Ari umu “Athletes” witoreza mu Rwanda n’uwitoreza mu mahanga batandukanira he?

Nizeyimana Alexis (wambaye umupira w’icyatsi) umwe mu bakinnyi wakiniye mu Rwanda igihe kinini utaragize icyo ageraho gifatika

Hari abakinnyi b’Abanyarwanda bakina imikino ngororamubiri (athletisme) bitoreza mu Rwanda gusa n’abandi bajya kwitoreza mu mahanga bihereye muri aka Karere ka Afurika y’Iburasirazuba nko muri muri Kenya n’abitoreza mu Burayi, mu isesengura ikinyamakuru impamba.com cyakoze kirabereka  ko abo bakinnyi hari aho batandukanira yaba mu kuzamura urwego rw’imikinire yabo yabo ndetse no mu kwiteza imbere no gufasha imiryango yabo cyangwa se kwereka bagenzi babo inzira bacamo impano Imana yabahaye yo kwiruka uburyo bamenya aho bajya guhahira bayikoresheje.

Muri ubu busesenguzi turibanda ku bakinnyi barimo abajya kwitoreza mu mahanga bakagaruka mu Rwanda vuba cyangwa banakenerwa bakagaruka gukinira igihugu cyabo, turagaruka na none kubajya mu mahanga bikaba ngombwa ko batinda kugaruka mu Rwanda kuko babihuza no gushaka indi mibereho nko kwiga no guturayo mu gihe bibaye ngombwa.

Bamwe mu bakinnyi b’Imikino Ngororamubiri bakoze ibikorwa bifatika babikesha gukinira hanze y’Igihugu

Urutonde rw’abakinnyi b’Abanyarwanda bagiye mu mahanga nyuma bakagirira abandi akamaro ni rurerure, ariko ikinyamakuru impamba.com cyabateguriye amwe mu mazina amwe n’amwe.

Ntawurikura Mathias

Ntawurikura Mathias yahagarariye u Rwanda mu mikino Olempike kuva mu mwaka wa 1988 kugeza 2004, nyuma yo guhagarika amarushanwa yakomereje ubundi buzima mu Butaliyani.

Mathias usibye kuba hari abakinnyi yafashije hari n’abaturage yafashije abikesha kwiteza imbere abikesha kwitabira amarushanwa mpuzamahanga.

Ntawurikura kuba yarabaye mu Butaliyani igihe kinini ari naho umujyanama (manager) we abarizwa byatumye barushaho kumumenya ndetse binamworohera kugezayo abakinnyi b’Abanyarwanda bari bamaze igihe mu mikino ngororamubiri ntacyo bageraho gifatika bituma uwahoze ari umujyanama we witwa Traversie Paolo akomeza kubitaho no kubashakira amarushanwa.

Bamwe mu bakinnyi b’Abanyarwanda bagiye mu Butaliyani Ntawurikura abigizemo uruhare harimo: Rukundo Sylvain wakiniraga Police Athletics Club, ubu usigaye ari umutoza wayo. Amakuru ikinyamakuru impamba.com cyashoboye kumenya ni uko Rukundo akigera mu Butaliyani yubatse inzu i Rwamagana ifite agaciro ka miliyoni 30 z’amafaranga y’u Rwanda (30,000,000Frs).

Undi mukinnyi wageze mu Butaliyani ni Simukeka Jean Baptiste ubarizwa mu ikipe ya APR y’imikino ngororamubiri, usibye kuba afite ibikorwa yagezeho abikesha kuba mu Butaliyani, imwe mu mitungo afite ikinyamakuru impamba.com cyashoboye kumenya ni inzu yubatse ku Kimironko mu Mujyi wa Kigali nubwo igiciro cyayo umunyamakuru atashoboye kukimenya.

Abandi bakinnyi bagiye mu Butaliyani gushakirayo imibereho binyuze mu mpano yabo yo gusiganwa ku maguru ni: Nyiransabimana Angeline wakiniraga APR ubu akaba yarabiretse na Ntirenganya Felixe wakiniraga Police ariko we ntiyatinze mu Butaliyani kuko yananiwe kumvikana na “manager” we.

Nyuma y’aba bakinnyi, abakinnyi b’Abanyarwanda bakomeje kujya mu Butaliyani kubera kwitwara neza bikarangira babonye ko impano yabo yabagirira akamaro. Abandi bakinnyi bahise berekeza mu Butaliyani barimo:Muhitira Felicien bita Magare, Ntawuyirushintege Potien, Iranzi Celine, ariko we ntiyakomeje kugumayo kuko nyuma yaje guterwa inda agaruka mu Rwanda n’ibyo gukina bikaba bisa n’ibyahagaze, abandi ni Mukandanga Clementine, Habakurama Musa, Primien Manirafasha n’abandi.

 Gasore Serge

Gasore Serge nubwo atari umwe mu bakinnyi bamenyekanye cyane mu Rwanda ariko ni umwe mu biteje imbere abikesha kujya kwiga muri Amerika nk’umukinnyi w’imikino ngororamubiri (Athletisme). Gasore ubu ni umwe mu bavuga rikijyana mu Karere ka Bugesera nyuma yo kubaka ikigo cya “Gasorge Foundation” kiri i Ntarama aho yarokokeye Jenoside yakorewe Abatutsi mu mwaka wa 1994.

Gasore ikigo yashinze ubu gifasha abaturage ba Ntarama, ariko akarusho yakoze ni ukwita kuri Mugabo Seraphin wakiniye u Rwanda mu mikino mpuzamahanga harimo n’iya Olempike nyuma waje guhura n’ubuzima bubi bamwe bakamwita umurwayi wo mu mutwe kandi yaraziraga kubura umwitaho.

