Umukobwa ushinja “Bosebabireba” kumutera inda no kumutererana yabaye umuhanzi

Ruth arashinja Theo Bosebabireba kumutera inda nyuma akamwihakana

Ruth Muhayimana umukobwa bivugwa ko yatewe inda n’umuhanzi Bosebabireba, nyuma akamwihakana ubu nawe yateye ikirenge mu cye akaba yatangiye kuririmba indirimbo zihimbaza Imana (Gospel).

Mu myaka ibiri ishize nibwo humvikanye amakuru y’uko umuhanzi wa “Gospel” Uwiringiyimana Theogene bita “Bosebabireba” yateye inda umunyeshuri witwa Ruth Muhayimana amushukishije kumufasha,ariko akaza kumwihakana no kumutererana nk’uko byagiye bitangazwa mu bitangazamakuru bitandukanye.

Mu mpera z’iki cyumweru umunyamakuru wa impamba.com, yaganiriye na Ruth Muhayimana washyize Uwiringiyimana Theogene Bosebabireba ku karubanda agira ati”nyuma yo guhura n’ubuzima bukarishye kandi bunashaririye kubera gutereranwa na Bosebabireba Theogene Uwiringiyimana wanteye inda anshukishije ibikoresho by’ishuri bikarangira tubyaranye ariko akaza kunyihakana nkabura ibitunga umwana tukajya turara mu mikoki no mu miferegi y’umuhanda njye n’umwana inzara ikahatwicira iwacu baranyirukanye nkava i Huye nkaza i Kigali, Imana yaradutabaye none turacyariho njye n’umwana wanjye w’umukobwa byanteye kugarukira Imana nyisaba imbabazi nsubira mu Itorero ryanjye ry’Abangilikani”.

Ruth yakomeje agira ati “mu mwuga nkora wo gusuka imisatsi y’abadamu n’abakobwa ku Gisozi nkabona uko mbaho njye n’umwana wanjye, niyumvamo kujya muri Studio, ndishyura ubutumwa bwanjye mbutambutsa mu ndirimbo ebyiri iyitwa “Nibutse ineza Imana yangiriye” iyindi yitwa Mutima wanjye”.

Ruth avuga ko mu butumwa bukubiye muri izi ndirimbo ari ugushimira Imana yamutabaye ubwo yari mu kaga gakomeye ko kwirukanwa iwabo, uwatumye ava mu ishuri akamwihakana ariko nyuma Imana ukamushoboza akaba umukozi wayo.

Ruth arashimira studio yamufashije kugira ngo indirimbo ze zutunganywe ati “Ndashimira Studio yitwa Faith Music record ya Producer Barnabé ikorera ku Gisozi kubwo kunyobora mu ijwi no kuncurangira neza”.

Ruth Muhayimana mu kiniga cyinshi yasabye abana b’abakobwa kwirinda ibishuko bikoma mu nkokora gahunda zabo.

Ruth Muhayimana aravuga ko ataje mu buhanzi kugira ngo ahangane na Theo Bosebabireba wamuteye inda bikamutera guhura n’ubuzima bushaririye.

Ruth avuga ko we n’umwana we ubu bameze neza

Leave a Reply

Your email address will not be published. Required fields are marked *

Scroll Up