Bugesera:Bamwe mu bagore baranenga abagabo bagurusha amata amafaranga bakayamarira mu kabare

Umurenge wa Rweru (Ifoto /Internet)

Mu Karere ka Bugesera, Umurenge wa Rweru mu Kagari ka Batima mu Mudugudu wa Mbuganzeli, hari abagore binubira bamwe mu bagabo bafata amafaranga nyuma yo kugurisha amata bakayanywera ntibagire na rimwe bageza mu rugo, kandi abagore n’abana ari bo baba bavunitse bahirira inka ubwatsi, banazishakira amazi.

Ingeso yo kugurisha amata, maze amafaranga avuyemo ntagirire akamaro gafatika umuryango, ni kimwe mu byo bamwe mu bagore batuye mu mudugudu wa Mbuganzeli bavuga ko kibangamiye iterambere ry’imiryango yabo, aba bagore bavuga ko hari bamwe mu bagabo bafata amafaranga yavuye mu mata y’inka bagurishije bakayanywera mu tubari ntibagire na make bacyura mu ngo.

Umwe mu bagore agira ati, “izi nka twazihawe kugira ngo zigirire akamaro imiryango, ni ukuvuga abagize umuryango bose, iyo rero umugabo ayafashe akayanywera bituma umuryango uhorana ubukene, kandi iyi ni ingeso iri kuri bamwe mu bagabo bo muri uyu mudugudu”.

Undi mugore wavuganye n’ikinyamakuru impamba.com nawe avuga ko iyi ngeso ihari ati “iyi ngeso irahari kandi ituma hari imiryango ibana nabi, igahorana amakimbirane, bitewe n’uko umugabo avuga ko ari we ufite uruhare runini ku mutungo, kandi ngo agomba gukoresha amafaranga uko abyumva”.

Aba bagore bavuga ko ahanini abagore n’abana ari bo baba bavunitse bashaka ubwatsi ndetse n’amazi byo gutunga inka, bityo bagasaba ubuyobozi bwo mu nzego z’ibanze ko bwagerageza guhanura abagabo barangwaho iyi ngeso bagahinduka.

Umunyamabanga Nshingwabikorwa w’Umurenge wa Rweru, Ngombwa Léandre Kagorora ; yatangarije ikinyamakuru impamba.com ko iki kibazo ubuyobozi bw’umurenge bukizi ariko kitari mu miryango myinshi,  agira ati “ni nk’imiryango itandatu yonyine iki kibazo twagisanzemo, ariko mu kugira ngo duhangane nacyo, twabashyize muri cooperative, bityo aya mafaranga yaza bakaba ariho bayafatira kandi mu gihe cyo kuyafata bakayafata bari kumwe; umugore n’umugabo mu kwirinda ko hari uwayikubira”.

Uretse iyi ngamba yo guhuriza hamwe aba borozi, banafite gahunda yo gukomeza kwigisha imiryango uburyo abashakanye bagomba gucunga imitungo yabo ntawuryamiye undi.

Ngombwa yagize ati“dukomeza no kwigisha yaba mu nama zihuza abaturage mu midugudu no mu tugali, kugira dufashe imiryango kumenya gucunga umutungo ntawuryamiye undi mu muryango, ariko kandi mu gihe bigaragaye ko hari uwanze guhinduka ngo areke ingeso yo gucisha hirya umutungo tumujyana mu bigo ngororamuco ku Ruhuha(Transit Center), ariko kandi tukanasaba abashakanye kujya baduha amakuru mu gihe babona ko bafitanye ibibazo”.

Kwikubira umutungo kw’umwe mu bagize umuryango ni imwe mu ntandaro ishobora gukurura amakimbirane mu muryango, rimwe na rimwe anakurura ubwicanyi bwo mu miryango ataretse no gutandukana kw’abashakanye.

Leave a Reply

Your email address will not be published. Required fields are marked *

Scroll Up