Abari bizeye ko guhera kuri uyu wa Mbere tariki ya 1 Kamena 2020 bakora ingendo zo mu Ntara abandi biteguye gutega Moto, ntibigishobotse mu buryo bwatunguye benshi.
Ibiro bya Ministre w’Intebe ku mugoroba wo kuri iki Cyumweru ni bwo byasohoye itangazo kuri Tweeter nyuma y’ubusesenguzi bwakozwe rigaragaza ko iby’igendo zo mu ntara no kureka moto zigakora byabaye bihagaritswe.
Iryo tangazo rigira riti “Nyuma y’isesengura, ingendo hagati y’intara zitandukanye, hagati y’intara n’Umujyi wa Kigali hamwe na moto zitwara abagenzi biracyabujijwe mu rwego rwo kurengera ubuzima bw’abaturage. Ingamba nshya zo kurwanya Covid-19 zizatangazwa n’Inama y’Abaminisitiri yo ku wa 2 Kamena 2020.”
Ukurikije ibiganiro byiriwe ku mbuga nkoranyambaga no ku maradio, iri tangazo ryatunguye benshi ndetse kuko nta bisobanuro bindi biriherekeje bamwe mu bari bateguye ingendo zabo baryumvise bararanye agahinda.
Nyuma y’aho icyorezo cya Coronavirus kigereye mu Rwanda ingendo zijya mu zindi Ntara ndetse na Moto zahise zihagarikwa mu rwego rwo kwirinda ikwirakwira ry’iki cyorezo.
Kuri iki Cyumweru tariki ya 31 Gicurasi 2020 habonetse abarwayi ba Coronavirus 11, abakize ni 6, mu Rwanda iyi ndwara ikaba imaze guhitana umuntu umwe waje aturutse muri Tanzaniya.
