Uregwa kugira uruhare muri Jenoside yagejejwe mu Rwanda

Wenceslas Twagirayezu ubwo yashyikirizwaga Polisi y’u Rwanda (Ifoto/Internet)

Twagirayezu Wenceslas ukekwaho kugira uruhare muri Jenoside yakorewe Abatutsi mu mwaka wa 1994 yageze i Kigali kuri uyu wa kabiri mu masaha ya nijoro. Yoherejwe n’igihugu cya Denmark aho yari nyuma y’uko aburanye mu nkiko zaho zose yanga koherezwa mu Rwanda agatsindwa.

Yaje atwawe n’abo mu nzego z’ubutabera z’iki gihugu, yambaye ikoti ry’umukara n’umupira w’umutuku mbere n’umusaraba mu gatuza.

Yahise afatwa na Police mu maboko bamushyikiriza ubushinjacyaha.

Jean Bosco Siboyintore Umuyobozi mukuru ushinzwe gushakisha abakekwaho ibyaha bya Jenoside yakorewe Abatutsi muri Mata 1994 avuga ko babanje kumubwira uburenganzira bwe.

Ubu akaba agiye kuba acumbikiwe aho yateganyirijwe, ibindi birambuye ngo bizatangazwa mu kiganiro n’abanyamakurukuri uyu wa gatatu.

Twagirayezu arashinjwa ibyaha bibiri; icya Jenoside n’ibyaha byibasiye inyoko muntu.

Muri Jenoside yakorewe Abatutsi Twagirayezu yari azwi cyane mu muri za Komini Rubavu, Mutura na Rwerere mu cyari Perefegitura ya Gisenyi kubera uruhare rwe mu bwicanyi nk’uko yabirezwe mu nkiko muri Denmark.

Yatawe muri yombi muri kiriya gihugu, yari anafitiye ubwenegihugu, mu mwaka ushize ku busabe bw’ubutabera bw’u Rwanda. Yahise atangira kuburanishwa yanga ko yoherezwa mu Rwanda aho aregwa gukorera ibyaha.

Ashinjwa uruhare mu kwica Abatutsi barenga 3 000 bari bahungiye kuri Kiriziya ya Busasamana.

Twagirayezu w’imyaka 50 ubu, muri Jenoside ngo yagendanaga imbunda ku mugaragaro, ashinjwa kandi uruhare mu kwica abarenga 1000 bari bahungiye kuri kaminuza ya Mudende, n’abari bahungiye kuri Institut Saint Fidele bashyizwe mu modoka bakajya kwicirwa ku Nyundo.

Twagirayezu wahoze ari umwarimu yari n’umurwanashyaka ukomeye muri CDR, ishyaka ryari rifite ingengabitekerezo y’ubuhezanguni mu gihe cya Jenoside yakorerewe Abatutsi no mu itegurwa ryayo.

Ubushinjacyaha bw’u Rwanda bwatangaje uyu munsi ko bwiteguye gushyikiriza ubutabera Twagirayezu akaburanishwa hubahirijwe uburenganzira bwe nk’uko ikinyamakuru umuseke kibitangaza.

Uyu ni umuntu wa kabiri woherejwe na Denmark kubazwa ibyaha bya Jenoside aregwa nyuma ya Emmanuel Mbarushimana iki gihugu cyohereje muri 2014.

Twagirayezu yabaga muri Denmark kuva 2001 aho yanashinze umuryango witwa Dutabarane Foundation.

Leave a Reply

Your email address will not be published. Required fields are marked *

Scroll Up