Diane Rwigara arashaka kuba umuyoboro ijwi ry’Umunyarwanda ryumvikaniraho

Umunyapolitiki Diane Shima Rwigara

Diane Shima Rwigara wigeze gushaka kwiyamamariza kuba Perezida w’u Rwanda  aratangaza ko azakomeza ibikorwa bye bya politiki nta nkomyi kuko ashaka kuba urubuga rutuma rubanda rubaza  Leta ibibakorerwa.

Mu kiganiro n’ikinyamakuru Reuters kuwa 26 Mutarama uyu mwaka, Diane Rwigara  yavuze ko ashaka kuba umuyoboro amajwi y’Abanyarwanda yumvikaniraho.

Diane yagize ati “ Ndashaka kuba  umuyoboro ijwi ry’Umunyarwanda ryumvikaniraho, nshaka kuba urubuga rw’aho tugira ibyo tubaza Leta.”

Uyu munyapolitiki kandi yatangaje aho abogamiye mu kuba yafungwa aryozwa ibitekerezo bye maze agira ati “ Ntidukwiye gufungwa  ku bw’ibitekerezo byacu. Ntekereza ko impinduka zishoboka ariko ntitwategereza igitutu kivuye hanze.”

Umunyamabanga wa Leta muri Minisiteri y’Ububanyi n’Amahanga, Amb. Olivier Nduhungirehe yabwiye Reuters dukesha iyi nkuru ko  ibitekerezo bya Diane Rwigara ari ibigamije kwereka rubanda ko (ngenekereje) Leta yarwigirijeho nkana.

Nduhungirehe yongeyeho ko Abanyarwanda berekanye ukwiye kubayobora nk’uko ikinyamakuru bwiza dukesha iyi nkuru kibitangaza.

Nduhungirehe yagize ati “Rubanda rwonyine binyuze mu matora  ni rwo rufata icyemezo ku muntu  uyobora igihugu. Si Diane Rwigara ufata icyemezo.”

Diane Rwigara ni umwe mu bagerageje gutanga kandidatire ku mwanya wa Perezida w’u Rwanda mu 2017.Yakomwe mu nkokora no kuba Komisiyo y’Igihugu y’Amatora yaranzuye ko imwe mu mikono yifashishije harimo itari iya nyayo. Ibi yabiteye utwatsi, avuga ko ari ugushaka kumwigizayo mu kibuga cya politiki.

Leave a Reply

Your email address will not be published. Required fields are marked *

Scroll Up