Trump niwe Perezida wa Amerika uciye agahigo ko gutakarizwa icyizere

Donald Trump Perezida wa Leta Zunze Ubumwe za Amerika watakarijwe icyizere (ifoto*Internet)

Donald Trump Perezida wa Leta Zunze Ubumwe za America yaterewe icyizere n’Inteko Ishinga Amategeko ku nshuro ya kabiri, ni we wa mbere mu Mateka ya America bibayeho kuri manda imwe. Ubu harakurikiraho iki? Kuri we bimutwaye iki?

Abadepite ba America batoye ku bwiganze bemeza ko Donald Trump atakarizwa icyizere nka Perezida kubera gushishikariza imyigaragambyo, nyuma y’uko ikivunge cy’abantu kigabije Ingoro y’Inteko ishinga Amategeko yitwa Capitol bagahungabanya inteko y’Abadepite n’Abasenateri (Congress) yari iteranye yemeza ko Joe Biden ari we watsinze amatora ya Perezida.

Biriya bikorwa by’imyigaragambyo byabereye kuri Capitol ku wa 6 Mutarama 2021 byaguyemo abantu 5.

Ku wa Gatatu nimugoroba, Abadepite 232 batoye bemeza ko Donald Trump atakarijwe icyizere kuri 197 babyanze.

Harakurikiraho iki?

Inyandiko iriho icyemezo cyafashwe n’Abadepite ko Perezida Trump atakarijwe icyizere irashyikirizwa Sena, uru rwego ni rwo ruzicara rukareba niba Perezida Trump afite uruhare mu byo ashinjwa.

Hakenewe ko bibiri bya gatatu (2/3) by’Abasenateri bazatora bemeza uruhare rwa Donald Trump mu byabaye, Sena yiganjemo abo mu ishyaka rya Republicans rya Trump ishobora kudashyigikira icyemezo cy’Abadepite, hakaba hakenewe Aba-Republicans 17 ngo gitsinde.

Ku wa Kabiri w’iki Cyumweru ikinyamakuru New York Times cyatangaje ko Abasenateri 20 bo mu ishyaka rya Trump bazatora bashyigikira ko takarizwa icyizere.

 

Kuri Trump bimutwaye iki?

Igihe Sena izatora yemeza ko Donald Trump ahamwan’ibyo aregwa byatumye atakarizwa icyizere, Abadepite bazongera bicare batore itegeko ribuza Donald Trump kongera kwiyamamariza kuyobora America nk’uko yabiteganyije mu matora azaba mu 2024 nk’uko ikinyamakuru Umuseke dukesha iyi nkuru kibitangaza.

BBC ivuga ko igikorwa cy’urubanza muri Sena kitazaba muri iyi minsi mike Trump asigaje mu biro, dore ko azabisohokamo ku wa 20 Mutarama 2021 akabisigira Joe Biden.

Hari Senateri w’umu- Republican witwa Marjorie Taylor Greene wo muri Leta ya Georgia, watangaje ko na we azajyana ikirego cyo GUTAKARIZA ICYIZERE Perezida mushya Joe Biden ku munsi uzakurikira kurahirira kuyobora igihugu, amushinja gukoresha nabi ubutegetsi.

Nta Perezida wa America urakurwa mu biro binyuze mu nzira zo gutakarizwa icyizere.

Perezida Donald Trump yatakirijwe icyizere n’Abadepite mu 2019 ashinjwa kugira imishinga idasobanutse mu gihugu cya Ukraine, gusa nyuma Sena yavumugize umwere ku byo yaregwaga.

Abandi ba Perezida bagiye batakarizwa icyizere barimo Bill Clinton mu 1998 na Andrew Johnson mu 1868.

BBC

Leave a Reply

Your email address will not be published. Required fields are marked *

Scroll Up