Abahanzi banga kwandikisha indirimbo kugira ngo bakwepe imisoro- Sibomana

Sibomana Jean Bosco bakunze kwita Dr Scientific

Sibomana Jean Bosco uzwi ku izina ry’ubuhanzi rya Dr Scientific asanga mu bituma umuziki wo mu Rwanda udatera imbere ari uko abahanzi batandikisha ibihangano byabo mu Kigo cy’Igihugu Gishinzwe Iterambere (RDB), ibyo agasanga bikorwa mu rwego rwo gukwepa imisoro.

Sibomana, ibi yabitangaje nyuma y’uko bamwe mu bahanzi bakunze kuvuga ko Leta itabafasha ngo batere imbere. Uyu muhanzi avuga ko nta muhanzi ukwiriye kuvuga ko nta cyo Leta imufasha mu gihe nawe ahunga imisoro.

Sibomana ubusanzwe ukora akazi k’ubuvuzi bwa gakondo, mu kiganiro yagiranye n’ikinyamakuru impamba.com, yagize ati “uhunga imisoro igihugu nticyamumenya cyangwa se kimugirire akamaro”.

Sibomana

Yakomeje agira ati “ubu umuhanzi ashora amafaranga menshi ntayagaruze kubera kutagira ubuvugizi”.

Uyu muhanzi akaba n’umuvuzi wa gakondo mu ivuriro rya “African Cultural Mediccine” i Nyabugogo ahazwi nko mu “mashyirahamwe” yaboneyeho umwanya wo gusaba abahanzi kugira imikoranire myiza na Leta.

Ikindi Sibomana avuga ni uko hari n’abahanzi banywa ibiyobyabwenge bigatuma batagirirwa icyizere kuko usanga bigize indakoreka.

Sibomana yagize ubutumwa ageza ku bahanzi bagenzi be ati “Leta y’u Rwanda idusaba buri muntu kuba ijisho rya mugenzi we, ariko mu muziki nyarwanda hagomba kubaho amatsinda ahangana n’abahanzi bafata ibiyobyabwenge”.

Sibomana Jean Bosco umaze kwamamara ku izina rya Dr Scientific yamenyekanye mu ndirimbo zitandukanye ziganjemo izikangurira ababantu gukunda umurimo nk’iyitwa “Shaka money” yaririmbanye n’umuhanzi Frankay, Kunda gukora yaririmbanye n’itsinda bita “Fire band”. Yaririmbye na none indirimbo ivuga ibyiza by’u Rwanda yise “Ubwiza bw’u Rwanda” n’indi yitwa “Rwanda” aho avuga ibyiza bitatse u Rwanda n’izindi.

Dr Scientific ubu abarizwa mu itsinda bise  “The Legends” akaba afatanya na King The winner.

Leave a Reply

Your email address will not be published. Required fields are marked *

Scroll Up