwika amakara kandi byatuma ryagabanuka mu buso bityo ingabo ntizibone aho zitoreza no guhiga inyamaswa ziririmo.

Leave a Reply

Your email address will not be published. Required fields are marked *

Scroll Up