Komite Olempike: Ni iki cyihishe inyuma y’inama y’iminsi itatu yatumiwemo abakinnyi bose bitabiriye Imikino Olempike?

Ambasaderi Munyabagisha Valens umuyobozi wa Komite Olempike y’u Rwanda ni uku yifotoreje muri Australia

Ku nshuro ya mbere Komite Olempike y’u Rwanda (CNOSR) yatumiye abakinnyi baserukiye u Rwanda mu mikino Olempike (0lympiens) mu nama y’ihuriro ry’abakinnyi baturuka mu mashyirahamwe 25, gusa kuko ari inama itari isanzwe ndetse isa n’itunguranye haribazwa ikiyihishe inyuma.

Iyi nama izamara iminsi itatu nk’uko ikinyamakuru impamba.com kibikesha ubutumire bwatanzwe na Komite Olempike y’u Rwanda, ikazabera muri imwe mu mahoteli yo ku Kimironko ku wa 19 kugeza 21 Ugushyingo 2020.

Bimwe mu byo iryo huriro ry’abakinnyi rigamije harimo: Gusobanurira abakinnyi inshingano n’ibikorwa bya komisiyo y’abakinnyi muri Komite Olempike, gusobanurirwa Programu za Solidarité Olympike zigenewe abakinnyi, ikindi iyo nama igamije ni uburyo abakinnyi bagomba kwirinda imiti yongera imbaraga kuko itemewe muri siporo.

Ubusesenguzi kuri iyi nama

  1. Iyo bamwe mu bayobozi ba Komite Olempike manda yabo igiye kurangira batangira kwibuka bimwe mu byo birengagije

Ubwo Amb.Munyabagisha Valens muri 2017 yiyamamarizaga kuba Perezida wa Komite Olempike y’u Rwanda, yavuze ko umuntu wese wabaye mu buyobozi bwa Komite Olempike cyangwa se umukinnyi wahesheje Igihugu ishema azagira ijambo muri Komite Olempike,ariko nta byo yakoze nk’uko bigaragarira buri muntu wakurikiye imiyoborere ye,  ubu ikibazwa ni uburyo abo bakinnyi batekerejweho mu gihe habura byibura amezi ane ngo manda ye irangire habe andi matora, niba afitiwe icyizere agume ku buyobozi cyangwa se niba abanyamuryango banenga imikorere ye batore undi. Si Amb.Munyabagisha gusa waba ukoresheje iyo turufu kuko n’abamubanjirije bari bagifite inyota yo kuguma ku buyobozi bwa Komite Olempike iyo ngeso yabagaragayeho nk’uko ikinyamakuru impamba.com kizabigarukaho mu bundi busesenguzi.

  1. Komite Olempike ngo nta kindi igamije ni ukugira ngo ibone uko izatanga raporo

Komite Olempike igira ingengo y’imari iri hejuru, ariko amafaranga yayo menshi ashirira mu nama kuruta kubona ibikorwa bya siporo. Bamwe mu bakurikiranira hafi ibibera muri Komite Olempike iyobowe na Amb.Munyabagisha Valens baremeza ko iyo nama igenewe abakinnyi muri rusange harimo n’abitabiriye imikino Olempike nta kindi igamije usibye kugira ngo amafaranga asohoke haboneke uko raporo izatangwa muri Solidarité Olempike. Ikindi waheraho uvuga ko ari ukugira ngo amafaranga asohoke ni uko ibizaganirwaho ari bike ariko bikazakorwa mu minsi myinshi, aho abo bakinnyi bazaba bazishyurirwa buri kintu muri Olympic Hotel ndetse bamwe bakazanayicumbikirwamo.

Biracyaza……

One Comment

  • John

    Impamba
    Biraboneka ko iyi ari harrassment kuri Munyabagisha na Comitè ye. Ayo amakuru niwowe wenyine uragira? Mbega ibinyoma…hahaaa iyi program si iya SO. Biraboneka ko utazi uti mu amatiku gusa. Ukomeza.

Leave a Reply

Your email address will not be published. Required fields are marked *

Scroll Up