Ubusesenguzi: Young Generation ishobora kuba igiye gukora ibyo amadini n’amatorero ya Gikirisitu atakoze

Ev.RURANGWA Denis Uhagarariye gahunda(program) ya UMURAGE Mushya Initiative

Mu minsi ishize,nagiranye ikiganiro na Past Sebanani Christophe na Ev.Rurangwa Denis bagira bati” ntitwumva ukuntu nyuma y’imyaka 5 yose ishize habaye “Declaration” itangajwe n’abayobozi b’amadini n’amatorero  itarashyirwa mu bikorwa,byagaragaye ko ibyo bemereye imbere y’abayobozi b’Igihugu ,abayoboke n’amahanga, bitashyizwe mu bikorwa; dore ko nyuma y’iri tangazo ari bwo mu madini menshi basubiranyemo abandi barafungwa mu madini biradogera.

Past Sebanani Christophe

Mu busesenguzi bwanjye hari ibyo nibajije nshingiye kuri yubire y’imyaka 25 irimo gutegurwa na Young Generation inenga kudashyirwa mu bikorwa ibyo biyemeje.

Tariki 9 Nyakanga 2019, muri “Kigali Convention Centre” hateraniye abayobozi bakuru b’igihugu bagera kuri 2000, abanyamadini, abikorera n’abandi bayobozi bakuru b’igihugu, mu mahugurwa yateguwe n’umuryango PEACE PLAN, ayo mahugurwa atangwa na Pastori Rick Warren, Umuyobozi mukuru w’Itorero rya Saddleback muri Leta Zunze Ubumwe za Amerika.

BAGEMAHE Clement umusesenguzi ku mikorere y’amadini mu Rwanda

Mu ijambo risoza ayo mahugurwa Umukuru w’igihugu, Paul KAGAME yagarutse ku ruhare rw’amadini n’amatorero muri Jenoside yakorewe Abatutsi n’uburyo nta bisubizo birambye ayo madini ari gutanga.

Nk’umunyamakuru mu busesenguzi bwanjye nibajije niba nyuma y’imyaka 25 igisubizo kitazanywe n’abayobozi bakuru b’amadini n’amatorero ari cyo cyaba kizanywe n’urubyaro rwabo (Young Generation) ruri mu murongo wa Gikristo nk’uko babitangaje mu gitangazamakuru kimwe tariki ya 8 Nyakanga 2019.

Murabizi ko igihugu cyacu cyabayemo Jenoside yakorewe Abatutsi mu mwaka 1994, iyo Jenoside iba mu gihugu cyari gifite abaturage bacyo hafi ya bose ari abakristo (96%), byaragoranye kwiyumvisha uburyo igihugu gifite abaturage bafite imyizerere n’imyemerere nk’iyo cyabamo Jenoside.

Iki kibazo ni nacyo cyateye Abayobozi bakuru b’Umuryango wa Gikristu mu Rwanda kwicara iminsi 3 yose kuva tariki 8-11 Kamena 2014 i Musanze bashakira hamwe impamvu zateye ayo mahano angana atyo mu gihugu gifite Abakristu bangana gutyo.

Umwe mu myanzuro yavuye muri uwo  mwiherero bemeranijwe ko batigeze bahindurira Abanyarwanda kuba aba Kristu ahubwo babahinduriye kuba abayoboke babo birangira babaye abakristu ku izina gusa imyaka igera ku 100 nta butumwa bwiza bwa Yesu kristo buhindura abantu kuba abana b’Imana bwigeze bwigishwa ari yo mpamvu amahano nka Jenoside yashobotse ndetse kugeza na n’ubu tukaba  tukibona ibibazo bikomeye bikomoka ku myemerere.

Mu by’ukuri iki gikorwa cyakozwe n’abayobozi bakuru b’amatorero n’amadini ya Gikristo ni icy’ingenzi cyane kuko cya kagombye gutuma umuryango nyarwanda ubasha gusobanukirwa ko ibyo bari barigishijwe bakabiyoboka atari ukuri kuko abakristo b’ukuri badashobora gukora Jenoside.

Iki akaba ari nacyo Nyakubahwa Perezida wa Repubulika yongeye ku garukaho nyuma y’aya mahugurwa avuga ko atiyumvisha nawe uburyo abantu bari bashinzwe kwigisha Abanyarwanda inzira y’Imana ariko byarangiye ari bo babaye abagambanyi n’abicanyi.