Yves Sikubwabo

Sikubwabo yakiniye ikipe ya NAS yitorezaga ku Kicukiro, ubu aba muri Canada, ubu nawe akaba ari ku rwego rwo kwifasha ndetse agafasha n’abandi bakinnyi b’Abanyarwanda.

Yves Sikubwabo ubu ni umwe mu baterankunga b’ikipe ya New Athletics Star (NAS) iyobowe na Nkezabo Jean Damascene wigeze kuba Perezida w’Ishyirahamwe ry’Imikino Ngororamubiri mu Rwanda (RAF). Uyu mukinnyi wigeze kuba mu buzima bushaririye ubu afasha abakinnyi b’Abanyarwanda iyo bamukeneyeho ubufasha ndetse agafasha n’Abanyakenya, akaba afite na gahunda yo kubakayo ikigo “centre” ahitwa Itene gifasha abakinnyi gukora imyitozo.

Butare Pascal

Butare Pascal ni umwe mu bakinnyi b’Abanyarwanda birukaga ahantu hagufi (Metetero 400 no guhererekanya agati (relais), ubu abarizwa muri Amerika, aho nawe yibeshejeho n’umuryango we ndetse akaba n’umwe mu bagoboka umukinnyi wese wakinnye imikino ngororamubiri (Athletisme) mu gihe yahuye n’ikibazo runaka. Hamwe mu ho Butare yigaragaje kimwe n’abandi bakinnyi ni ubwo Ntawurikura Mathias yafatwaga n’uburwayi bukomeye bikaba ngombwa ko ajya kwivuriza mu mahanga, yongeye kwigaragaza mu gutabara umuryango wa Epimaque Nizeyimana witabye Imana.

Butare usibye kuba afasha abakinnyi bamwe na bamwe, muri Marato Mpuzamahanga y’Amahoro ya 2017 yazanye ibyombo kugira ngo bizifashishwe mu itumanaho icyo gihe, ariko icyo gihe yaje ku biro by’Ishyirahamwe ry’Imikino Ngororamubiri ntibamumenya biba ngombwa ko abibwira. Ubwo bushobozi yabugezeho abikesha gukomereza ubuzima muri Amerika nyuma yo gukina.

Nyirabarame Epifanie

Nyirabarame Epifanie nubwo we atabaye mu mahanga cyane kuko yigaragaje amaze gukura, ariko amafaranga menshi yinjije ni ayo yakuye mu marushanwa mpuzamahanga. Nyirabarame akiri umukinnyi hari abana batishoboye yishyuriye amashuri kugeza barangije kaminuza. Nyirabarame mu kwiteza imbere yubatse inzu muri Kigali byose abikesha ubuhanga bwe mu gusiganwa ku maguru.

Sharangabo Alexis

Sharangabo Alexis  ni umwe mu bakinnyi bakiniye u Rwanda mu mikino Olempike nyuma ya Jenoside yakorewe Abatutsi, ariko nyuma nawe yaje kujya muri Amerika agumayo igihe kinini agaruka mu Rwanda yararangije amashuri ye ndetse yaraniteje imbere.

Sharangabo, nyuma yo kuva muri Amerika akagaruka mu Rwanda, ubu ni Umunyamabanga Mukuru wa Komite Olempike y’u Rwanda (CNOSR) mu gihe abandi babaga mu Rwanda bifuje uko bakwinjira mu buyobozi bwa Komite Olempike cyangwa Ishyirahamwe ry’abaserukiye u Rwanda mu mikino Olempike (Association des Olympiens du Rwanda) kugira ngo ijwi ryaryo ryumvikane byari byaranze.

Impamvu umukinnyi w’imikino ngororamubiri ashobora kujya kuba mu mahanga hakagira ababibonamo ikibazo

Muri iri sesengura ikinyamakuru impamba.com cyakoze cyasanze imwe mu mpamvu zituma umukinnyi ashobora kujya mu mahanga akagumayo, agatinda kugaruka cyangwa se akaza mu gihe ari ngombwa, ni uko hakiri abakinnyi bake bashoboye  mu Rwanda ku buryo usanga mu mikino mpuzamahanga umukinnyi umwe ari we uhanzwe amaso, bityo yabura bikabangamira abayobozi.

Mu Rwanda habonetse abakinnyi benshi bashoboye bamwe bajya bakomereza ubuzima mu mahanga gushaka ubuzima hakaboneka abandi bahita bigaragaza bakaziba icyuho cy’abagiye, ariko ibyo kugira ngo bizagerweho inzira iracyari ndende.

Impamvu bamwe mu bakinnyi bafata umwanzuro gukina bakabihuza no gushaka imibereho mu mahanga

Imwe mu mpamvu ituma bamwe mu bakinnyi bafata umwanzuro wo gushaka uko bakomereza ubuzima mu bindi bihugu, muri ubu busesenguzi, umunyamakuru yasanze imwe mu mpamvu nyamakuru ari ugutekereza ku hazaza he mu gihe azaba atagishobora kwiruka.

Hari abakinnyi bahesheje igihugu ishema mu ruhando mu mpuzamahanga, ariko nyuma yo guhagarika gukina, iyo ahuye n’ingorane mu buzima yaba kurwara indwara zikomeye cyangwa kwitaba Imana bamwe mu bayobozi ba siporo babaherekezaga ntibongera kubikoza, bigatuma abakinnyi bakiri bato babibonye bakina batekereza no ku cyo bazakora batabereye imiryango yabo n’igihugu umutwaro.

Icyo ni igitekerezo cy’umunyamakuru undi ufite uko abibona yatwandikira kuri impambanews@gmail.com

Leave a Reply

Your email address will not be published. Required fields are marked *

Scroll Up