Bamporiki yavuze uburyo muri RPF-Inkotanyi harimo abahimbira abandi ibinyoma bagamije kubatega imitego

Bamporiki Eduard afata ijambo

Ibi, Bamporiki Eduard, umunyamuryango wa RPF-Inkotanyi, akaba n’umunyamabanga wa leta muri Minisiteri y’Urubyiruko n’Umuco, yabivugiye mu Nama Nkuru ya 14 y’Umuryango wa FPR Inkotanyi, yateraniye i Rusororo mu Karere ka Gasabo, mu nzu ya Intare Arena.

Bamporiki ubusanzwe azwiho kumenya kuvuga no gutambutsa igitekerezo ke, akabikora adaciye ku ruhande kugeza avuze n’ibyo abantu benshi batatinyuka cyane nk’iyo akomoje ku kibazo cy’amoko abenshi batinya. Uyu mugabo si umuntu urya iminwa mu kugaragaza igitekerezo ke, bamwe bakabimukundira abandi bakabimwangira. Bamwe bakamufata nk’ubatoneka, abandi bakamufata nk’ubavura.

Kumenya kuvuga ashira amanga ni byo byamuhesheje kumenyekana kugeza agiriwe ikizere na RPF, azamuka mu ntera mu buryo bukomeye kandi bwihuse, kugeza ageze ku mwanya w’ubunyamabanga bwa leta ariho ubu. Afata ijambo rye mu nama nkuru y’umuryango FPR, yari iyobowe na ‘Chairman’ wayo, Perezida Paul Kagame, yasasiye igitekerezo ke abanza gushimira RPF yamugiriye ikizere ku myanya itandukanye yagiye ahabwa nko kuba Umudepite, kuyobora Itorero ry’ Igihugu n’umwanya ariho ubu w’Ubunyamabanga bwa Leta.

Bamporiki muri icyo gitekerezo yatunguye benshi mu ruhame ahangara kuvuga ibintu bikomeye abanyamuryango batajya bavugaho kandi babifite mu mitima yabo rimwe na rimwe bavuga basa n’abanegura, bijujuta kubera ibigenda bibabaho byo kwisobanura buri gihe ku birego barezwe babeshyerwa. Umuntu yahamya ko ibyo Bamporiki yavuze byaba ari ukuri 100% kuko bigaragazwa n’amashyi menshi yahawe n’abanyamuryango bari mu nama ubwo yatangaga icyo gitekerezo.

Ibyo byo guhora abantu bisobanura ku birego by’ibinyoma ni byo Bamporiki yise gusimbuka imitego!

Bamporiki asobanura iki kibazo yerekanye ko abanyamuryango babeshyera bagenzi babo mu Bunyamabanga Bukuru bwa FPR, ibinyoma byambaye ubusa, maze aho gufata umwanya wo gukorera igihugu ugasanga buri munsi uhugiye mu kwisobanura ku bintu utarota gukora mu buzima bwawe. Ibyo birego bitunguranye, bikagutera gushoberwa ukabura ibyo uvuga maze uwo wisobanuraho akaba yakeka ko ibyo uregwa ari ukuri.

Yagize ati ” Nyakubahwa Chairman, abanyamuryango bari hano buri wese umuhaye mikoro yakubwira iby’imitego yagiye asimbuka yisobanura ku binyoma”.

Nta muntu Bamporiki yigeze atunga urutoki yisobanuyeho cyangwa wamureze ibinyoma, yagaragaje gusa ko bihari mu muryango kandi ko bihabanye n indangagaciro umuryango wubakiyeho.

Ntawamenya niba we ku giti ke byaba byaramubayeho cyangwa niba yaravugiraga abandi. Gusa kubera ubukana yabivuganye birashoboka ko koko aregwa bityo akagenda asimbuka iyo mitego bamutega y’ibinyoma. Hari n’ubundi buryo wareberamo iki kibazo nko kuba yatumwa n’umuryango kubivuga, umaze kubona ko koko iki kibazo gihari kugira ngo bibe uburyo bwo kukivugaho no kwiyama abanyamuryango babikora kugira ngo babicikeho.

Ibyo byose ariko nta kibihamya! Biramutse ari byo koko kuko zitukwamo nkuru cyaba ikibazo kitapfa korohera Ubunyamabanga bw’Umuryango kuko aribwo bwaba bwatunzwe urutoki, ukibaza impamvu butarenganura abarengana no kudaca intege ibirego bya hato na hato. Ibyo Bamporiki yavuze, asa n’unenga ubwo buryo bw’imikorere yiriza abantu mu matiku n’ibinyoma bituma habaho idindira ry’umurimo. Aho muragira ngo ni ku barezwe gusa batakaza umwanya w akazi? Oya da, n’abahora basobanuza ubwabo batakaza igihe maze washyira hamwe ugasanga igihugu cyatakaje igihe mu bitacyubaka. Bavuga ko ‘igihe ari amafaranga’, ugitakaza aba ayatakaje bikaba byafatwa na byo nk’ubundi buryo bwo gusesagura no kunyereza ibya leta.

Ngarutse ku magambo akomeye ya Bamporiki yakoze ku mutima abatari bake, ni uko iyo urebye bamwe mu bahunze harimo n’abarwanya leta haba harimo abahuye n’ako karengane bakabura ubatabara. Aha hakaba hakenewe kuvugurura imikorere ku buryo ibyo kurenganya abandi byahoshwa. Ndasanga byemewe byakorwa mu buryo bubiri; gukurikiranira hafi no kumenya abo byagizeho ingaruka bakarenganurwa no guhana bikomeye abagize uruhare muri ako karengane ( baba abakomeye, abo mu nzego z’iperereza, abo mu bunyamabanga bwa FPR n’abandi). Ibi bikozwe bishobora kuzamura ikizere abanyamuryango bagirira FPR.

Byigeze guhwihwiswa cyangwa bivugwa ko nyakwigendera Inyumba Aloysia iki kibazo yari yaragiteye imboni ku buryo yari yaratangiye gukora ibiganiro na bamwe mu barenganyijwe muri ubwo buryo, ariko yaje kwitaba Imana hakemutse mbarwa. Ibi rero ni gahunda ikwiriye gukomeza kuko igamije kubaka umuryango nyarwanda. Abahemukiye igihugu nabo bakaba bakwihana babisabira imbabazi, abarenganye bo bakaba barenganurwa bityo bagafatanya n abandi mu kubaka urwababyaye haba imbere y igihugu cyangwa hanze yacyo.

Source: Bwiza.com

Leave a Reply

Your email address will not be published. Required fields are marked *

Scroll Up