Sina Gerard aremeza ko ikipe ye y’abasiganwa ku maguru ihagaze neza

Sina Gerard arishimira urwego ikipe ye igezeho

Nyuma y’aho ikipe ya Sina Gerard y’abasiganwa ku maguru (Sina Gerard Athletics Club) yaje ku mwanya wa kabiri muri shampiyona y’Igihugu y’Imikino ngororamubiri, aratangaza ko ikipe ye ihagaze neza kuko ayitaho ndetse akaba azakomeza guharanira ko iza mu myanya y’imbere mu Rwanda no mu mahanga kuko ari yo ntego yihaye.

Ubwo yabazwaga uko abona ikipe ye kuko ikiri nshya yasubije ko ihagaze neza, agira ati “ikipe ihagaze neza nk’uko Abanyarwanda babibona kuko ku rwego rw’Igihugu yabaye iya kabiri kuko yacyuye imidari 20 n’igikombe, icyo bimbwiye ni uko icyo ninjiyemo mba nshaka kunoza umurimo kandi nkaba nzi ko kigomba kugirira Abanyarwanda akamaro”.

Yavuze ko muri Sina Gerard Athletics Club harimo abana biga, abakuru bakora akazi byose akaba abikora mu rwego rwo kurwanya ubukene n’ubushomeri.

Sina Gerard avuga ko nawe iyo abona ko ikipe ye iri gutsinda bimushimisha.

Ubwo yabazwaga ku bakinnyi bashya yazanye mu ikipe ye yasubije ati “ikidushishikaje ni ugukomeza kunogera Abanyarwanda iyo babona abana babo bajya kurushanwa bagafata indege bakajya mu marushanwa bagatsinda bibagirira umumaro natwe bikatugirira umumaro n’Igihugu muri rusange niyo ntego”.

Sina Gerard avuga ko azakomeza kuzana abakinnyi bashya mu ikipe ye nk’uko no mu ishuri rye rya Fondation Sina Gerard nyuma y’umwaka hazamo abanyeshuri bashya.

Ubu mu ikipe ya Sina Gerard Athletic Club harimo abakinnyi bamenyekanye mu yandi makipe barimo: Myasiro Jean Marie Vianney ari nawe kapiteni wayo wamenyekanye mu ikipe ya Mountain Classic Athletics Club, Aunorine wamenyekanye mu ikipe ya New Athletics Star (NAS), Manirafasha Primien wakiniye ikipe ya Kamonyi no mu Butaliyani n’abandi.

Myasiro Jean Marie Vianney ashyira umukono ku masezerano yo gukinira Sina Gerard Athletics Club

Aba bakiyongeraho na Kanyabugoyi Anicet wari usanzwe ari umutoza wa NAS uzwiho kuzamura abakinnyi b’imikino ngororamubiri bakamenyekana ku rwego rw’Igihugu no ku rwego mpuzamahanga.

Andi mafoto

Sina Gerard wahanze imirimo

Abakinnyi ba Sina nyuma yo gutwara igikombe akanyamuneza kari kose
Sina Gerard Athletics Club

Leave a Reply

Your email address will not be published. Required fields are marked *

Scroll Up