Mu Bubiligi: Hagaragajwe ko Neretse yabaye umufatanyacyaha muri Jenoside

Neretse Fabien ukurikiranyweho kugira uruhare muri Jenoside yakorewe Abatutsi (Ifoto/Internet)

Ubwunganizi bw’abatanze ikirego bwavuze  ku byagaragajwe mu myanzuro y’abunganira uregwa (Ari we Neretse Fabien ukomeje kuburanira mu Bubiligi) , banenze iperereza ko ryakozwe nabi.

Abatanze ikirego bakavuga ko urubanza rutagarukira ku iperereza ryakozwe ko ariyo mpamvu abatangabuhamya bongeye kubazwa. Mme Martine Beckers yavuzwe cyane n’ubwunganizi bwa Neretse kuba yarivanze mu iperereza aho yavuganaga kenshi n’abarikoze.

Ubwunganizi bw’abatanze ikirego buvuga ko byari mu nshingano ze nk’umuntu watanze ikirego ( tariki 26 /07/1994) ko igihe yaboneraga amakuru mashya mashya yagombaga kuyageza ku bakora iperereza. Kuba kandi ryaratinze, aho ryamaze imyaka isaga 18, abatanze ikirego basanga atari Beckers waritindije ahubwo ari Neretse .

Kumenya aho yari aherereye byaragoranye ndetse no guhindura izina bitera urujijo mu kumukurikirana.

Mu myanzuro ya nyuma abunganira uregwa basobanuriye inteko y’inyangamugayo ko mu kirego cy’ubushinjacyaha nta cyaha cya Jenoside basanzemo ( Nyamirambo bavuga guhamagara abasirikare, Mataba bakavuga  gutwara Mpendwanzi  bikamuviramo urufu , no kuba imbunda z’abakozi be zarakoreshejwe bica Nzamwita, kandi hagamijwe kumaraho itsinda  ry’abantu runaka .

Abunganira abatanze ikirego basobanura ko n’ubwo Neretse nta muntu yiyiciye, ko ariwe watangaga amabwiriza kuri abo bakozi be , kubafasha mu myitozo, kubagaburira no kubacumbikira.

Umushinjacyaha mukuru , Arnaud d’Oultrement nawe yagarutse ku gisobanuro cya Jenoside, abibutsa ko  Jenoside yakorewe abatutsi yemejwe na loni ko nta kuyijyaho impaka.

Asobanura ibikorwa bigize icyaha cya Jenoside  anifashisha imyanzuro imwe yagiye ifatwa n’urukiko mpanabyaha rwashyiriwe u Rwanda. Umushinjaycha yanasobanuye ko ntaho ubushinjacyaha bubogamiye , buhagarariye ubutabera muri rusange, ko muri uru rubanza rwa Neretse harimo abatangabuhamya 59 bamushinjura ko hari abandi batahamagawe uregwa yifuzaga nibatumizwa bose , ko ngo yemerewe 70% by’abo yashakaga , abenshi bangiwe   ngo ntibari barabajijwe mu iperereza.

Ni ukuru dukesha Akimana Latifa umunyamakuru uri mu Bubiligi ku  nkunga ya PAX PRESSE

Leave a Reply

Your email address will not be published. Required fields are marked *

Scroll Up