Miss Josiane, aherereye he? Ese yaba atwite koko?

Mwiseneza Josiane yakunzwe n’abantu benshi nyuma yo kumva urugendo yakoze n’amaguru aje kwiyamamariza kuba Miss Rwanda

Ku mbuga nkoranyambaga zirimo Youtube hagaragaye amakuru avuga ko Mwiseneza Josiane yaba atwite akaba ariyo mpamvu atakigaragara mu ruhame, gusa ushinzwe guharanira inyungu ze (manager) yabihakanye avuga ko impamvu iri gutuma uyu mukobwa atagaragara muri iyi minsi ari uko ari mu kiruhuko

Mwiseneza w’ imyaka 23 yamamaye kuva yatangira kwiyamamariza kuba Nyampinga w’ u Rwanda wa 2019.

Miss Josiane niwe nyampinga wakunzwe cyane mu irushanwa rya Miss Rwanda 2019, bituma ahabwa ikamba rya Miss Popularity 2019.

Abafana bashingiye ku kuba amaze ibyumweru bibiri atagaragara mu ruhame akaba ataboneka kuri telefone no ku mbuga nkoranyambaga batangira gukeka ko yaba atwite gusa aya makuru manager wa Miss Josiane yayahakanye.

Mu kiganiro “manager” w’uyu mukobwa, Sunday Justin yagiranye na Inyarwanda yavuze ko Miss Mwiseneza Josiane adatwite ahubwo ari mu kiruhuko.

Yagize ati “ Ni ibihuha tuba twabaretse ngo bavuge. Mu by’ukuri impamvu bari gutanga ngo ni uko ataboneka. Ese nkubaze umuntu wese utaboneka aba atwite? Ukuri ni uko Josiane ari mu kiruhuko hashize nk’ibyumweru bibiri. Twabiganiriyeho yaba we, yaba umuryango we twemeza ko akwiye kuruhuka akicara agatuza nta bya telefone cyangwa imbuga nkoranyambaga ikiruhuko nikirangira muzamubona.”.

Sanday ntabwo yatangaje igihe Miss Josiane azamara mu kiruhuko, gusa yavuze ko uku kwezi nikurangira aribwo bazamenya igihe azamara mu kiruhuko nk’uko ikinyamakuru ukwezi.com dukesha iyi nkuru kibitangaza.

 

Leave a Reply

Your email address will not be published. Required fields are marked *

Scroll Up