NPC Rwanda: Ikipe y’Igihugu yagiye mu Buyapani ititeguye gukina umukino n’umwe

Ikipe y’Igihugu ya Sitting Volleyball igiye kurira indege ngo yerekeze mu Buyapani

Ikipe y’Igihugu y’abagore ya Sitting Volleyball yagiye mu Buyapani bamwe bazi ko igiyeyo gukina imikino ya gishuti mu rwego rwo kwitegura imikino Paralempike izabera i Tokyo 2020, ariko birangira bimenyekanye ko abakinnyi bagiyeyo kugira ngo bamenye icyo gihugu no gutsura umubano.

Uru rugendo rw’ikipe y’Igihugu ya Sitting Volleyball rwagizwe ibanga kuko nta kinyamakuru na kimwe cyo mu Rwanda ubuyobozi bwa NPC Rwanda bwigeze butangariza ibijyanye n’uko iyo kipe yagiye mu Buyapani, usibye kubibona ku mbuga nkoranyambaga z’abakinnyi ku mafoto bifotorejeyo bishimiye urugendo.

Hashije icyumweru kimwe ikipe y’Igihugu imaze kugera mu Buyapani, ikinyamakuru impamba.com cyabajije umwe mu bakinnyi uriyo, umubare w’imikino ya gishuti bamaze gukina n’amakipe yo mu Buyapani  asubiza ko nta n’umwe.

Byamenyekanye ko ikipe yageze mu Buyapani batangiye gukwirakwiza amafoto yabo ku mbugankoranyambaga bifotorejeyo bameze nk’abamurika imideli bakikije umutoza wabo

Undi muntu ukurikiranira hafi imikorere ya Komite y’Igihugu y’Imikino y’abantu bafite ubumuga (NPC Rwanda) wavuganye n’ikinyamakuru impamba.com yavuze ko urugendo rw’Ikipe y’Igihugu mu Buyapani atavuga ko ari ukujya gukora imyitozo ahubwo ari ubutembere, ati “ubundi kuri gahunda bagombaga kujya mu myitozo mu Buyapani bagomba no gukina imikino ya gishuti n’ikipe y’aho birangira bipfuye ngo baramaze KUBUKINGISHA (Booking) babura uko bahagarika urwo rugendo ibyari imyitozo bihinduka ubutembere”.

Yakomeje agira ati “bazakora imyitozo gusa hanyuma bagaruke wenda batomboye nk’ikipe yabemerera bagakina umukino wa gishuti ariko ubusanzwe bavuye hano byaranze babizi”.

Nzeyimana Umunyamabanga wa NPC avuga  ko Minisiteri ari yo yatumye ikipe ijya mu Buyapani ariko itazakina imikino ya gishuti

Nzeyimana Célestin, Umunyamabanga Nshingwabikorwa wa NPC yatangarije ikinyamakuru impamba.com ko ikipe y’Igihugu ya Sitting Volleyball muri Werurwe 2019 yabonye ubutumire bwo kwitabira imikino y’ibihugu bitanu bikina Sitting Volleyball igomba kubera mu Buyapani, babimenyesha Minisiteri ya Siporo, ariko batungurwa no kubona mu gihe haburaga icyumweru kimwe ngo bajye mu Buyapani babwiwe ko Minisiteri nta mafaranga ifite yo gutanga kuri iyo kipe, bityo bahitamo kugenda kuko Igihugu cy’Ubuyapani cyari cyaramaze kubishyurira itike y’indege.

Nzeyimana yavuze ko Igihugu cy’u Buyapani cyifuje ko abakinnyi bazitabira imikino Paralempike bagomba kubanza kugera muri icyo gihugu kugira ngo bakimenye mbere y’uko imikino Paralempike iba, ku ikipe y’u Rwanda ya Sitting Volleyball Igihugu cy’Ubuyapani cyayitanzeho miliyoni esheshatu z’Amayapani kugira ngo abakinnyi bahakorere imyitozo bamenye n’icyo gihugu, ariko NPC Rwanda yifuza ko nyuma y’iyo myitozo bakwitabira n’amarushanwa arimo ibihugu nka Amerika, Ubuyapani, Uburusiya n’ibindi, ariko birangira kwitabira iyo mikino bidakunze ahubwo abakinnyi bazakora imyitozo hagati yabo gusa.

Amafaranga yari akenewe ku ikipe y’Igihugu ya Sitting Volleyball agera ku bihumbi makumyabiri by’Amadolari (20,000$) yari ayo gutunga ikipe y’Igihugu mu gihe cy’ayo marushanwa agomba kumara iminsi itanu, kuba NPC yari yamaze kwiyandikisha muri ayo marushanwa, hakishyurwa abasifuzi ndetse ikipe igashyirwa ku rutonde rw’uburyo ibihugu bizahura nyuma bikarangira ititabiriye ngo izafatirwa ibihano.

Ubwo yabazwaga impamvu bahisemo kujya mu Buyapani kandi bazi ko nta kipe n’imwe bazakina imikino ya gishuti yasubije ko bagiyeyo kimwe n’uko abakinnyi badafite ubumuga bagiyeyo kandi batagiye gukina imikino ya gishuti kuko ari uko Ubuyapani bwabyifuje ko abakinnyi bazitabira imikino Olempike na Paralempike bagomba kumenya igihugu cyabo mbere y’uko imikino iba.

Nzeyimana yakomeje avuga ko kujya mu Buyapani bazi ko imikino bagombaga kwitabira batakiyitabiriye ntayandi mahitamo bari bafite ati “ntayandi mahitamo yari ahari kuko Ubuyapani bwari bwaramaze kwishyura amatike y’indege, ni amahirwe tubuze twari kuzava mu myitozo tujya muri “Competition”.

Iyo mikino ikipe y’Igihugu ya Sitting Volleyball yagombaga kwitabira igomba gutangira kuri uyu wa Gatatu tariki ya 13 Ugushyingo 2019.

Ibyo kwibaza

  1. Ese ko u Rwanda mu mikino Paralempike rwigeze guserukirwa mu mikino yo gusiganwa ku maguru (Athletics), guterura ibiremereye (Para Powerlifting), ese kuki Ubuyapani bwifuje ko abakinnyi babanza kumenya icyo gihugu, NPC igahitamo gutwara abakinnyi ba Sitting Volleyball gusa?
  2. ESE koko NPC ntiyaba ikomeje kugaragaza ko yahisemo kubogamira ku mukino wa Sitting Volleyball gusa kuko ari wo abayobozi bakina, indi mikino igakomeza gusubizwa inyuma?
Abakinnyi bakigerayo bafashe ifoto y’urwibutso

Leave a Reply

Your email address will not be published. Required fields are marked *

Scroll Up