Manzi na Djabel bageneye agahimbazamushyi bagenzi babo baruhanye muri Rayon Sports

Manzi Thierry akiri muri Rayon Sports (Ifoto/Internet)

Manzi Thierry wahoze ari kapiteni w’ikipe ya Rayon Sports nyuma akaza kujya muri APR FC, n’uwari umwungirije Manishimwe Djabel barangije kwemerera agahimbazamusyi (prime) abakinnyi batwaranye na Rayon Sports igikombe cya shampiyona giheruka ariko bakaba batakiri kumwe na bo kuri ubu.

Nyuma yo kwegukana igikombe cya shampiyona, ubuyobozi bw’iyi kipe bukaba bwaremereye abakinnyi kubaha agahimbazamusyi kangana n’ibihumbi 500 by’amafaranga y’u Rwanda, gusa na nubu abakinnyi bakaba bagitegereje kuzayahabwa mbere y’uko shampiyona y’umwaka utaha itangira.

Ku ikubitiro, ubuyobozi bwa Rayon Sports bukaba bwari bwatangaje ko bamwe mu bakinnyi bayivuyemo nabi batazabona kuri aya mafaranga barangajwe imbere n’uwari kapiteni wabo Manzi Thierry.

Munyakazi Sadati, Perezida wa Rayon Sports yagize icyo abivugaho ati “Jye sinjya menya guca ibintu ku ruhande. Umukinnyi Manzi Thierry nubwo twamuhaye ibaruwa imurekura tumushimira mukeka ko yahavuye neza? Ako gahimbazamusyi ntabwo yakabonaho. Sefu se we mukeka ko azayabona? Ntabwo bizakunda. Djabel se we mukeka ko tuzayamuha? Oya. Uko niko kuri kwanjye”.

Aha ariko, amakuru agera kuri FunClub  ikinyamakuru impamba.com gikesha iyi nkuru, avuga ko n’abandi bakinnyi batakibarizwa muri Rayon Sports barangije kubwirwa ko bazakurayo amaso kuri biriya bihumbi 500 Rayon Sports yari yemereye abakinnyi nk’agahimbazamusyi.

Ibi bikaba byatumye abari bayoboye aba bakinnyi Manishimwe Djabel na Manzi Thierry bakaba baricaye bemera gukora mu mafaranga yabo aho bageneye uduhimbazamusyi aba bakinnyi bose bavuye muri Rayon Sports buri umwe bakamuha amadorali 250.

Manishimwe Djabel yagize ati “Ntabwo ari ibintu bidasanzwe. Hari bagenzi bacu twaruhanye dutwara igikombe umwaka ushize ariko ntitwabona agahimbazamusyi twemerewe. Hari bamwe twagize amahirwe tubona umusaruro w’imbaraga twataye tubona amakipe ariko hari n’abandi bitagenze neza, Twe twafashe umwanzuro wo gushimira bagenzi bacu batugejeje kuri byose dufite ubu. Abo tuzaha amafaranga ni abatari muri Rayon Sports ubu kuko bo wasanga ikipe izagera aho ikabishyura. Twafashe umwanzuro wo kubaha amadolari 250 buri umwe”.

Abakinnyi bazagenerwa agahimbazamusyi ni abanyezamu Kassim Ndayisaba na Bikorimana Gerrard, Mutsinzi Ange, Mugisha François bakunze kwita Master, Bukuru Christophe, Doncor Prosper, Niyonzima Olivier Sefu, Rafael Jonathan da Silva, Mudeyi Suleyman na Tuyishime Eric Congolais.

Leave a Reply

Your email address will not be published. Required fields are marked *

Scroll Up