Mu gitaramo cy’amazina y’inka Bamporiki yagabiye inka Majimaji na Rugemintwaza

Nshimiyumuremyi Justin Umuyobozi wa Iriba ry’Umuco Nyarwanda na Bamporiki bitegereza uko abantu babyinaga mu gitaramo cy’amazina y’inka

Igitaramo cy’amazina y’inka cyabaye ku nshuro ya mbere kuri uyu wa Gatanu tariki ya 31 Gicurasi 2019, Bamporiki Eduard, Umuyobozi wa Komisiyo y’Itorero ry’Igihugu yagabiye inka Nkurunziza wamenyekanye ku izina rya Majimaji na Rugemintwaza.

Iki gitaramo nubwo kitabiriwe n’abantu bake, ariko abari aho wabonaga bahimbawe muri iki gitaramo cyari icy’umuco Nyarwanda, aho ababyinnyi b’Itorero Intayoberana basusurukije abantu, abakirigitananga bongeye kwerekana ubuhanga bwabo, ndetse n’abahanga mu kuvuga amazina y’inka bongera gutarama.

Rugemintwaza na Majimaji bataramiye abantu mu gitaramo cy’amazina y’inka

Bamporiki Eduard mu ijambo yagejeje ku bari aho yagaragaje ko atishimiye kuba haratumiwe abantu benshi, ariko hakaza bake, yemera ko icyo gitaramo azakomeza kugishyigikira ku giti cye, ashimira uburyo igitaramo cyateguwe neza, asoza agabira inka Majimaji na Rugemintwaza bamwe mu bavuze amazina y’inka muri iki gitaramo.

Bamporiki Eduard afata ijambo

Senateri,Uyisenga Charles yashimye abataramye bose, ariko asaba ko ubutaha iki gitaramo kigomba kwitabirwa n’abantu benshi kuko bitumvikana uburyo muri siporo haza abantu benshi ariko mu gitaramo cy’umuco Nyarwanda hakaza bake.

Uyisenga yavuze ko uwo muco wo gutarama Kinyarwanda ugomba kugera no mu mashuri kugira ngo urusheho gusigasirwa.

Nshimiyumuremyi Justin umuyobozi wa “Iriba ry’Umuco Nyarwanda” yatangarije ikinyamakuru impamba.com ko igitaramo cyagenze uko babyifuzaga, ko byabahaye ishusho y’uko igitaramo cy’ubutaha kizagenda.

Umuyobozi w’Iriba ry’Umuco Nyarwanda yagize ati “mu by’ukuri igitaramo uko twabyifuzaga niko byagenze, mu cyifuzo cyacu ni uko iki gitaramo cyajya kiba kabiri mu mwaka, icy’uyu munsi cyatweretse uko icy’ubutaha kizagenda”.

Yashimiye umuyobozi wa Komisiyo y’Igihugu y’Itorero waje akabaha n’impanuro, Senateri Uyisenga Charles wishimiye icyo gitaramo, abahanzi n’Abanyarwanda muri rusange baje kubashyigikira.

Abari aho bari bahimbawe
Abari bicaye mu myanya y’icyubahiro bafataga n’icyo kunywa
Senateri Charles Uyisenga yasabye ko icyo gitaramo ubutaha ko kigomba kwitabirwa
Intayoberana zasusurukije abari aho

Leave a Reply

Your email address will not be published. Required fields are marked *

Scroll Up