Ntabwo wambwira ngo mbe Perezida w’Abanyarwanda ngo nkwemerere–Ingabire

Ingabire Marie Immaculée Umuyobozi wa Transparency International Rwanda

Mu nama nyunguranabiterezo yahuje abayobozi bo mu nzego z’ibanze mu Ntara y’Iburasirazuba  Madamu Ingabire Marie Immaculée, uyobora Transperancy International ishami ry’u Rwanda yabwiye abayobozi ko kuyobora abaturage batuye Intara y’Iburasirazuba bitoroshye kandi ko bisaba ubunyangamugayo ndetse anatangaza ko atakwemera kuba Perezida w’Abanyarwanda kuko kubayobora bisaba kuba umuntu ari inyangamugayo anasobanutse muri byose  .

Mu mwanya yahawe wo gutanga ibitekerezo mu nama yari igamije gushaka umuti ku bibazo bibangamiye umudendezo w’abaturage, Madamu Ingabire Marie Immaculée yagarutse ku myitwarire y’abayobozi bamwe barangwa n’imikorere mibi  kubera kutubahiriza inshingano no gukemura ibibazo by’abaturage bigatuma abaturage bashaka uburyo batanga ruswa kugira ngo bakemurirwe ibibazo .

Madamu Ingabire Marie Immaculée yanavuze ko hari abayobozi bakingira ikibaba abayobozi bakoze amakosa, ati “Hari ikibazo cya Ruswa ishingiye ku miyoborere idahwitse ,ishingiye ku kuba birengagiza inshingano zabo babizi kandi babishaka rwose, igituma mvuga ko baba babizi banabishaka ni uko babihisha, hari ikibazo cy’abayobozi bakingira ikibaba bagenzi babo kandi turabibona hari na siroga bahimbye ngo nta ntore itanga indi ,hari ikibazo cy’abakuru b’imidugudu baburira abanyabyaha hari igihe inzego z’umutekano zipanga kujya gusaka ibiyobyabwenge umukuru w’umudugudu agafata telefoni akamubwira ati ikirere ntabwo ari cyiza ,ubwo ibiyobyabwenge akabihisha”.

MadamuIngabire yabwiye abayobozi bo mu nzego z’ibanze ko bagomba kuba inyangamugayo kugira ngo bashobore kuyobora Abanyarwanda.

Yagize ati “Iyi ntara ni imwe mu ntara zifite abaturage batoroshye,hari ubwo umuturage aza kukureba wamusobanurira ntakumve bameze nk’abafite kode mu mutwe tuzi ko urwuri rwa Gabiro rukomye ariko twakira abaturage batubwira ko inka zabo zafatiweyo ariko wabasobanurira ntibashake kukumva ,hari undi muturage utuye mu karere ka Gatsibo wambwiye ko adashobora kwitabira inama ngo bamugabanyirije isambu bajye bahamagara abo bahaye isambu,  kugira ngo uyobore umuturage udashobotse umushobore  umushoboza kuba wowe uri intungane.”

Madamu Ingabire Marie Imaculée yanasabye abayobozi gufatira urugero kuri Perezida wa Repubulika akabasha kuyobora Abanyarwanda

Madamu Ingabire yagize ati “Ntabwo umuntu wese yapfa kuyobora Abanyarwanda ,abantu bavuga ngo barashaka kuba Perezida w’u Rwanda ntabwo nzi niba bazi icyo baba bashaka,njyewe ntabwo wambwira ngo mbe perezida w’Abanyarwanda ngo nkwemerere  kuko ntabwo Abanyarwanda tworoshye ,umuntu ushobora kuyobora abanyarwanda ni umwe kuko kuyobora Abanyarwanda bigusaba kuba uri umuntu w’inyangamugayo anasobanutse muri byose , umwe niwe wadushoboye wenyine  namwe bayobozi b’iburasirazuba nimugerageze mufatire kuri urwo rugero rwe.”

Leave a Reply

Your email address will not be published. Required fields are marked *

Scroll Up