Ngoma:Abahinzi bakeneye gusobanuririrwa ibijyanye n’ubwishingizi bw’ibihingwa n’amatungo

Bamwe mu baturage ba Ngoma

Abahinzi n’aborozi bo mu Karere ka Ngoma barasaba guhabwa amahugurwa bagahabwa ibisobanuro bihagije ku bwishingizi bw’ibihingwa n’amatungo kugira ngo batangira kubwitabira

Abahinzi bo mu Murenge wa Murama bavuga ko mu Karere ka Ngoma hatangijwe gahunda y’ubwishingizi bw’ibihingwa n’amatungo ariko ko nta bisobanuro bihagije bahaye kugirango basobanukirwe ibijyanye n’ubwishingizi bw’amatungo .

Umwe mu bahinzi utuye mu Kagari ka Gitaraga mu Murenge wa Murama yishimiye ko hagiyeho gahunda yo gutanga ubwishingizi bw’ibihingwa ariko agasaba ko bahabwa amahugurwa bagasobanukirwa neza ubwishingizi uko buzatangwa nuko buzagirira akamaro abahinzi.

Uyu muturage yagize, ati “gutanga ubwishingizi bw’ibihingwa n’amatungo bifite akamaro cyane ariko ntabwo bigeze basobanurira abahinzi uko bizakorwa ndetse n’akamaro bizagirira abahinzi n’abarozi ,tukaba dusaba ko baduha amahugurwa tukamenya ibijyanye n’ubwishingizi kugira ngo tuzabugemo twabanje kumenya icyo buzafasha abahinzi”.

Niyibizi umuhinzi utuye mu Murenge wa Mugesera yabwiye Impamba.com ko abahinzi bifuza ko ubwishingizi bw’amatungo n’ibihingwa bukwiye gutangwa ku myaka yose aho kuba ibigori n’umuceri gusa.

Agira ati “ ubwishingizi bw’ibigori n’umuceli  gusa ni imbogamizi ku bahinzi kuko duhinga ibintu byinshi kandi byangirika bitewe n’amapfa nko mu murenge wacu ndetse na Sake ndetse n’indi duturanye hari abahinzi bahinga ibihingwa birimo imboga n’imbuto bishobora guhomba igihe twabuze imvura cyangwa yaguye ari nyinshi bakwiye gutekereza ku bihingwa byose aho kwibanda ku bihingwa bibiri gusa kandi urebye ibigori byo bishobora guhingwa nka rimwe mu mwaka ubundi tugahinga ibishyimbo ariko byo bikaba bitemerewe ubwishingizi.”

Umuyobozi w’Akarere ka Ngoma Wungirije Ushinzwe Ubukungu n’iterambere ari we Mapambano Nyiridandi  yijeje abahinzi ko basobanurirwa ubwishingizi bw’amatungo n’ibihingwa  kugira ngo abahinzi n’aborozi babwitabire ari benshi.

Yagize ati “Ubwishingizi bw’ibihingwa n’amatungo bwaratangiye ku rwego rw’akarere byabereye mu Murenge wa Murama hatumizwa abashinzwe ubuhinzi mu muirenge yose n’amakoperative yose ndetse hari n’abahinzi hamwe n’aborozi ntangarugero,icyo gikorwa cyo kubasobanurira kizakomeza mu mirenge yabo kandi turizera ko bizatanga umusaruro kuko dufite abahinzi n’aborozi barenga 90% by’abaturage batuye muri Ngoma ,ni gahunda twitezeho ko bazitabira ari benshi kuko hari Ibiza bijya byangiza imyaka yabo n’indwara zijya ziza zigatuma bagira igihombo kandi bashoye amafaranga menshi kandi ubwishingizi bashyireweho na Leta babufitemo inyungu tukaba tunasaba abaturage kubwitabira kuko na Leta ibatangira nkunganire .“

Umuyobozi w’Akarere ka Ngoma Wungirije Ushinzwe Ubukungu n’iterambere ari we Mapambano Nyiridandi

Kuwa  27 Ugushyingo 2019  umukozi  ushinzwe ubwishingizi muri Minisiteri y’ubuhinzi (MINAGRI) ari we  Niyonshuti Lambert yavuze ko ibihingwa byatangiriweho mu gutanga ubwishingizi bw’ibihingwa batangiriye ku bihingwa bibiri ariko ko ibindi bihingwa nabyo bizagerwaho.

Leave a Reply

Your email address will not be published. Required fields are marked *

Scroll Up