Rilima Table Tennis Club ibangamiwe no kubura ibikoresho no gukinira ahantu hato

Abana bakinira Rilima Table Tennis Club ngo aho bakinira ni hato

Ikinyamakuru impamba.com cyasuye ikigo cy’amashuri cya GS Rilima mu Karere ka Bugesera, kimwe mu bibazo abakinnnyi n’abayobozi bakigejejeho, ni ikibazo cy’ibura ry’ibikoresho kugira ngo abana bakomeze gukina umukino wa Table Tennis uko babyifuza.

Tuyikunde Tamari, avuga ko afite intego yo gukina Table Tennis akagera ku rwego rukomeye, ariko ikibazo nyamukuru bafite ari ukubura ibikoresho, aho bakinira ahatari ubwinyagamburiro.

Asifiwe Patience avuga ko intego bafite mu ikipe ya Rilima ya Table Tennis ari ukuzana ibikombe, ariko nubwo nta ho gukinira hisanzuye bafite ariko intego yabo idashobora guhinduka.

Hirwa Kellia yavuze ko ikibazo ari uko bakinira ahantu hato bityo babonye aho bakinira hisanzuye byarushaho kubafasha.

Muri iki kigo niho aba bakinnyi bakinira

Muyango Pierre watangiye gukinira Table Tennis muri Club Rafi i Nyamirambo nyuma akaza kuyitoza mu kigo cy’Amashuri cya Rilima, yatangarije ikinyamakuru impamba.com ko inzitizi bafite ari ukubura ibibuga. Muyango yagize ati “tubashije kubona ibikoresho, abana tukabereka icyerekezo byatanga umusaruro nk’ubu hano hari abana bane bigira ubuntu, hari n’abandi batanu twohereje i Byumba, hari n’abandi twohereje kuri Lycée de Kigali bigayo urumva ko bitangiye kugenda biza”.

Dushimiyimana Ildephone, umuyobozi w’ikigo cy’amashuri cya GS Rilima, yatangaje ko mu bibatwara amafaranga muri Table Tennis ibikoresho birimo. Ku bijyanye n’aho gukorera yavuze ko bafite gahunda yo kuhagura. Uyu muyobozi yavuze ko ibikoresho babura ari “Rakete bantu bakuru bifashisha mu gukina ko izoroha kuboneka ari iz’abana gusa.

Innocent Bahati, Umunyamabanga Mukuru w’Ishyirahamwe ry’umukino wa Table Tennis mu Rwanda, yatangarije ikinyamakuru impamba.com ko muri iyi minsi bashyize imbaraga mu guha ibikoresho amakipe mashya.

Bahati yakomeje avuga ko amakipe agomba nayo gushyiraho akayo mu kugura ibikoresho bya Table Tennis.

GS Rilima ni rimwe mu mashuri yo mu Rwanda yamenyekanyeho kugira abakinnyi b’abahanga mu mukino wa Tennis ikinirwa ku meza (Table Tennis), abanyeshuri b’iri shuri usibye kuza mu myanya ya mbere mu mikino mpuzamashuri (interscolaire) bakunze no kwiganza no mu ikipe y’Igihugu mu gihe cy’amarushanwa atandukanye.

Muyango Pierre utoza Table Tennis i Rilima
Ibikombe Rilima Table Tennis yegukanye mu marushanwa atandukanye
Dushimiyimana Ildephone, umuyobozi w’ikigo cy’amashuri cya GS Rilima

Leave a Reply

Your email address will not be published. Required fields are marked *

Scroll Up