“Declaration” imaze imyaka itanu yose ubu bakabaye barerekanye umurongo mushya ufatika utanga icyizere ku banyarwanda nk’uko bari babyiyemeje.

MUSANZE CHURCH LEADERS DECL

Mu myanzuro y’abayobozi b’amatorero muri “Rwanda Shima Imana 2014”, bemereye urubyiruko kugira uruhare mu kugena icyerekezo kibabereye.

Urubyiruko rwa nyuma Jenoside kandi rubarizwa mu muryango wa Gikristo rushingiye ku mateka rwanyuzemo no gushaka kubaka umurage mwiza utandukanye n’uwo barazwe n’ababyeyi babo bashingiye kandi no ku myanzuro y’Abakuru ruvuga ko rwakomeje gushakisha uburyo rwasohoka mu ngaruka rwasigiwe n’ayo mateka rukubaka igihugu cyiza kizira amacakubiri gishingiye ku ijambo ry’Imana.

Bimwe muri ibyo bisubizo birambye byatangajwe n’Umuryango “SHINING FAMILY MINISTRIES” watangijwe n’urungano rwa nyuma ya Jenoside “Young generation” muri gahunda zabo, nk’uko bamaze iminsi babitangaza muri gahunda yabo yitwa “UMURAGE MUSHYA INITIATIVE”mu gushaka igisubizo  kirambye cy’Itorero,  Young Generation  ishobora kuzana igisubizo ku mukoro Nyakubahwa Perezida wa Repubulika yahaye abayobozi b’amadini n’amatorer, Kuko muri iyi gahunda bavuga ko bashaka gusobanurira

bagenzi babo ndetse n’Abanyarwanda muri rusange mu buryo burambuye intandaro y’ibyo bibazo igihugu kimaze igihe kirwana nabyo, ingaruka zabyo ndetse n’umuti wabyo wa burundu.

Muri ibyo bibazo harimo imyumvire ipfuye ikomoka ku myemerere n’imyizerere ishingiye ku buhanuzi bw’ibinyoma, indagu, ubupfumu n’amabonekerwa byakomeje gushegesha  abanyarwanda muri rusange by’umwihariko urubyiruko, ibi bibazo by’imyemerere byakabaye byarakemuwe n’abantu b’Imana.

Bakavuga ko iyi gahunda y’umurage mushya yubakiye ku nkingi 7 zirimo ibikorwa byo mu myaka 25 iri imbere no kurenzaho. Imwe muri izo nkingi 7 ni ugushyira mu bikorwa ingamba zose zafashwe n’abayobozi bakuru b’amadini n’amatorero ya gikristo zikubiye muri “Musanze Declaration”.

Muri iyi yubile y’imyaka 25 irimo gutegurwa n’uyu muryango “Young Generation” abahuzabikorwa bavuga ko ari igikorwa gikomeye mu mateka y’Itorero rya Gikristo mu Rwanda kuko niba urubyiruko rufashe iya mbere rugategura  igikorwa nk’iki gikomeye ariko cyane cyane ruri gushakira Itorero n’igihugu muri rusange ibisubizo by’ejo hazaza ari umugisha ukomeye, bakaba banahamagarira abanyarwanda bose aho bari hose ndetse n’inshuti z’ u Rwanda kwitabira iyi yubire kugira ngo twubake u Rwanda

rurabagirana kuko ni wo murage Uwiteka yaruhaye nk’uko babihamya kandi ubirebye neza

ukabona ari imwe mu nzira Nyakubahwa Perezida wa Repubulika Paul Kagame yasabaga abari bateraniye muri “KCC” tariki ya 9 Nyakanga 2019 muri “Purpose Leadership Gathering”.

Twibuke ko ejo hazaza h’igihugu hari mu biganza by’ababyiruka, mu busesenguzi nakoze

mbona uru rubyiruko rufite intego nziza rwitaweho rukanashyigikirwa muri uyu murongo mwiza bafite, bashobora kuzana impinduka nziza mu murongo w’imyemerere ya Gikristo, idini ndetse n’igihugu muri rusange.

One Comment

Leave a Reply

Your email address will not be published. Required fields are marked *

Scroll Up