Rwamagana: Abayobozi ba “Ejo Heza” batawe muri yombi

Ifishi umwu mu baturage wa Rwamagana yishyuriyeho amafaranga

Abashinze umuryango “Ejo Heza Family” wakoreraga mu Murenge wa Kigabiro mu Karere ka Rwamagana  ku buryo butemewe n’amategeko, batawe muri yombi n’Urwego rushinzwe ubugenzacyaha (RIB) bashinjwa kwaka abaturage amafaranga.

Abaturage bavuga ko babwirwaga ko “Ejo heza Family for Charty” abayiyobora n’abakozi bayo bababwiraga ko ibikorwa byayo byemewe na Leta kandi bigamije kubateza imbere bakanabasaba kuzana abandi kugira ngo bahabwe inyungu.

Umuturage utuye mu Murenge wa Kigabiro  yahuye n’umunyamakuru amwereka amafishi 19 yishyuriyeho amafaranga ibihumbi 10 kuri buri fishi yemeza ko yabahaye amafaranga ibihumbi  ijana na mirongo icyenda by’amafaranga y’u Rwanda kugira ngo agire abantu benshi bitume abona inyungu nyinshi ariko ubu akaba afite ibibazo by’ubukene yasigiwe n’abo muri uwo muryango wa Ejo Heza bamwizezaga ko bagiye kumukura mu bukene .

Undi muturage avuga ko bizezwaga ko uwo mushinga ukorana Leta kandi ko urimo abayobozi ndetse n’abapolisi

Uyu muturage wa Rwamagana yagize, ati “Dutanga amafaranga batubwiraga ko uzabasha kuzana abaturage benshi azabona inyungu nyinshi kuko buri fishi y’umuntu uzanye bakubariraga amafaranga ibihumbi bibiri bakanatubwira ko bazajya banamuhemba telefoni zihenze ,twahise dukora uko dushoboye ugatanga amafaranga menshi ukajyana amafishi menshi mu rugo ku buryo twumvaga tugiye kubona amafaranga menshi ,icyatumye tubizera ni uko batubwiraga ko bizwi mu buyobozi bwose ndetse bakatwereka amafoto bari kumwe n’abayobozi hari ingero baduhaga bavuga ko harimo n’abayobozi binjiye muri uwo muryango baduha urugero rw’abapolisi barimo twumva ko bizewe ariko twatunguwe nuko twaje hano kuwa mbere tukababura mu biro ndetse kuva kuwa mbere telefoni zabo ntiziriho.”

Twagerageje kuvugana n’abayobora “Ejo Heza Family for Charity” ntibyadukundira kuko umunyamabanga wayo wavuze ko nta bubasha afite bwo kuvugira uwo muryango .

Ubugenzacyaha bwatangiye iperereza ku bayobozi ba “Ejo Heza Family for Charity” ndetse bamwe muri abo bayobozi  batawe muri yombi  .

Umuvugizi w’ubugenzacyaha RIB, Mbabazi Modeste yemeza ko abayobozi ba “Ejo Heza Family for Charity” bataburiwe irengero ahubwo ko barimo gukurikiranwa n’ubugenzacyaha i Rwamagana ndetse ko abaturage babifitemo inyungu bose bajya gukurikirana dosiye y’abo bayobozi kuri sitation ya Polisi ya Kigabiro .

Leave a Reply

Your email address will not be published. Required fields are marked *

Scroll Up