Nyabugogo: Bombori bombori muri Koperative y’abacuruza telefone, abanyereje umutungo bagiye gukurikiranwa

Kubwimana Razaro Perezida wa mbere na Niyonsenga Paul Perezida wa kabiri wa Light Business Cooperative icuruza telefone

Muri “Light Business Cooperative”, haravugwa inyerezwa ry’umutungo w’abacururizamo telefone ziganjemo izakoreshejwe (occasion), ubu umwuka akaba atari mwiza muri bamwe mu banyamuryango b’iyi koperative ikorera i Nyabugogo ahazwi nko mu Mashyirahamwe.

Kucyumweru tariki ya 25 Ukwakira 2020 nibwo abakozi b’Ikigo cy’Igihugu Gishinzwe Amakoperative (RCA) batangarije abanyamuryango ba “Light Business Cooperative” ibyo bakuye mu igenzura (audit) ry’imikoreshereze y’umutungo, aho bavuze ko basanze amafaranga atagaragaza icyo yakoreshejwe agera kuri miliyoni 13 zirengaho make.

Bamwe mu banyamuryango ba “Light Business Cooperative” bavuganye n’abanyamakuru kuri uyu wa mbere tariki ya 26 Ukwakira 2020, bavuze ko mu igenzura bakoze basanze uwahoze ari Perezida w’iyi Koperative yabo, muri izo miliyoni 13 zaburiwe irengero uwahoze ari Perezida wabo Kubwimana Razaro abarwaho agera muri miliyoni 7 zirengaho make kuko hari n’amafaranga yigeneraga atemejwe n’abanyamuryango, andi asigaye akaba ari ku mutwe w’abandi bari bafatanyije kuyobora.

Kubwimana Razaro wayoboye iyi Koperative (Light Business Cooperative) wagize n’uruhare mu kuyishinga ntiyemeye ibiri muri raporo yatanzwe n’abakozi ba RCA bishinja komite ye kunyereza umutungo kuko atigeze ahabwa umwanya ngo yisobanure.

Kubwimana yavuze ko nyuma yo kwimukira aho iyi koperative ikorera i Nyabugogo yamaze igihe kinini arwaye, ati “nafashwe n’uburwayi komite irabimenya, abanyamuryango barabimenya ndetse ndatekereza ko RCA iza mu bugenzuzi bwayo bwa mbere bambyukije ndwaye maze igihe kinini, nta mutekano nta buzima buri “stable” mfite, ubwo rero niho hatangiye “audit” batangira “audit” umunsi wa mbere hanyuma ku munsi wa kabiri uburwayi burongera buranzahaza, icyiciro cya kabiri cyakurikiyeho cya “audit” cyabaye ntahari komite irabizi ndetse n’abakozi ba RCA baje kugenzura narabahamagaye mbabwira y’uko narwaye ndetse n’impapuro zo kwa muganga ndazifite, icyiciro cya kabiri cyabaye ndahari mbwira komite “ikavaringe” “situation” ya Koperative, ibindeba babimbaze wenda kuri telefone, ariko ibibareba mugerageze kubisobanura neza”.

Kubwimana avuga ko icyamutangaje ari uko “audit” yari irangiye yiteguye ko azahabwa raporo y’agateganyo ngo nk’uko amategeko abiteganya yayitegereje arayibura ndetse atelefona abaje kubagenzura ntibamuha iyo raporo y’agateganyo, nyuma atangazwa no kwakira telefone ya bamwe mu banyamuryango ba “Light Business Cooperative” bamubwira ibikubiye muri raporo bagejejweho n’abakozi ba RCA.

Ikijyanye n’amafaranga ibihumbi magana abiri yahabwaga nayo akaba abarwa mu yanyerejwe, Kubwimana yemeye ko yayahabwaga, ariko yaremejwe n’abanyamuryango, yagize ati “ibyo bihumbi magana abiri narabihabwaga koko kandi nabihabwaga mbikwiriye, impamvu mvuga ko nabihabwaga mbikwiriye ni uko n’abanyamuryango babonaga mbikwiriye ahubwo babona ko ari make, ariko si n’ibihumbi magana abiri kuko byageze aho barayakatura biba ibihumbi ijana na cumi (110,000Frs) ,baravuga “dukurikije intambwe tumaze gutera yego warakoze reka tube tugize ijana na cumi n’ubundi koperative ntigena imishahara y’abayobozi turaba tukugeneye ibihumbi ijana na cumi”.

Kubwimana Razaro Perezida wa mbere wa Light Business Cooperative

Razaro avuga ko ayo mafaranga yagenerwaga yemejwe n’Inteko Rusange ndetse n’inyandiko yayo ikaba ihari, ati “ayo mafaranga kari agahimbazamusyi ntabwo wari umushahara”.

Niyonsenga Paul, wasimbuye Kubwimana Razaro ku mwanya wa Perezida wa “Light Business Cooperative” yavuze ko biteguye kugaruza umutungo wanyerejwe, yagize ati “nk’uko biri muri raporo amafaranga yose yanyerejwe agomba kugaruka”.

Niyonsenga avuga ko muri Komite uwo bashinja kunyereza umutungo atari perezida gusa, ati “ntabwo ari Perezida wenyine harimo n’abo bakoranaga kuko ntabwo yakoraga wenyine nabo hari amafaranga abagaragaraho nabo tuzabakurikirana bayadusubirize kuri konte”.

Uyu muyobozi avuga ko RCA ikimara kumurika ibyo yakuye mu bugenzuzi, bamwe mu bo muri komite yasimbuye basabye ko bagirana ibiganiro bakazajya bishyura mu byiciro amafaranga bashinjwa yagize ati “tubabwira y’uko ibiganiro bitakwinjirwamo na komite yonyine kuko umutungo ni uw’abaturage rusange ibyo ngibyo byazavugirwa mu nama ubusabe bwabo bwakumvwa bikaba byagenderwaho, ariko ubuyobozi bw’Umurenge wa Kimisagara bwatubwiye ko bwiteguye kudufasha kugira ngo ibyanyerejwe bigaruke kuri Konte”.

Niyonsenga Paul Perezida mushya wa Light Business Cooperative

Amakuru agera ku kinyamakuru impamba.com avuga ko nyuma y’aho abakozi b’Ikigo cy’Igihugu cy’Amakperative (RCA) cyashyize ahagaragara ibikubiye mu byo bakuye muri raporo y’imikoreshereze y’umutungo, ubu muri iyi koperative harimo umwuka mubi, aho bamwe bari ku ruhande rwa Kubwimana Razaro ikindi kikaba ku ruhande rwa Niyonsenga Paul ndetse ngo na komite yose ikaba itumvikana nawe muri iyi minsi, nayo akaba ari inkuru ikinyamakuru impamba.com kigicukumbura.

Bamwe mu banyamuryango b’iyi Koperative baje mu nama yo kumva imyanzuro ya Audit yakozwe na RCA
RCA itangaza raporo y’imikoreshereze y’umutungo wa Light Business Coperative

Leave a Reply

Your email address will not be published. Required fields are marked *

Scroll Up