Iburasirazuba: Pasiteri Rutayisire yerekanye uburyo umuyobozi usenga bimuha izindi mbaraga

Abayobozi batandukanye bo mu Ntara y’Iburasirazuba bitabiriye umuhango wo gusengera Igihugu

Mu Ntara y’Iburasirazuba kuri iki Cyumweru tariki ya 24 Werurwe 2019 habereye amasengesho yo gusengera igihugu, Pasiteri Antoine Rutayisire ni umwe mu batanze inyigisho maze yerekana uburyo umuyobozi usenga bimuha imbaraga zo kuzuza inshingano ze.

Guverineri w’Intara y’Iburasirazuba, Mufulukye Fred yitabiriye amasengesho yateguwe ku bufatanye bw’amadini n’inzego z’abikorera mu cyerecyezo cya “Rwanda Leaders Fellowship”. Aya masengesho yabereye muri imwe mu mahoteri yo mu Karere ka Nyagatare anitabirwa n’Abayobozi b’amadini n’amatorero, Abayobozi ku rwego rw’Intara n’Abayobozi b’Uturere.

Muri aya masengesho yo gushimira Imana no gusengera Igihugu, Pasiteri Antoine Rutayisire yatanze inyigisho ifite insanganyamatsiko igira iti”Imbaraga z’Umuyobozi usenga”, agaragaza ko Umuyobozi usenga bimuha izindi mbaraga zituma yuzuza neza inshingano ze.

Pasiteri Rutayisire yagize ati “Umuyobozi usenga usenga bimuha imbaraga zituma yuzuza neza inshingano ze, bityo bigatuma ateza imbere abo ayobora”.

Guverineri Mufulukye yashimiye abateguye iki gikorwa

Guverineri Mufulukye yashimiye abateguye iki gikorwa, avuga ko iki gikorwa gishimangira imikorere myiza n’ubufatanye busanzwe buri hagati y’inzego za Leta n’amadini mu rugendo rwo kubaka igihugu nkuko basanzwe bafatanya no mu zindi gahunda.

Guverineli Mufuruke agira ati“Turashimira ubufatanye abayoboye amadini n’amatorero bagira mu bikorwa by’iterambere,n’uburyo bafasha Leta kugera ku ntego binyuze mu burezi (amashuri);Ubuzima (ibitaro, ibigo nderabuzima);Ubumwe n’Ubwiyunge; Imibereho myiza y’Abaturage (kubakira abatishoboye,isuku…) n’ibindi”

Guverineri kandi yashimye ubufatanye bwaranze amadini n’amatorero ndetse n’izindi nzego mu gukemura ikibazo cy’insengero zitari zujuje ibisabwa, abasaba ko ubwo bufatanye bukomeza no mu bindi bikorwa bitandukanye nko kurwanya amakimbirane mu miryango, kurwanya ibiyobyabwenge,igwingira ry’abana, kurwanya inda ziterwa abangavu n’ibindi hagamijwe kubaka ejo hazaza heza.

Muri aya masengesho kandi, Guverineri yasabye abayitabiriye ko mu gihe u Rwanda rugiye kwinjira mu gihe cyo kwibuka Jenoside yakorewe Abatutsi mu 1994, gukomeza ubu bufatanye muri iki gihe, bakaba hafi abacitse ku icumu rya Jenoside ndetse barushaho gukomeza gukangurira abaturage inzira y’ubumwe n’ubwiyunge.

Leave a Reply

Your email address will not be published. Required fields are marked *

Scroll Up