Isesengura: ARJ yatoranyije abanyamakuru 60 ikurikije iki?

Ubu igikomeje kwibazwa n’abanyamakuru bamwe na bamwe ni ukumenya icyo Ishyirahamwe ry’abanyamakuru mu Rwanda (ARJ) ryagendeyeho rihitamo abanyamakuru 60 bagomba gufashwa kugera ku makuru ku nkunga ya UNICEF kugira ngo batare inkuru ku cyorezo cya Coronavirus (COVID19) kuko basanga byarakozwe mu bwiru ndetse hashingirwa ku mpamvu nabo batazi.

Mbere y’uko iri sesengurwa rikorwa, kuri uyu Mbere tariki ya 20 Mata 2020 saa yine n’iminota 57 umunyamakuru yabajije Gonzaga Muganwa Umunyamabanga Nshingwabikorwa wa ARJ icyashingiweho mu guhitamo abo banyamakuru 60 ariko ntabwo yigeze asubiza ndetse n’inshuro yahamagawe mu masaha ya nimugoroba ntiyigeze afata telephone.

Ariko se koko mu guhitamo abo banyamakuru hashingiwe kuki?

Kuri uyu wa Mbere tariki ya 20 Mata 2020 nibwo hamwe ku mbuga nkoranyambaga hiriwe hacicikana urutonde ruriho abanyamakuru 57 batoranyijwe n’Ishyirahamwe ry’Abanyamakuru mu Rwanda (ARJ) kugira ngo bazajye batangaza inkuru ku cyorezo cya COVID19, ariko kuko nta muyobozi wo muri ARJ washoboye kunsobanurira icyakurikijwe mu guhitamo abo banyamakuru reka mvuge ibyo nabonye kuri izo mbuga nkoranyambaga, dore uko byanditse nta jambo na rimwe mpinduyemo n’ibitumvikana ntimubinshinje kuko sinjye wabiteguye biteye bitya “NOTE

Aba banyamakuru batanzwe n’ibinyamakuru byabo

Abahuguwe kuri Ebola bahawe inda ya bukuru aho bishoboka

Hagendewe kandi ku bafite icyangombwa cyo gukora Itangazamakuru”.

Ibikomeje kwibazwa

Bamwe mu banyamakuru bigenga mu Rwanda ibitangazamakuru byabo bitatoranyijwe muri ibyo binyamakuru baribaza ibibazo byinshi:

1. Ese kuki byagizwe ubwiru?
2. Ese niba baragendeye ku binyamakuru bifite ibyangombwa ko hari ibibifite kuki byo batabyandikiye babisaba umunyamakuru?

Abanyamakuru batoranyijwe bahawe amafaranga angahe?

Biravugwa ko muri abo banyamakuru batoranyijwe buri umwe yagiye agenerwa amafaranga ibihumbi 20 ku nkuru imwe, ku nkuru enye zizabanza kwandikwa ubwo buri umwe ni amafaranga y’u Rwanda ibihumbi mirongo inani (80,000Frs).

Ese abanyamakuru bakorera ibitangazamakuru bya Leta na bo bagombaga kuba mu binyamakuru ARJ igomba gufasha muri ibi bihe?

Guhera tariki ya 25 Werurwe 2020 nibwo bamwe mu banyamakuru bigenga batangiye kwandika ku mbuga nkoranyambaga zabo ko muri ibi bihe byo kuguma mu rugo kubera icyorezo cya COVID19 bakwiriye gufashwa bityo ko nihatagira igikorwa bamwe bazahasiga ubuzima kuko n’ubundi umwuga wabo usanzwemo ikibazo cy’amikoro.Nyuma hari n’ibindi binyamakuru birimo impamba.com, Rwanda Inspirer n’ibindi byakoze inkuru bigaragaza ko iminsi 14 yongereweho yo kuguma mu rugo itazorohera bimwe mu bitangazamakuru byigenga, nyuma n’ibitangazamakuru mu Rwanda bifatwa nk’ibikomeye na byo byagaragaje ko bimaze ukwezi bikora ariko nta cyo byinjiza kuko aho byakuraga amafaranga mu bantu bamamaza ibikorwa byabo none ubu bakaba batamamaza bityo nabo basaba ko Leta yabagoboka, ariko igitangaje ni uko yaba bimwe mu bitangazamakuru byigenga bimaze iminsi bitaka ubukene ndetse n’Abikigo cy’Igihugu cy’Itangazamakuru (RBA) bose bari kuri iyo lisiti imwe ARJ yatoranyije ndetse bikavugwa ko n’ubushobozi bahawe bungana.

Abatoranyije abo banyamakuru 60 baranengwa kugendera ku marangamutima

Hari umwe mu bayobozi b’igitangazamakuru wahamagawe ngo nawe ashyirwe ku rutonde rw’abagomba gufashwa na ARJ, amaze kwerekana ko afite ibyangombwa byose by’itangazamakuru nyuma abwirwa ko itangazamakuru akora ritizewe, ubwo aba akuwe kuri liste gutyo.

Ese birakwiye ko muri iki gihe habamo kuvangura bamwe mu banyamakuru mu kubaha ubufasha kugira ngo akazi kabo gakomeze?

