Handball: Imikino y’Umunsi w’Intwari niyo izabimburira indi muri 2021

U R Huye yatwaye igikombe cy’umunsi w’Intwari cya 2020 mu bagore

Mu bikorwa Ishyirahamwe rya Handball mu Rwanda (FERWAHAND) riteganya bizaba umwaka utaha, bizabimburirwa n’imikino y’umunsi w’Intwari izaba tariki ya 31 Mutarama kugeza ku ya 2 Gashyantare 2021.

Iyi mikino ikazaba bitewe n’uko icyorezo cya COVID-19 kizaba gihagaze mu gihugu, cyangwa se ikazaba hubahirizwa amabwiriza yo kwirinda Coronavirus.

Imikino ya Handball y’umunsi w’Intwari iba buri mwaka muri Gashyantare, mu rwego rwo gukangurira urubyiruko kugera ikirenge mu cy’intwari zitangiye u Rwanda, imikino ya 2020 yakiniwe ku Mulindi w’Intwari, mu bagabo igikombe cyatwawe na Police Handball Club naho mu bagore gitwarwa na UR Huye.

Ku mukino wa nyuma Police Handball Club yatsinze APR ku bitego 40 kuri 35 na ho mu bagore U R Huye yatsinze U R Rukara ku bitego 21 kuri 18.

Minisiteri ya Siporo yasohoye amabwiriza y’uko hari imikino igomba gusubukurwa, ariko hubahirizwa amabwiriza yo kwirinda COVID-19 harimo kubanza gupimisha abakinnyi, muri iyo mikino yemerewe na Handball irimo.

Ikinyamakuru impamba.com cyifuje kumenya amakipe amaze gupimisha abakinnyi bayo kugira ngo atangire imyitozo, cyegera Ngarambe Jean Paul Umunyamabanga Mukuru w’Ishyirahamwe rya Handball mu Rwanda, avuga ko ikipe ya Polisi ariyo gusa yashoboye gupimisha abakinnyi bayo COVID-19.

Ngarambe Jean Paul Umunyamabanga Mukuru w’Ishyirahamwe rya Handball mu Rwanda

Ikipe ya Polisi ikaba ari na yo izaserukira u Rwanda mu mikino y’aka Karere (ECHAF) izabera muri Kenya tariki ya 21 kugeza 27 Werurwe 2021.

Umunyamabanga Mukuru wa FERWAHAND avuga ko andi makipe bahanze amaso bizeye ko azagaruka mu marushanwa vuba ari amakipe yo mu bigo by’amashuri yisumbuye na za Kaminuza. Avuga ko nyuma yo kumenya amakipe yo mu mashuri yisumbuye azagaruka mu marushanwa ari bwo hazarebwa niba shampiyona igomba gutangira yagize ati “icyo amabwiriza azaba yemeza ni cyo kizakorwa kugira ngo dushobore gukina”.

Mbere y’uko COVID-19 igera mu Rwanda muri Werurwe 2020, hari haratangiye shampiyona ya Handball mu bagabo no mu bagore, ndetse habaye n’irushanwa ngarukamwaka ry’umunsi w’intwari, nyuma y’aho hagiye haba amahugurwa hakoreshejwe ikoranabuhanga mu rwego rwo kwirinda icyorezo cya Coronavirus.

Utabarutse Theogene Perezida wa FERWAHAND ashimira ikipe ya UR Huye yatwaye igikombe
Police Handball Club yatwaye igikombe cy’umunsi w’intwari cya 2020

Leave a Reply

Your email address will not be published. Required fields are marked *

Scroll Up