Gitega: Menya ibyaranze isozwa ry’ukwezi k’Ubumwe n’Ubwiyunge

Mu Murenge wa Gitega mu gusoza ukwezi k’Ubumwe n’Ubwiyunge ni uku byari bimeze

Kuri uyu wa Gatanu tariki ya 30 Ukwakira 2020, nibwo mu Murenge wa Gitega, mu Karere ka Nyarugenge, Umujyi wa Kigali, hasojwe ukwezi k’Ubumwe n’Ubwiyunge, uyu munsi waranzwe no gutanga ibiganiro ndetse no gutanga igiti cy’amahoro kizahingwa mu midugudu itandukanye ndetse no kumurika Icyicaro cy’Amahoro kizajya gifasha abantu mu biganiro bigamije kwiyunga.

Munyankindi Alphonse, Perezida w’Ihuriro ry’Ubumwe n’Ubwiyunge mu Murenge wa Gitega, akaba na Perezida w’Inama Njyanama y’Umurenge wa Gitega yatangarije ikinyamakuru impamba.com ko mu kwezi k’Ubumwe n’Ubwiyunge bakoze ibikorwa binyuranye birimo gukora amahuriro y’ubumwe n’ubwiyunge, gutanga ibiganiro bya Ndi Umunyarwanda mu nzego zitandukanye harimo abakozi b’Umujyi wa Kigali bakorera mu Murenge wa Gitega no mu Tugari twawo, mu bacuruzi, mu bafundi no mu nzego z’umutekano zihakorera.

Ibindi byakozwe ni ugushaka Abarinzi b’Igihango, gukora ubukangurambaga bihereye mu rwego rw’Utugari kuzamura kugera mu Murenge no guhuza abaturage bari bafitanye amakimbirane.

Hagaragaye Intebe (Icyicaro cy’Amahoro) abantu bazajya bicaraho bagiye kwiyunga

Munyankindi Alphonse Perezida w’Inama Njyanama y’Umurenge wa Gitega

Munyankindi na none yatanze ibisobanuro ku ntebe  yagaragaye ku munsi wo gusoza ukwezi k’Ubumwe n’Ubwiyunge mu Murenge wa Gitega, ati “ibindi bikorwa mwabonye ni ibi byo gutegura, ese nyuma yo gusoza ukwezi k’Ubumwe n’Ubwiyunge, ese n’iki kindi cyakorwa kugira ngo igikorwa cy’Ubumwe n’Ubwunge ntikirangirire ahangaha kuko ni inzira ndende, nibwo rero mubonye izi ntebe twashyize hano aho abantu bazaza bakiyunga bafitanye amakimbirane ndetse n’igiti twatanze abantu bagomba kwiyibutsa ko bagomba kumenya ko inzira y’ubwiyunge igomba gukomeza”.

Umuyobozi wa Njyanama y’Umurenge wa Gitega yasobanuye ku buryo burambuye ibijyanye n’ibiti byatanzwe, ati “iki giti gisobanuye ko uko gishora imizi kirambura amashami n’amababi biravuga ko inzira y’Ubumwe n’Ubwiyunge twatangiye ni inzira izakomeza izagenda ikaguka guhera mu midugudu hasi, abaturage bari muri iyi midugudu bagaharanira kwiyunga, bagaharanira amahoro hagati yabo”.

Iyo ntebe, yavuze ko igenewe abantu bose bafitanye amakimbirane ndetse na buri muntu ushaka kwiyunga na mugenzi we nubwo yaba atari umuturage wo mu Murenge wa Gitega.

Impamvu ibiganiro by’Ubumwe n’Ubwiyunge ari ngombwa nyuma y’imyaka 26

Ndayishimiye Ernest umwe mu batanze ikiganiro ku bumwe n’ubwiyunge, imbere ye hari n’intebe z’icyicaro cy’amahoro

Ndayishimiye Ernest  bita Ruhashya umuhanzi wamenyekanye cyane mu ndirimbo zo kwibuka Jenoside yakorewe Abatutsi, ariko utuye mu Murenge wa Gitega yavuze ko nubwo hashize imyaka 26 mu Rwanda habaye Jenoside yakorewe Abatutsi mu mwaka wa 1994 ko ibiganiro by’Ubumwe n’Ubwiyunge bitagomba guhagarara.

