NDUBA: Bizihije Umunsi Mukuru w’Umuganura (menya amateka y’uyu munsi)

Mu byo abana basangiye ku munsi w’Umuganura harimo n’umutsima w’amasaka

Mu Mudugudu wa Ruhetse, Akagari ka Gasanze, Umurenge wa Nduba mu Karere ka Gasabo, abaturage bizihije Umunsi Mukuru w’Umuganura, ikinyamakuru impamba.com cyabateguriye amwe mu mateka y’uyu munsi Mukuru u Rwanda rwizihije tariki ya 2 Kanama 2019.

Musasangohe Providence umunyamabanga nshingwabikorwa w’Umurenge wa Nduba asoma ku ntango

Musasangohe Providence,Umunyamabanga Nshingwabikorwa w’Umurenge wa Nduba mu kiganiro yagiranye n’impamba.com yavuze icyo Umunsi Mukuru w’Umuganura uvuze kuri we ati” kuri njye,umuganura ni Ishusho y’ubumwe bw’Abanyarwanda uko kera bahuraga bagasangira ku byo bejeje nk’ibishimbo, amasaka, amata, kuko babeshwagaho n’ubuhinzi n’ubworozi by’umwihariko umwami yasangiraga n’abenegihugu, umuganura byari ikimenyetso cyo kwishimira umwero ibyo abenegihugu bejeje kandi bakaboneraho n’umwanya wo gufata ingamba”.

RWARAKABIJE Théoneste, Umuyobozi w’ Umudugudu wa Ruhetse wabereyemo ibirori by’Umuganura ku rwego rw’Umurenge wa Nduba,  yagize ati”twifuje gusangiza ab’ubu uko kera byabaga bimeze mu muco nyarwanda”.

RWARAKABIJE yakomeje agira ati “icyari kigamijwe ni ukwigisha no kwimakaza umuco nyarwanda cyane cyane uko byagendaga basaba umugeni kuko muri iki gihe umuco ugenda ucika bityo dutekereza kwereka urubyiruko uko byagendaga basaba umugeni mu bukwe nyarwanda”.

Amateka y’ Umunsi w’ Umuganura

Aimable MBONIMANA watanze ikiganiro yavuze ko Umuganura ari umuco nyarwanda wabayeho kuva kera ku gihe cy’Umwami Gihanga Ngom’ ijana mu kinyejana cya 9 uyu muhango wabaga buri mwaka ukabera i Bwami ukayoborwa n’umwami afatanyije n’abanyamihango b’Umuganura ku rwego rw’umuryango ukayoborwa n’ umukuru w’umuryango kandi ugahabwa agaciro ibwami nu muryango mugari nyarwanda”.

Aimable yakomeje avuga ko ikibabaje ari uko abakoloni bamaze kugera mu Rwanda muri 1925 baciye intege umuhango w’umuganura uza kongera kwizihizwa nyuma y’ ubukoloni u Rwanda rubonye ubwigenge abantu bongera kwizihiza umuganura mu miryango kubera ko ubuyobozi bwariho butahaye agaciro umuganura.

 *Uko bawizihizaga* 

Umuganura wizihizwaga n’amasaka, Abanyarwanda bagashimira imana uburumbuke bw’ umuryango, imyaka n’amatungo yabahaye bakaganuza umwami amata, amasaka n’izindi mbuto nkuru arizo uburo,inzuzi, isogi n’ibindi babaga bejeje.

Umwami niwe watangizaga uyu muhango agafata umwuko akavuga umutsima mu guha agaciro abayobora n’igihugu muri rusange. Hahitaga hakurikiraho ibirori by’imihigo umwami akamurika umusaruro w’Abanyarwanda hakabaho amarushanwa mu duce dutandukanye, hakabaho imbyino gakondo, imitako, inka nziza, imyaka n’ibindi.

 *Muri iki gihe* 

Umuganura warenze imbibi zo kwita ku musaruro w’ubuhinzi n’ubworozi

bigera mu zindi nzego zireba ubuzima n’iterambere ry’Abanyarwanda harimo ubuzima,uburezi, ikoranabuhanga, imikino n’imyidagaduro, ubucukuzi bw’amabuye y’agaciro, inganda, ibikorwaremezo, umuco ubukerarugendo n’ibindi.

Nk’uko byakorwaga kera kwizihiza umuganura ubu bigamije kwishimira umusaruro wagezweho muri izo nzego zose ari nako hafatwa ingamba zo kongera umusaruro.

Insanganyamatsiko ya 2019 y’Umunsi w’Umuganura iragira iti “umuganura isoko y’ubumwe no kwigira”.

Iyi nsanganyamatsiko ikaba ishingiye ku ndangagaciro z’ umuco nyarwanda zijyanye no kwizihiza umuganura arizo ” gukunda igihugu, ubupfura, ubumwe bw’Abanyarwanda no gukunda umurimo”.

Uri hagati ni Umunyamabanga Nshingwabikorwa w’Umurenge wa Nduba
Igisharagati n’Amahema

Leave a Reply

Your email address will not be published. Required fields are marked *

Scroll Up