Ambasaderi w’u Rwanda muri Uganda yasabwe ibisobanuro ku ifungwa ry’umupaka

Aha ni ku mupaka wa Gatuna uhuza u Rwanda na Uganda ubu wamaze gufungwa

Ofwono Opondo, Umuvugizi wa Leta ya Uganda atangaza ko basabye Ambasaderi w’u Rwanda muri Uganda Frank Mugambage ibisobanuro ku ifungwa ry’umupaka wa Gatuna.

Guhera ku wa Kane, amakuru yavaga i Gatuna mu Karere ka Gicumbi yavugaga ko u Rwanda rwafunze umupaka waryo na Uganda.

Abayobozi bo mu nzego zitandukanye mu Rwanda bavuze ko gufunga uriya mupaka biri mu rwego rwo kuwusana kandi ko imodoka zikoreye ibicuruzwa ziva cyangwa zijya muri kimwe muri ibi bihugu zigomba kuba ziri gukoresha umupaka wa Kagitumba mu gihe uwa Gatuna ugisanwa.

Ofwono Opondo  kandi avuga ko Leta ya Uganda yasabye Ambasaderi wayo mu Rwanda Olive Woneka gusaba ibisobanuro birambuye Minisitieri y’Ububanyi n’Amahanga y’u Rwanda ku byerekeye ifungwa ry’uwo mupaka.

Ikinyamakuru The Monitor gitangaza ko ikigo cy’u Rwanda Gishinzwe Imisoro n’Amahoro (RRA) cyandikiye icyo muri Uganda bifite inshingano zimwe ko kubuza amakamyo yabo kwinjira mu Rwanda byakozwe kubera ko hari imirimo yo gusana uriya mupaka.

Ku rundi ruhande ariko, Umunyamabanga uhoraho muri Minisiteri y’ububanyi n’amahanga wa Uganda yavuze ko gufunga uriya mupaka bitazatuma umubano w’u Rwanda na Uganda ujya irudubi.

Henry Okello Oryem avuga ko hari ibiganiro hagati y’ibihugu byombi bigamije gucubya umwuka mubi uri hagati y’ibihugu byombi nk’uko ikinyamakuru umuseke dukesha iyi nkuru kibitangaza.

Henry Okello Oryem yagize, ati“dufite ibyo dushaka ko badusobanurira ariko nabo bafite ibyo batubaza tugomba kubasobanurira. Muri make turi kuganira kandi ubwo tubiganiraho birumvikana ko atari ibintu biremereye cyane. Bizakemuka rwose ndabyizeye.”

U Rwanda narwo rwemera ko ibibazo biri hagati yarwo na Uganda bishobora gukemuka binyuze mu biganiro.

Leave a Reply

Your email address will not be published. Required fields are marked *

Scroll Up