Ndayishimiye yagize ati “dukurikije amateka twabayemo tunakomeza kubona uyu mwanya, turasanga afite imyaka irenga mirongo, igihugu cyacu kugira ngo kibe ari igihugu uyu mwanya gifite imyaka 26 yonyine kigaruwe mu kuba igihugu, rero kwigishwa Ubumwe n’Ubwiyunge ni ngombwa kuko ingengabitekerezo iba yarubatswe igamije gusenya ubwo bumwe kandi iyo turebye muri za 24  itorero ry’Igihugu rijya gusenywa, ryasenywe n’ibi byose bijya kuvaho kuko byose ni inkingi za mwamba zagiye zigenderamo burya, ubwo rero bagomba gukomeza kugenda bigishwa, hari abafunzwe, abarangije ibihano n’abagikomeje ibihano, ariko hari n’imiryango yabuze abayo, iyo miryango ntabwo wafata intimba iminsi mike uyiteruremo, hari  n’uriya ufite ikimwaro wumva icyaha yakoze, hakaba n’ugitsimbaraye ku kibi. Ni ukwigisha kugira ngo ukomeze urebe ko wadahamo icyo kibi kandi tugomba kubana nk’Abanyarwanda, kubana kwacu bigomba kuzamukana n’inyigisho nzima, ubumwe n’ubwiyunge ni ngombwa cyane”.

Ukwezi kw’Ubumwe n’Ubwiyunge gusigiye iki abaturage ba Gitega

Uzamukunda Anathalie Umunyamabanga Nshingwabikorwa w’Umurenge wa Gitega

Uzamukunda Nathalie Umunyamabanga Nshingwabikorwa w’Umurenge wa Gitega avuga ko muri uku kwezi k’Ubumwe n’Ubwiyunge kwasize ubukangurambaga bunyuranye mu kwibutsa abaturage gahunda ya Ndi Umunyarwanda, kuvugurura ihuriro ry’Ubumwe n’Ubwiyunge mu Mudugudu yagize ati “ihuriro ry’Ubumwe n’Ubwiyunge ry’Umudugudu ryibukijwe inshingano zaryo”.

Kuba hari abantu bagize uruhare muri Jenoside bagiye kurangiza ibihano bakaba bagiye kugaruka muri sosiyete, uyu muyobozi yavuze uko biteguye kubakira ati “ahangaha icyo dukora ni ukumenya niba abantu batashye kugira ngo umuryango Nyarwanda wongere ubakire dore ko bashobora no gutaha bafite n’ibibazo binyuranye hari ibibazo by’imiryango yabo bwite ndetse n’ibibazo byihariye by’abo biciye muri Jenoside yakorewe Abatutsi, niyo mpamvu twashyizeho iki cyicaro cy’amahoro aho abantu bazicara bakaganira, uwarokotse Jenoside yakorewe Abatutsi, uwangirijwe imitungo, abantu bakicara bakaganira, usaba imbabazi akazisaba uzitanga nawe akabohoka agatanga imbabazi”.

Uzamukunda yavuze ko igiti batanze, gisobanura ko abaturage nyuma yo kugira Ihuriro ry’Ubumwe n’Ubwiyunge mu Midugudu bagomba kugira imidugudu itekanye, izira amacakubiri, yimakaje Ubwiyunge n’Ubumwe mu bagize ihuriro bose.

Andi mafoto

Abaturage bakurikiye ijambo ry’Umunyamabanga Nshingwabikorwa w’Umurenge wa Gitega
Abaturage berekanye ko bishimiye ubutumwa bagejejweho
Munyankindi Alphonse Perezida wa Njyanama y’Umurenge wa Gitega yashyikirije umuturage igiti azatera mu Mudugudu
Nyuma yo guhabwa Igiti bafashe ifoto y’urwibutso
Ubutumwa bw’uwo munsi ni aha bwari bwanditse

Leave a Reply

Your email address will not be published. Required fields are marked *

Scroll Up