Ku Isi habonetse umubare munini w’ubwandu bwa COVID-19

Corona Virus ni indwara ihangayikishije abantuye Isi

Umubare w’ubwandu bushya bwa Coronavirus bwabonetse mu masaha 24 ashize, ni abantu ibihumbi 260.000 ni bwo bwa mbere habonetse ubwandu bwinshi ku munsi umwe kuva iki cyorezo cyibasira Isi.

Ibihugu byagaragayemo abantu benshi banduye iki cyorezo kuri uyu wa Gatandatu ni Leta Zunze Ubumwe za Amerika, Brésil, u Buhinde na Afurika y’Epfo. Ni mu gihe umubare w’impfu nshya zabonetse na wo wazamutse ukagera ku 7360, benshi kuva ku itariki ya 10 Gicurasi 2020.

Ku Isi harabarurwa abantu miliyoni 14,4 banduye iki cyorezo kuva cyagaragara, mu gihe abapfuye bo ari 604.963.

Ibihugu bitanu byibasiwe cyane

Leta Zunze Ubumwe za Amerika: Ifite ubwandu 3.833.271 mu gihe abapfuye ari 142.877

Brésil ubwandu ni 2.075.246 mu gihe abapfuye ari 78.817

U Buhinde ubwandu ni 1.077.864 mu gihe abapfuye bo ari 26.828

U Burusiya bufite ubwandu 765.437 mu gihe abapfuye bo ari 12.247

Afurika y’Epfo ifite ubwandu 350.879 mu gihe abapfuye ari 4948.

Mu Rwanda

Abanduye ni 1539 (Barimo 54 bashya)

Abakize ni 819 (Barimo 8 bashya)

Abakirwaye ni 715

Abantu batanu bitabye Imana

  • Ibipimo bimaze gufatwa ni 207 022 (Birimo 3232 bishya).

Kuri iki Cyumweru tariki ya 19 Nyakanga 2020 Minisiteri y’Ubuzima (MINISANTE)  yatangaje abarwayi bashya babonetse mu Rwanda ari 43 naho abakize akaba ari 15.

Kuva umurwayi wa mbere wa COVID-19 iterwa n’agakoko ka Coronavirus agaragaye mu Rwanda ku wa 14 Werurwe 2020, abantu 1539 bamaze kuyisanganwa , muri bo 819 barakize, 715 baracyitabwaho kwa muganga mu gihe batanu bitabye Imana.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Source: Muhabura.rw

Source: Muhabura.rw

Leave a Reply

Your email address will not be published. Required fields are marked *

Scroll Up