Koga: Abakinnyi babiri b’Abanyarwanda bagiye gukorera imyitozo mu Burusiya

Irankunda Isiaka (ibumoso) na MANIRAGUHA Eloi bitabiriye imyitozo y’umukino wo koga mu Burusiya

Abakinnyi babiri bakora siporo yo koga (Swimming) ari bo: MANIRAGUHA Eloi na IRANKUNDA Isiaka baraye berekeje mu Burusiya kugira ngo bakorere imyitozo mu kigo (centre) cy’Ishyirahamwe Mpuzamahanga ry’Umukino wo Koga cyitwa “FINA DEVELOPMENT CENTER KAZAN”, iyi myitozo bazayikora mu gihe cy’umwaka umwaka umwe.

Girimbabazi Pamela, Umuyobozi w’Ishyirahamwe ry’Umukino wo Koga mu Rwanda (Rwanda Swimming Federation) mu kiganiro yagiranye n’ikinyamakuru impamba.com ku mugoroba wo kuri uyu wa Gatatu tariki ya 20 Mutarama 2021 mbere y’uko aba bakinnyi berekeza mu Burusiya, yavuze ko batoranyijwe n’Ishyirahamwe Mpuzamahanga ry’Umukino wo Koga (FINA) kubera ibihe bari bafite byiza.

Bamaze kugera ku Kibuga Mpuzamahanga cya Kigali i Kanombe mbere yo kujya mu Burusiya

Pamela yagize, ati “IRANKUNDA Isiaka ni umuhanga mu koga mu buryo bwa “Butterfly style” afite 27′.15″ mu koga metero 50 naho Eloi Maniraguha  ni umuhanga mu koga mu buryo bwa “Freestyle” akora : 26’43” mu koga metero 50”.

Umuyobozi w’Ishyiramwe ry’umukino wo koga mu Rwanda, avuga ko intego yo gushakira aba bakinnyi iyi myitozo izamara umwaka wose ari ukugira ngo iyi siporo irusheho gutera imbere mu Rwanda by’umwihariko ikipe y’Igihugu no gushaka ibihe (minima) bisabwa kugira ngo bitabire amarushanwa mpuzamahanga.

Ubwo Pamela yabazwaga impamvu nta mukobwa witabiriye iriya myitozo yasubije ko batanze lisiti iriho abakinnyi b’abahungu n’abakobwa, ariko Ishyirahamwe Mpuzamahanga ry’Umukino wo Koga (FINA) rihitamo MANIRAGUHA Eloi na IRANKUNDA Isiaka kuko ari bo bari bafite ibihe bibemerera kwitoreza mu kigo cya “FINA DEVELOPMENT CENTER KAZAN” mu Burusiya.

Pamela yagize ati “ku bakobwa rero hariya ni ugusaba bakagira abo batoranya, ubusanzwe bemerera umuntu umwe, FINA yemera gufasha Federasiyo umukinnyi umwe, ubu baduhaye amahirwe batoranya babiri,ariko ni nayo ibahitamo twabahaye abahungu n’abakobwa bihitiramo bariya bahungu”.

Yavuze ko ikindi cyashingiweho ari uburyo abo bakinnyi bitwaye neza mu marushanwa y’amajonjora ya 2019, n’uburyo ibihe byiza aba bakinnyi basanganywe bitigeze bihinduka.

Ikinyamakuru impamba.com cyabajije Girimbabazi Pamela ubutumwa yageneye aba bakinnyi mbere y’uko bahaguruka mu Rwanda, asubiza ati “icyo nabatumye cya mbere ni ukwitwara neza bakagira ibihe  byiza (chrono nziza) irenze iyo bafite ubu ibageza kuri “Minima” icyo gihe ku ruhande rwa Federation cyangwa Igihugu biba bigaragaye ko n’u Rwanda rufite abakinnyi bafite “Minima” muri “Swimming””.

Bimwe mu byo Ishyirahamwe ry’Umukino wo Koga mu Rwanda ryiteze kuri abo bakinnyi nyuma y’iyo myitozo ni ukuzamura ikipe y’Igihugu, ikindi nibitwara neza hari amahirwe yo guha umutoza w’Umunyarwanda amahugurwa nawe akazajya ajya gutoza abakinnyi mu bindi bigo bikomeye bitoza umukino wo koga.

Maniraguha Eloi yakunze kwitabira amarushanwa akomeye ku rwego rw’Isi

MANIRAGUHA Eloi na IRANKUNDA Isiaka basanzwe ari abakinnyi bakomeye mu mukino wo koga kuko bakunze no guserukira u Rwanda mu marushanwa atandukanye y’umukino wo koga.

IRANKUNDA Isiaka witoreza i Rubavu
Girimbabazi Pamela, Perezida wa RSF nyuma yo gutorwa muri 2020 yasuye amakipe yose y’umukino wo koga yo mu Rwanda

Leave a Reply

Your email address will not be published. Required fields are marked *

Scroll Up