Gbagbo wayoboye Cote d’Ivoire yahawe ibyangombwa by’inzira

Laurent Gbagbo wabaye Perezida wa Cote d’Ivoire

Laurent Gbagbo wabaye Perezida wa Cote d’Ivoire yahawe ibyangombwa by’inzira bimwemerera gutaha mu gihugu cye. Yabaga mu Bubiligi nyuma yo kugirwa umwere ku byaha by’intambara yashinjwaga n’Urukiko Mpuzamahanga Mpanabyaha.

Gbagbo wabonye pasiporo ihabwa abadipolomate yavuze ko azataha mu kwezi gutaha.

Uyu mugabo yavuze ko ari ikimenyetso cy’ubwiyunge gikozwe na Perezida wamusimbuye, Alassane Ouattara, wahanganye bikomeye n’abatavuga rumwe na we kugira ngo atsindire manda ya gatatu itavugwaho rumwe.

Gbagbo ntiyavuze ibyo ateganya gukora naramuka ageze mu gihugu ke, ariko kuba azaba ahari bizaminjira agafu ku batavuga rumwe na Leta banze kwitabira amatora aheruka.

Yafashe ubutegetsi mu mwaka wa 2000 ageza mu 2011 ubwo yatabwaga muri yombi yanze kwemera ko yatsinzwe na Ouattara, icyo gihe imidugararo yavutse mu gihugu cye.

Mu matora aheruka muri Cote d’Ivoire yari yagaragaje ko ashaka guhangana na Perezida Ouattara ariko ntiyahabwa ibyangombwa by’inzira byatuma ava i Burayi ndetse na kandidatire ye ntiyemerwa ku mpamvu z’uko inkiko z’imbere mu gihugu zamuhamije ibyaha byo gukoresha nabi amafaranga ya Banki y’Igihugu mu gihe k’intambara.

Kuri uyu wa Gatanu amaze kubona ibyangombwa by’inzira, Umunyamategeko umuhagarariye witwa Habiba Toure, yavuze ko Gbagbo azatahuka mu mpera z’uyu mwaka.

Uriya munyamategeko yagize ati “Gbagbo yakiriye neza icyemezo cy’ubuyobozi buriho muri Cote d’Ivoire, arakibona nk’ubushake bwo kugarura umutuzo mu gihugu.”

Perezida w’Ubufaransa Emmanuel Macron yari yasabye Perezida Ouattara mu kwezi gushize ko areka abatavuga rumwe bakisanzura barimo na Laurent Gbagbo.

Muri Mutarama 2019 Urukiko Mpuzamahanga Mpanabyaha rw’i Lahe rwagize umwere Gbagbo ku byaha by’intambara yaregwaga byakozwe mu ntambara yaguyemo abarenga 3,000.

Source/Umuseke

Leave a Reply

Your email address will not be published. Required fields are marked *

Scroll Up