Kubura Abatekinisiye basana Biogaz byahombeje abaturage na Leta

Bamwe mu baturage bo mu turere dutandukanye bubakiwe biogaz zo gucana mu ngo zabo ku bufatanye na Leta barasaba kugobokwa zikongera gukora, kuko zabahombeye akayabo ndetse na leta ikaba ihahombera.

Umwe muri abo baturage witwa Nsanzabaganwa Emmanuel utuye mu Kagari ka Kampeka mu murenge wa Kamabuye mu Karere ka Bugesera avuga ko yubakiwe Biogaz atanze ibihumbi Magana ane maze Leta nayo imushyiriraho nkunganire ku buryo ifite agaciro k’ibihumbi Magana inani.

Nsanzabaganwa yagize ati “Ariko ubu turi mu gihombo bitewe no kuba zitagikora kuko twabuze abatekinisiye bazikora, ibi byatewe no kuba abakozi bazikurikiranaga umunsi ku munsi batakiri mu kazi, bikaba ari igihombo kuritwe ndetse no ku ruhande rwa Leta bitewe n’amafaranga twazishoyemo”.

Uretse uyu muturage Biogas ye itagikora,  Kuradusenge Jean wo mu Murenge wa Gihundwe mu Karere ka Rusizi nawe avuga ko Biogaz yamufashaga mu rugo cyane mu bikorwa byo guteka nawe yinubira ko itagikora, ati“Banyubakiye Biogaz ifite agaciro k’ibihumbi 750, natanze ibihumbi 250 asigaye leta irayantangira nyuma yaje gupfa, ndeba amafaranga natanze nayo leta yantangiye ngasanga yose yarapfuye ubusa”.

Mbabazi John atuye mu Murenge wa Musheri mu Karere ka Nyagatare avuga ko iki kibazo cyatangiye mu mwaka wa 2015 none kugeza ubu kikaba kitarakemuka ati“iyo tugerageje gushaka umutekinisiye wo ku ruhande aduca amafaranga menshi ndetse wamubaza ibikoresho bisimbura ibyangiritse nabyo akaguca amafaranga menshi ngo abikura i Kigali. Ubu twisubiriye gucana amakara n’inkwi”.

Abatekinisiye bazubakaga bakanazisana barasezerewe

Ku ruhande rwa bamwe mu bayobozi bo mu nzego z’ibanze, bavuga ko koko iki ari igihombo, ngo bakaba bari kubarura izidakora neza kugira ngo zizatangirwe raporo nk’uko bitangazwa na Murenzi Samuel ushinzwe ibidukikije mu Karere ka Bugesera.

Murenzi yagize ati“mbere hari abatekinisiye bari bashinzwe kuzubaka no kuzisana mu gihe zagize ikibazo, aho bahembwaga na Minisiteri ishinzwe ibikorwaremezo (MININFRA), gusa abo bakozi mu rwego rwo kwegera abaturage bakoranaga nabo umunsi ku munsi, baje gushyirwa mu maboko ya Minisiteri y’ubutegetsi bw’igihugu (MINALOC) nyuma amasezerano yabo y’akazi arangiye ntiyongerwa ari bwo zatangiye kugira ibibazo”.

Akomeza avuga ko izo BIOGAZ zahise zishingwa abakozi bashinzwe ubuhinzi, ibidukikije ndetse n’ubutaka mu turere n’imirenge, aba kandi bakaba nta bumenyi bafite bwo gukanika izo BIOGAZ, ibyo bikaba byaratumye nubwo bazishinzwe ariko bahawe ikigo gishinzwe gukwirakwiza amashanyarazi (REG) ngo kijye kibakurikirana.

UWACU Sylvie ashinzwe ibidukikije mu karere ka Bugesera avuga ko REG yagakwiye gushyiramo imbaraga BIOGAZ zikongera gukora, kuko ari nacyo gifite ishami ry’ibicanwa na BIOGAZ irimo.

“Turibaza impamvu amashanyarazi apfa agakorwa vuba nyamara BIOGAZ zo zikaba zidakorwa ndetse ntihanaboneke n’ibikoresho vuba byo kuzisana”.

Umukozi w’akarere ka Rusizi wari ushinzwe ibijyanye na Biogas Imanishimwe Viateur  avuga ko kuri ubu ntakazi bafite, gusa ngo iyo hagize umuturage ubitabaza mubo bakoranaga bumvikana nawe ku bijyanye n’amafaranga hanyuma bakemeranwa bakamusanira ibiba byapfuye.

Ati “ tugikorana n’abaturage nta kibazo Biogaz zagiraga kuko twakoraga ibishoboka byose tukazisana noneho abaturage bakazibyaza umusaruro nk’uko byari biteganyijwe”.

Mu rwego rwo gushaka impamvu abo bakozi bahagaritswe umuyobozi w’akarere ka Rusizi, Kayumba Efrem atangaza ko impamvu bahagaritswe ari uko batari ku rutonde rw’abakozi ba Leta (Organigramme) ati“ igihe Minisiteri ishinzwe abakozi ba Leta yabashyira ku rutonde rw’abakozi ntakabuza basubira mu kazi kuko n’imishahara yabo yashyirwa mu ngengo y’imali y’Akarere”.

REG irimo gukora inyigo  

Umuyobozi w’ishami rishinzwe ibicanwa mu kigo gishinzwe gukwirakwiza amashanyarazi (REG) Oreste Niyonsaba, avuga ko mu gukemura iki kibazo cya BIOGAZ zidakora, iri shami ryifashishije inzobere mu bijyanye na BIOGAZ ziri gukora inyigo igomba kurangira mu kwezi kwa 12 uyu mwaka, nyuma hakazatangazwa ikigomba gukurikiraho mu kunoza umushinga wa BIOGAZ.

Niyonsaba yagize ati “naho ku bijyanye n’abatekinisiye ndetse n’ibikoresho, iki si ikibazo gihangayikishije kuko REG hari abatekinisiye yahuguye bari mu mirenge, ahubwo ndashishikariza abaturage kujya bihutira gutanga raporo ku nzego z’ibanze mu gihe BIOGAZ zagize ikibazo kugira ngo tubahuze n’abo batekinisiye”.

Ku bijyanye n’ibikoresho akaba ashishikariza abacuruzi kubirangura dore ko ibituruka hanze y’igihugu byinjira nta misoro bitanze.

Imibare itangwa na REG igaragaza ko mu musozo w’ingengo y’imari ya 2018-2019, igaragaza ko mu Rwanda hose hari BIOGAZ ibihumbi 10,701 ziri mu ngo, ndetse na 86 ziri mu bigo bitandukanye, gusa izikora n’izidakora imibare yazo ntizwi kuri ubu.

Leave a Reply

Your email address will not be published. Required fields are marked *

Scroll Up