Iburasirazuba: Bamwe bifuza ko ibyiciro by’ubudehe byaba bitanu, abandi bakifuza 3

Abaturage ba Kigina mu Karere ka Kirehe mu kiganiro cyavugaga kuri gahunda yo kuvugurura ibyiciro by’Ubudehe

Bamwe mu baturage bo mu Murenge wa Kigina mu Karere ka Kirehe mu Ntara y’Iburasirazuba bifuza ko ibyiciro by’ubudehe byaba bitanu, ariko mu Murenge wa Gitoki mu Karere ka Gatsibo bo bakifuza ko byaba bitatu.

Byimana Alexis utuye mu Kagari ka Ruhanga,Umudugudu wa Gasare ya mbere, avuga ko ibyiciro by’ubudehe bikwiye kuba bitanu, ariko mu gufasha hakarebwa ibyo umuntu atunze.

Nzanana Fidèle, utuye i Nyakarambi mu Murenge wa Kigina, avuga ko ashyigikiye ko byiciro by’ubudehe biba bitanu, akaba afite icyizere ko kuba ibyiciro by’ubudehe bigiye kuvugururwa hari ikigiye guhinduka.

Nzanana yagize ati “umuntu ashobora kuba ari mu cyiciro cya gatatu, icyo gihe abantu babona ko afite amafaranga, kandi ari inguzanyo yahawe na banki, ibyiciro bikwiye kuba bitanu kandi bigakoranwa ubushishozi kuko hari ubwo amakuru yatangwaga ariko byagera hejuru bigahinduka umuntu akisanga mu cyiciro atishimiye”.

Claudius Karahamuheto, Umunyamabanga Nshingwabikorwa w’Umurenge wa Kigina yatangarije ikinyamakuru impamba.com ko abaturage bifuje ko ibyiciro by’ubudehe byaba bitanu kandi nawe akaba ashyigikiye icyifuzo cyabo.

Claudius Umunyamabanga Nshingwabikorwa w’Umurenge wa Kigina

Karahamuheto yagize ati “nk’ubuyobozi tugendera ku byifuzo by’abaturage , nanjye nshyigikiye ko biba bitanu, abaturage na none bifuje ko  mu kubafasha ibyiciro by’ubudehe bitagenderwaho”.

Mu gihe mu Murenge wa Kigina, Akarere ka Kirehe bifuje ko ibyiciro by’ubudehe byaba bitanu, mu Murenge wa Gitoki mu Karere ka Gatsibo ho si ko bimeze kuko bo bifuza ko ibyiciro by’ubudehe byaba bitatu, ariko hagafashwa icya mbere mu buryo bungana ariko mu cya kabiri n’icya gatatu hakabamo ibika (branch).

Nkurunziza Théogène, utuye mu Kagari ka Nyamirama mu Murenge wa Gitoki, yabwiye umunyamakuru ko ibyiciro by’ubudehe bikwiriye kuba bitatu, hagafashwa icya mbere gusa, ibisigaye ubufasha bugashingirwa ku bushobozi buhari icyo gihe.

Bamwe mu baturage bo mu Murenge wa Gitoki

Musabyimana Jane utuye mu Murenge wa Gitoki yavuze ko nawe yemera ko ibyiciro by’ubudehe bigomba kuba bitatu, ariko nko mu bindi byiciro ufite isambu yera, ntafatwe kimwe n’ubeshejweho no gucira inshuro abandi.

Mushumba John, Umunyamabanga Nshingwabikorwa w’Umurenge wa Gitoki yatangaje ko mu kugena ibyiciro by’ubudehe bagendera ku byifuzo by’abaturage, bityo ko bifuje ko byaba bitatu, ariko hagafashwa icya mbere gusa, ariko mu bindi mu gutanga ubufashwa hakabamo ibindi bika.

Leave a Reply

Your email address will not be published. Required fields are marked *

Scroll Up