Muri ibi bihe bidasanzwe Leta mu gufasha abaturage bayo bagizweho ingaruka n’icyorezo cya COVID19 ntabwo habayeho gutoranya, mu ikubitiro bahereye ku baturage babaye kurusha abandi, nyuma hafashwa buri muntu waryaga ari uko yakoze uwo munsi, none ndibaza nti “ese abo banyamakuru ARJ yatoranyije ni uko ari bo iki cyorezo cyagizeho ingaruka kurusha abandi?” Ariko kuko ARJ itashatse gutangariza umunyamakuru icyo yashingiyeho, iki reka mbe nkiretse niyumva ari ngombwa izambwira icyo yashingiyeho kuko guhabwa amakuru ni uburenganzira bwa buri muturage.

Ese ARJ ni Ishyirahamwe ry’abanyamakuru bose bo mu Rwanda cyangwa ni irya bamwe?

ARJ ari ryo Shyirahamwe ry’Abanyamakuru mu Rwanda n’ubu hari abanyamakuru bataryiyumvamo atari uko badashaka kuribamo ahubwo ari uko batabyemererwa, hari ibitangazamakuru bifite ibyangombwa byose ariko bitaratumirwa mu gikorwa na kimwe ARJ yateguye, ibi bigatuma nibaza nti “Ese ARJ ni Ishyirahamwe ry’abanyamakuru bose cyangwa ni irya bamwe? Bamwe mu banyamakuru bahezwa mu bikorwa bya ARJ bibaza ikibazo kigira kiti “Ko tubona RMC iduha amakarita nk’abanyamwuga mu itangazamakuru kuki ARJ yo itatwemera, ese niko yubatse cyangwa ni umuntu ubikora ku giti cye bikaba byakwitirirwa urwego?”

Icyifuzo

Ndasoza nsaba ko niba koko ARJ ifata ba nyir’ibinyamakuru nk’abashoramari, mu gihe ibona ko ibitangazamakuru byose bifite ibyangombwa bitafashirizwa rimwe cyangwa se bikorwe mu byiciro, babireka no mu bihe nk’ibi buri kimwe kikirwariza kuko iyo hatoranyijwe bamwe abandi bakabareka ntihabeho no gusobanura icyashingiweho bituma habaho kwibaza byinshi. Abanyamakuru bamwe ntibari bazi ko n’urwo rutonde rwakozwe ahubwo babimenye bivugiwe kuri Radio Rwanda ubwo Solange Yanone, Visi Perezida wa ARJ yabazwaga icyo bari gufasha abanyamakuru asubiza ko hari 60 batoranyijwe.

Ibi ni ibitekerezo byanjye n’ibya bamwe dusangiye umwuga undi nawe ufite uko abibona nawe ntahejwe.

Urutonde rw’abanyamakuru bivugwa ko ARJ yatoranyije n’ibitangazamakuru bakorera

UNICEF – ARJ CAMPAIGN AGAINST #COVID19

LIST OF MEDIA & JOURNALISTS

1. The New Times Nasra Bishumba
2. IGIHE Philbert Girinema
3. Royal FM Manzi Gato
4. RTV Ingabire Egidie Bibio
5. RTV Divin Uwayo
6. Radio Rwanda Mwanafunzi Ismael
7. Radio 10 Oswald Mutuyeyezu
8. Radio 10 Ramesh Nkusi
9. TV1 Gakayire Raymond
10. Flash TV Theo Barasa
11. TV 10 Juventine Muragijemariya
12. Isango Star Uwe Hervé
13. City Radio Olive Iragena
14. Kiss FM Antoinette Niyongira
15. Radio Inkoramutima Habimana Pascal
16. Umucyo Radio Mujyanama Samuel
17. Radio Salus Aline Nyampinga
18. Voice of Hope Radio Habimana Celestin
19. Energy Radio Robert Sympatique Iyandemye
20. Radio Maria Vestine Mukaryumugabe
21. Ishingiro Desiré Bizimana
22. Isangano Byavu Rachel
23. Imvaho Nshya Ntawitonda Jean Claude
24. Inyarwanda Gedeon Ndayishimiye
25. Ukwezi ManirakizaTheogene
26. Kigali Today Jean Claude Munyantore
27. Voice of Africa Aisha Bonaventure
28. Mama Urwa Gasabo Mutesi Scovia
29. Bwiza Meckiore Kayiranga
30. Panorama Anthere Rwanyange
31. Intyoza Munyaneza Théogène
32. Umuryango Hakuzwumuremyi Joseph
33. The Source Post Ntakirutimana Deus
34. Value News Umuhire Valentin
35. Isimbi Murungi Sabin
36. Rwandanziza Charles Ndushabandi
37. Kigali Post Nizeyimana Selemani
38. Express News Mike Urinzwenimana
39. Bridge Magazine Elias Nizeyimana
40. Hobe Rwanda Magazine Kayitare Jean Bosco (Kaikai)
41. BTV Tuyambaze Gad
42. Rushyashya Burasa Jean Gualbert
43. DW-Africa Link Alex Ngarambe
44. Rwanda Tribune Umukobwa Aisha
45. Family TV Bihoyiki Kevin
46. M28Investigates Byansi Samuel Baker
47. Intego Uwizeyimana Louise
48. ITV/Radio 1 Bryson Bichwa
49. Iriba News Emma Marie Umurerwa
50. Radio Izuba Nkurunziza Theoneste
51. Umuyoboro Bihibindi Nuhu
52. Child Focus Dushimimana Marie Anne
53. Nonaha Mugaragu Naomi Irakoze
54. Ijabo Uhagaze Alphonse
55. KTPress Williams Buningwire
56. Huguka Aimable Uwizeyimana
57. Umuseke.rw Nzeyimana Jean Pierre or Martin Niyonkuru.