Iburasirazuba: Aborozi bagaragarije Minisitiri w’Ubuhinzi n’Ubworozi uruhuri rw’ibibazo bibatera igihombo

Mukeshimana Gerardine Ministre w’Ubuhinzi n’Ubworozi

Aborozi bo turere twa Nyagatere ,Gatsibo na Kayonza batakambiye Minisitiri w’Ubuhinzi n’Ubworozi bamugaragariza ibibazo bibangamiye ubworozi birimo ibihombo baterwa no kubura ubushobozi bwo gupima ubuziranenge bw’amata no kubura umuti w’uburondwe no kwamburwa na ba rwiyemezamirimo.

Guverineri Mufulkye Fred uyobora Intara y’iburasirazuba nawe witabiriye iyo nama yavuze ko ibibazo biri mu bworozi muri utwo turere bagiye gushyiraho itsinda rigiye gusesengura imiterere yabyo n’uko byakemuka .

Guverineri Mufulkye Fred yagize ati “Icyo tugiye gukora ni uko tugiye gukora isesengura ry’ibi bibazo byose ,tugiye gushyiraho itsinda ryigenga mu gihe cy’icyumweru iryo tsinda rizaba ryamaze kuduha raporo ,tugiye no gukurikira niba buri rwego rukora ibyo rwakabaye rukora .”

Aborozi bo mu Karere ka Nyagatare  bavuze ko baterwa igihombo nuko bajyana amata ku makusanyirizo y’amata bakanga kuyabagurira kubera ko basanga amata yabo adafite ubuziranenge  kandi bitewe na bake mu bakoresha nabi imiti batera inka bakoresheje inshinge bituma amata atagira ubuziranenge kubera kutubahiriza amabwiriza yo gutera imiti inka hari amakusanyirizo atarageraho umuriro w’amashanyarazi  .

Aborozi banavuga ko nta bikoresho bafite bishobora gupima ubuziranenge bw’amata bigatuma bavanga amata atujuje ubuziranenge n’ayujuje ubuziranenge kandi iyo bamaze kuyavanga bigatera  igihombo ku borozi bazanye amata yujuje ubuziranenge .

Aborozi bo mu Karere ka Kayonza bavuga ko babuze isoko ry’amata yabo bitewe nuko uruganda rw’inyange nta mikoranire rufitanye n’amakusanyirizo y’amata bigatuma bayagurisha n’abamamyi na ba rwiyemezamirimo batwara amata ntibabishyure ku buryo ubu hari abamaze kubambura amafaranga miliyoni 46 kubera amata batwaye ntibishyure aborozi .

Guverineri w’ Intara y’iburasirazuba  yavuze ko ibibazo biri mu bworozi muri utwo turere bagiye gushyiraho itsinda rigiye gusesengura imiterere yabyo nuko byakemuka.

Minisitiri w’Ubuhinzi n’Ubworozi Gerardine Mukeshimana yabwiye abayobozi bo mu nzego z’ibanze ko bakwiye gushyira imbaraga mu gukurikirana ibibazo aborozi bafite.

Yagize ati “Ubuyobozi bw’Uturere bugomba gushyira imbaraga mu kureba uko amata atwarwa ,twanumvikanye ko bagomba gufuhera mu midugudu abavitereneri b’imirenge bagafasha kugira ngo imiti yica uburondwe ikoreshwe neza ariko ntabwo bafashwa nta ruhare aborozi babigizemo twese duhari kugirango tubafashe imyumvire ya Nyagatare igomba guhinduka”.

Minisitiri yakomeje asaba Urwego rw’Ubugenzacyaha (RIB) na Polisi y’igihugu gushakisha ababangamiyiye kubungabunga ubuziranenge bw’amata .

Imibare itangwa n’ihuriro ry’amakoperative y’aborozi  igaragaza ko mu mezi 6 amata yageze yagejejwe kuri Savannah ipima amata ikayajyana ku ruganda rw’inyange ayagezeyo yujuje ubuziranenge yanganaga na 85% akaba ari litiro 9,358,428 naho ayo batakiriye kubera kutuzuza ubuziranenge ni litiro 1,403,764 bingana na 15%.

Leave a Reply

Your email address will not be published. Required fields are marked *

Scroll Up