ADEPR Gasabo yishyuriye Mitiweli abatishoboye basaga 336

Iki gikorwa cya ADEPR Gasabo cyashimishije benshi

ADEPR Gasabo Paruwase ya ADEPR Mukuyu yishyuriye ubwisungane mu kwivuza (mituelle de santé) abantu 336 bo mu Murenge wa Bumbogo mu Kagari ka Nkuzuzu,iki gikorwa kikaba cyarishimiwe n’ubuyobozi.

Yvonne Banamwana umukozi w’Akarere ka Gasabo ufite mu nshingano ze ubwisungane mu kwivuza (mutuweri) waje uhagarariye ubuyobozi bw’Akarere yagize ati” ADEPR nk’umufatabikorwa uri kwisonga, isanzwe ikora ibikorwa byinshi muri aka karere nko kubaka amashuri,kubaka “Humany security”, kubaka ubwiherero,kubakira abatishoboye inzu, gutanga mituweri, ni yo mpamvu ubutumwa nahawe n’ubuyobozi by’umwihariko kuri ADEPR Gasabo, ari ugushimira ubufatanye bwiza Akarere gafitanye na ADEPR ku gikorwa nk’iki cyo kwishyura miliyoni imwe n’ibihumbi bibiri by’amafaranga y’u Rwanda (1,002,000frw) ku batishoboye 336 bazatangira kwivuza ku wa Kabiri”.

Yvonne Banamwana umukozi w’Akarere waje ahagarariye ubuyobozi bw’Akarere

Yakomeje agira ati “iki gikorwa ni igikorwa cy’indashyikirwa turishimye kandi dushimiye byimazeyo ADEPR GASABO dore ko bifite icyo byongera mu kwesa imihigo cyane ko muri Gasabo umwaka ushize muri mutuweri twari ku mwanya wa 4 kuri 94,2% ariko ubu, turacyari kuri 60,4% .”

Yvonne Banamwana yasabye andi madini gutera ikirenge mu cya ADEPR.

Rev. Rutayisire Pascal uyobora ADEPR Akarere ka Gasabo yatangarije ikinyamakuru impamba.com ko igikorwa cyo gufasha abatishoboye mu buryo bwose biri mu nkingi enye za ADEPR, ati” iki gikorwa twagikoze kandi nkuko byakozwe muri iyi Paruwase ya Mukuyu bizakomeza gukorwa no mu yandi ma Paruwase 19 asigaye”.

Rev. Rutayisire Pascal uyobora ADEPR Akarere ka Gasabo iyi Paruwase ni yo ya mbere yari asuye akagihuriramo n’uwaje ahagarariye inzego z’ibanze.

Rev. Rutayisire yashimiye Korali yitwa “MARAMAZA” yo ku mudugudu wa ADEPR Nkuzuzu,yagize uruhare mu gutanga ubushobozi muri iki gikorwa.

Abayobozi bari aho bafashe ifoto y’urwibutso

Umwe mu bahawe mutuweri waganiriye n’ ikinyamakuru impamba.com utarashatse ko amazina ye atangazwa yagize ati” njye byandenze kuko narimfite abana 5 nanjye n’umugore kandi ariko kwishyura mutuweri byari byarananiye none ADEPR irantabaye ndayishimiye cyane Imana ibahe umugisha.”

Abayobozi bari kumwe na Chorali yitwa MARAMAZA yateguye iki gikorwa

Leave a Reply

Your email address will not be published. Required fields are marked *

Scroll Up